Wo Tete Wahonekelwa Ova Kolindu

7 Mahi pahe movipuka evi onwe mwahoneka, hahe vali omulume ahayame komukai, 2 mokonda tyakaka unene etyi tyouhayo wokulihanda,* omulume anepe omukai wae+ mwene, ou omukai anepwe nomulume wae mwene.+ 3 Omulume ape omukai wae etyi ena okupewa, ou omukai nae alinge ngootyo omulume wae.+ 4 Omukai hae utumina olutu lwae, lutuminwa nomulume wae; omulume nae hae utumina olutu lwae, lutuminwa nomukai wae. 5 Pahamone ou utyika mukwavo, nkhwali oputyina mwatomphola nkhele pakale, mulipake vala momalikwambelo, haa amulikondokela vali, opo Satanasi liehemuyondyaile mokwehetyivilile kwenyi okulikondola. 6 Otyo nati vala ndyimupopile, hatile otyo otyitumino. 7 Mahi nahandele ñgeno ovalume aveho vakala ngaame. Mahi tupu munthu na munthu una tyae mwene apewa+ na Huku, ou wapewa ñgaa, ou wapewa ñgaa.

8 Pahe ndyitolela ava vahanepele, vahanepelwe, novahepe, ndyiveti hahe vali vakalele vala ngaame.+ 9 Mahi ine omutima kaveuvilile, opo hahe vanepe, mokonda hahe vali okunepa tyipona okuti okuhanda wahanda pahe ohitakana vala.+

10 Ava vokwanepa ndyivetolela onondunge ombu, hame ndyitola, mahi o Tatekulu, omukai ahayeke-po omulume wae.+ 11 Mahi ine umuyeka-po, akale vala ngootyo ahanepwe, okuti hatyo, velikondokele nomulume wae; omulume ahayeke-po omukai wae.+

12 Ava ovakwavo ndyiveti, ame ndyityipopia ha Tatekulu-ko:+ Ou una omukai wehemutaveli, mahi omukai watyo mwene wahanda okukala nomulume wae, omulume ehemuyeke-po; 13 ou omukai una omulume wehemutaveli, mahi omulume mwene wahanda okukala nomukai wae, omukai ahayeke-po omulume wae. 14 Mokonda omulume wehemutaveli okomukai wae matilwa omusukuki, ou omukai wehemutaveli masukukila omulume wae enae; ine hatyo vala otyo, ñgeno ovana vavo vatiwa vasila, mahi pahe ovasukuki. 15 Mahi ine ou wehemutaveli mwene wahanda okwenda,* opo aye; tyilinge omulume wetyilinga, tyilinge omukai watyo, opo pahe kakutilwe vali, mahi Huku wemwihanena mombembwa.+ 16 Ove mukai, hahahe ulinge vala hamwe uyovola omulume wove?+ Mulume, hahahe ulinge vala hamwe uyovola omukai wove?

17 Mwene munthu na munthu alingile omu apelwa na Siovaa,* aendele omu Huku emwihanena.+ Ame otyitumino otyo ndyityipa aveho mewaneno. 18 Okuti pena umwe wati aluho aihanwa wapita-le ekwendye?+ Opo ahatyopole otyo tyokwaya ekwendye. Okuti pena ou wati tyina aihanwa ankho kenepite ekwendye? Opo ahapite vali ekwendye.+ 19 Okupita ekwendye tyipu-ale, okwahapitile ekwendye natyo tyitupu-ale;+ tyesukisa okutavela ovitumino vya Huku.+ 20 Etyi omunthu ali pokwaihanwa, otyo vala akale ngootyo.+ 21 Etyi waihanwa ankho umupika? Otyo tyehekulinge navi komutima;+ mahi ine watala motyivili okuyovoka, opo yovoka. 22 Mokonda ou waihanenwa mu Tatekulu ngwe ankho omupika, oo pahe o wa Tatekulu wayovoka;+ no ou wati tyina aihanwa ankho hamupika, pahe omupika wa Kilisitu. 23 Onwe mwafetelwa;+ tyiyekei-po tyokukalinga ovapika vovanthu. 24 Etyi omunthu ali pokwaihanwa vanthu vetu, otyo vala akale ngootyo kotyipala tya Huku.

25 Ava pahe nkhele veheneyamwa-le kolutu, ovo ndyitupu otyitumino tya Tatekulu ndyivepa, mahi mandyipopi vala kohalwange+ okuyemba vala kotyili, mokankhenda ka Tatekulu. 26 Ame kohalwange, hahe omulume akale ngootyo, mokwalava kouye watyo ou wepwiya. 27 Okuti ove wakutwa una omukai? Tyiyeka-po tyokwovola okukutuluka.+ Okuti wayovoka utupu omukai? Tyiyeka-po tyokwovola omukai. 28 Mahi mwene ine unepa, kwalingile onkhali. Ine omunthu wasukuka unepa, oo kalingile onkhali. Mahi ngwe ava valinga ngootyo mavelietela. Otyo napopia, okwati vala ndyimulondole.

29 Mahi tupu vanthu vetu ndyimutolele, omuvo wahupa-po kauhi.+ Okuhimbikila hono, ava vena ovakai valinge ngaava vehena-le, 30 ava valila valinge ngaava vahalili, ava vahambukwa valinge ngaava vahahambukilwe, ava valanda valinge ngaava vehena-tyo, 31 ava valia ko viouye, valinge ngaava vehetei ku-o unene; mokonda omukalelo wouye ou uli nokupiluluka. 32 Ame mwene, nahanda muyovoke kotyiho. Omulume wahanepele ulinga vala otyiho no vya Tatekulu, usuka neetyi malingi matyihambukiswa Tatekulu. 33 Ngwe omulume wanepa ulinga otyiho no viouye,+ usuka neetyi malingi matyihambukiswa omukai wae, 34 pahe uli kuvali. Tupu nomukai wahanepelwe, nomuhikwena wehei mukwendye, valinga otyiho novipuka vya Tatekulu,+ vasukuke umwe no molutu, no monondunge. Ngwe omukai wanepwa ulinga otyiho no viouye, usuka neetyi malingi matyihambukiswa omulume wae. 35 Mahi ame ndyimupopila tupu ngootyo, onwe vala nalingila, hatile katyilingwa,* mahi ndyili vala nokumupa ondundo mulinge etyi tyaviuka, muundapele apeho Tatekulu tyahatalukwa.

36 Mahi ine pena umwe wahanepele ulieete okuti tyokwahanepele* tyili vala nokumupa okulinga evi viehevio, ngwe pahe hamona vali wakola-le, opo alinge ñgaa: Etyi ahanda etyilinge umwe; hankhali-ko. Mwene vanepe.+ 37 Mahi ou mwene wetyisoka umwe nawa momutima wae, tyina elitehela mwene katyisukisa okunepa, metyivili umwe okuliyunga, mwene etyisoko umwe momutima wae ati himanepe,* oo otyo malingi tyaviuka.+ 38 Mwene tupu no ou unepa walinga nawa, mahi ou wahanepele walinga vali nawa.+

39 Omukai wanepwa wakutwa tyina nkhele omulume wae ena omwenyo.+ Mahi ine utiko ñgaa omulume wae wakalangala mononkhia, opo ngwe wakutuluka upondola okunepwa no ou ahanda, mahi omu Tatekulu vala.+ 40 Mahi mokusoka kwange, ine ukala vala ngootyo, uhambukwa vali; ame ndyityeete umwe nawa okuti tupu ndyina omphepo ya Huku.