Omukanda wo Tete Onohamba

13 Ngeetyi atuminwe na Siovaa, omunthu wa Huku+ yotyotyili atundu ko Sundaa aende ko Mbetele, etyi ehika, Selombowau ankho ukahi ponthele yomutala wovilikutila+ opo alinge otyilikutila tyitunde omwihi. 2 Ngeetyi atuminwe na Siovaa, omulume oo apopila omutala wovilikutila okuti: “Mutala wovilikutila, mutala wovilikutila! Siovaa wati: ‘Meumbo lya Ndaviti mamukakutulwa omona malukwa okuti o Sosiya.+ Makalingila kwoove ovilikutila viovanakwa vo ponomphangu mbukola mbokwaya peulu, vana vokulingila kwoove ovilikutila viokutunda omwihi, makayokela kwoove omankhipa ovanthu.’”+ 3 Monthiki oyo, omunthu wa Huku yotyotyili aave enyingilikilo* apopi okuti: “Eli enyingilikilo* Siovaa apopia: ‘Omutala wovilikutila maukañgeñga omunkhia, etwe* likahi-ko malitokela pohi.’”

4 Etyi ohamba Selombowau eiva etyi omunthu wa Huku yotyotyili apopila omutala wovilikutila wo ko Mbetele, apolo okuvoko komutala wovilikutila, ayulika momulume oo ati: “Mukwatei!”+ Liwa-liwa okuvoko ayulika nako omulume, akukukuta,* ehetyivili vali okukuvoveka pombwelo.+ 5 Omutala wovilikutila auñgeñge omunkhia, etwe komutala alitoko-ko, ngeetyi tyalekesa enyingilikilo* liomunthu wa Huku yotyotyili, ankho watumwa na Siovaa.

6 Ohamba aipopila omunthu wa Huku yotyotyili okuti: “Mbambavo ita okankhenda ka* Siovaa Huku yove, ndingile-vo elikwambelo opo okuvoko kwange kuviuke.”+ Omunthu wa Huku yotyotyili aiti ku Siovaa okankhenda, okuvoko kwohamba akukala nawa. 7 Ohamba aipopila omunthu wa Huku yotyotyili okuti: “Twende atuho keumbo liange opo ukalie-po okapuka kamwe, endyu ndyikekwavele otyiawa.” 8 Mahi omulume oo apopila ohamba okuti: “Nga tyitiwa vala ukampha onthele imwe yeumbo liove, ame ñgeno haile noove tatekulu, hili ombolo potyilongo pano nii okunwa omaande. 9 Mokonda natumwa na Siovaa okuti: ‘Wahalie ombolo, nii wahanwe omaande, tupu wahakondoke nondyila waya nayo.’” 10 Ngootyo akondoka nondyila onkhwavo, ahakwate mondyila eile nayo mo Mbetele.

11 Kwali omuuli omukulu ankho ukala mo Mbetele. Ovana vae avaende keumbo, avemupopila atyiho omunthu wa Huku yotyotyili alinga monthiki oyo ko Mbetele, nonondaka apopilile ohamba. Etyi vetyipopia atyiho ku tate yavo, 12 ngwe evepulu okuti: “Waya nondyila patyi?” Ovana vae avemulekesa ondyila ei omunthu wa Huku yotyotyili wo ko Sundaa aile nayo. 13 Apopila ovana vae okuti: “Ndingilei-ko nawa otyimbulu tyange.” Avetyilingi nawa, ngwe avelama-ko.

14 Alandula omunthu wa Huku yotyotyili, ekemuvasa upumphi mombwelo yomuti umwe omunene. Emupulu okuti: “Ove, ove omunthu wa Huku yotyotyili watunda ko Sundaa?”+ Akumbulula okuti: “Yoo ame.” 15 Omuuli oo ombwale ati: “Twende atuho keumbo liange, ukalie-po okambolo.” 16 Mahi ngwe ati: “Ame hipondola okukondoka noove, nii okutavela etyi wankhonga, tupu hipondola okulia ombolo, nii okunwa omaande potyilongo pano. 17 Mokonda natumwa na Siovaa okuti: ‘Wahalie ombolo, nii wahanwe omaande kotyilongo oko. Tupu wahakondoke nondyila waya nayo.’” 18 Omuuli ombwale emupopila okuti: “Ame naame ndyimuuli ngoove, oandyu yatuminwe na Siovaa yamphopila okuti: ‘Mukondola amwende nae keumbo liove, akalie ombolo, anu omeva.’” (Ankho wemukemba.) 19 Pahe etavela avakondoka nae akalie ombolo, anu omaande keumbo liae.

20 Pweetyi ankho vepumphi komesa, omuuli wokwemukondola atambula ondaka ku Siovaa, 21 alaveleya peulu omunthu wa Huku yotyotyili watunda ko Sundaa ati: “Siovaa wati: ‘Mokonda ove kwetavelele etyi Siovaa ekutuma, ohafwisapo otyitumino Siovaa Huku yove ekwavela, 22 mahi wakondoka ukalie ombolo, onu omaande motyilongo nekutumine okuti: “Wahalie ombolo, nii wahanwe omaande kotyilongo oko,” olutu lwove kamalukapakwa meendo liovakwaukulu vove.’”+

23 Etyi omunthu wa Huku yotyotyili amana okulia nokunwa, omuuli ombwale alingi nawa otyimbulu opo omuuli akondolele, avelame-ko. 24 Omulume oo aende, mahi tyina ati mondyila avasiwa nonkhulika, aimwipaa.+ Akangavala metapalo, otyimbulu atyitalama ponthele yae; onkhulika nayo aitalama ponthele yolutu lwae. 25 Apakwate ovanthu vamwe, avamono otyivimbi tyakangavala metapalo, nonkhulika itai ponthele yatyo. Ovanthu ovo avanyingila mepunda-umbo omu mukala omuuli ombwale, avapopi etyi vamona.

26 Etyi omuuli wokwakondolele omulume oo ketapalo etyiiva, liwa-liwa apopi okuti: “Oo omunthu wa Huku yotyotyili wehetavelele otyitumino tya Siovaa;+ pahe Siovaa wemupakula konkhulika imuliepo, aimwipaa, ngeetyi Siovaa emupopilile.”+ 27 Apopila ovana vae okuti: “Lingei nawa otyimbulu tyange.” Ngwe avemulingila-tyo nawa. 28 Pahe aende, avasi wankhia, wakangavala metapalo, otyimbulu tyitai ponthele yae nonkhulika. Onkhulika ankho kayemulile-po, nii okulia-po otyimbulu. 29 Omuuli akwata omunthu wa Huku yotyotyili, emupake kotyimbulu, emukondola kepunda-umbo liae vekemulile, avekemupaka. 30 Ngootyo ekemupaka pelangalo liae mwene, avatwalako okulila, otyo vati: “Yeei, yeei mukulu wange!” 31 Etyi vemupaka, apopila ovana vae okuti: “Tyina namankhi, kamphakei pelangalo pana palangala omunthu wa Huku yotyotyili. Omankhipa ange epakei ponthele yomankhipa ae.+ 32 Etyi apopile ankho atumwa na Siovaa, konthele yomutala wovilikutila mo Mbetele, neetyi apopile konthele yonondywo mbokufendela mbo ponomphangu mbukola mbaya peulu+ momapunda-umbo o Samaliya matyifwiswapo.”+

33 Atee umwe etyi ovipuka ovio viamoneka, Selombowau kayekele-po ondyila yae ombi, mahi watwaileko okuholovona ovanakwa movanthu vala ovakwavo+ vakale ovanakwa vo ponomphangu mbukola mbaya peulu. Ankho upaka kounakwa* una wahanda, otyo ati: “Akale umwe povanakwa vo ponomphangu mbukola mbaya peulu.”+ 34 Onkhali oyo yeumbo lya Selombowau+ aiveetela ehanyauno, avanyimwa kombanda yohi.+