Omukanda wa Vali Ehipululo

18 Seosafaa wakalele nomalumono, nomunkhima omunene,+ mahi velinepelele na Akambe.+ 2 Etyi palamba omanima amwe akapila ku Akambe ko Samaliya.+ Akambe alingila Seosafaa na vana aenda navo otyilikutila, onongi ononyingi nonongombe. Akengelela* Seosafaa opo vaye aveho okukalwisa o Lamote-Sileyande.+ 3 Akambe Ohamba yo Isilayeli apulu Seosafaa Ohamba yo Sundaa ati: “Twenda atuho tukalwise ko Lamote-Sileyande?” Ngwe emukumbulula okuti: “Naame noove twike vala, ovanthu vange no vove veke vala, mavekukwatesako movilwa.”

4 Mahi Seosafaa apopila ohamba yo Isilayeli ati: “Nkhele ovola okunoñgonoka ondaka ya Siovaa.”+ 5 Pahe ohamba yo Isilayeli ayongiya ovauli, vatuuka 400, aivepulu okuti: “Twende tukalwise o Lamote-Sileyande, ine twahaye?” Avakumbulula okuti: “Enda, Huku yotyotyili mevepakula pomavoko ove hamba.”

6 Seosafaa apulu okuti: “Muno mutupu omuuli wa Siovaa?+ Nae tumwovolei tutehelele mwe ondaka ya Huku.”+ 7 Ohamba yo Isilayeli aipopila Seosafaa aiti: “Nkhele pena omulume umwe+ tupondola okupula etyi Siovaa apopia, mahi ame himuhande, kamphopila-le natyike otyiwa, una upopia vala ovivi.+ Utiwa o Mikaiya omona wa Inilaa.” Mahi Seosafaa ati: “Hamba ove kupondola okupopia otyipuka ngootyo!”

8 Ohamba yo Isilayeli aiihana omuundapi umwe wo mombonge, aimupopila okuti: “Kanyauka, kaete Mikaiya omona wa Inilaa.”+ 9 Pahe ohamba yo Isilayeli nohamba yo Sundaa Seosafaa ankho vepumphi, ou upumphi kotyipundi tyae ou upumphi kotyipundi tyae, vavala ovikutu viavo viouhamba, veli potyipale tyikala kombundi yepunda-umbo lyo Samaliya, ovauli aveho veli nokuulila puvo. 10 Sendekiya omona wa Kenaana, elilingila onombinga mbotyivela, ati: “Etyi otyo tyapopia Siovaa, wati: ‘Ove mokavanga* ova Silia nonombinga ombu, ovehanye-ko.’” 11 Ovauli ovakwavo aveho ngatyo vaula ñgoo, avati: “Enda ko Lamote-Sileyande, kwoove mavatili-ko tatekulu;+ Siovaa mevepakula pomavoko ove hamba.”

12 Pahe omutumwa-ndaka wokwakaihanene Mikaiya emupopila okuti: “Ovauli aveho etyi vapopia o tyouwa wohamba. Onondaka mbove mbukale-vo ngo mbavo,+ popia etyi tyayemba kouwa wohamba.”+ 13 Mahi Mikaiya ati: “Natukaila umwe Siovaa una omwenyo, ame mandyipopi vala etyi Huku yange amamphopila.”+ 14 Pahe aende kohamba, ohamba aimupulu aiti: “Mikaiya twenda tukalwise o Lamote-Sileyande, ine twahaye?” Ngwe akumbulula ati: “Enda, kwoove mavatili-ko tatekulu; Mavakapakulwa pomavoko ove.” 15 Ohamba aimupulu aiti: “Tuñgapi ndyina okukwita waane wahamphopile vali natyike, omphopila vala otyili menyina lya Siovaa?” 16 Mikaiya ati: “Ndyeete ova Isilayeli aveho velityandyana monomphunda ngonongi mbehena omunthita.+ Siovaa wati: ‘Vetupu hekulu. Munthu na munthu akondoke keumbo liae nombembwa.’”

17 Ohamba yo Isilayeli aipopila Seosafaa aiti: “Ame hetyipopile-ale okuti kapopi natyike otyiwa tyayemba kwaame, upopia vala ovivi?”+

18 Mikaiya apopi vali ati: “Tehelela ondaka ya Siovaa! Ame namona Siovaa kotyipundi tyae+ nomambamba ae ovita vyo keulu,+ vitai kokulio no kokumbili.+ 19 Siovaa apulu ati: ‘Olie mayondyo Akambe, Ohamba yo Isilayeli opo ende ko Lamote-Sileyande ngako akankhila?’ Atyiti vala ou upopia etyi, ou upopia etyi. 20 Pahe oandyu*+ imwe aiya, aitalama pu Siovaa aiti: ‘Ame mandyimuyondyo.’ Siovaa eipulu ati: ‘Motyilingi ñgeni?’ 21 Ngwe aiti: ‘Mandyende, andyikapaka ondaka yomatutu momulungu wovauli vae aveho.’ Huku ati: ‘Ove momuyondyo, motyivili umwe okumuyondya. Enda, kalinge etyi wapopia.’ 22 Pahe Siovaa wapaka ondaka yomatutu momilungu viovauli vove aveho,+ mahi mwene Siovaa wapopia okuti tatekulu ove momono onkhumbi.”

23 Sendekiya+ omona wa Kenaana afwene pu Mikaiya,+ emuvete nolukuhi kepanda,+ ati: “Ñgaa uhanda okuti ononkhono mba Siovaa mbandyeka-po ambuya okupopila mwoove?”+ 24 Mikaiya emupopila ati: “Ove motyitavela vala monthiki monyingila mondywo yove, okaholama koluhinyi.” 25 Ohamba yo Isilayeli aiti: “Mikaiya mupolei-po apa, mutwalei ku Amoo omunene wo mepunda-umbo, no ku Sowasi omona wohamba. 26 Vepopila uti: ‘Ohamba yati: “Pakei omulume oo mokalavoso,+ amumupa-apa vala katutu ombolo nomaande atee ame ndyikondoka nombembwa.”’” 27 Mahi Mikaiya ati: “Ine ove ukondoka nombembwa, opo nkhwali ha Siovaa-ko wapopia naame.”+ Tupu ati: “Amuho-amuho mutyiivite!”

28 Ohamba yo Isilayeli na Seosafaa ohamba yo Sundaa, avainduka ko Lamote-Sileyande.+ 29 Ohamba yo Isilayeli aipopila Seosafaa aiti: “Mandyiliimbilisa andyiende movilwa, mahi ove vala movikutu viove viohamba.” Ohamba yo Isilayeli ailiimbilisa, avaende movilwa. 30 Ohamba yo Silia yatumine vomatemba ae ovilwa aiveti: “Mwahalwisei vali nawike, tyilinge omunene tyilinge omututu, lwisei vala ohamba yo Isilayeli.” 31 Vomatemba ovilwa vati vala monee Seosafaa, avati: “Ohamba yo Isilayeli oyo una!” Avaviuku kwe vemulwise. Seosafaa aulula onkhu veye vemuhukulule,+ Siovaa emukwatesako, Huku evekondola-ko. 32 Etyi vomatemba ovilwa vetyimona okuti hae-ko ohamba yo Isilayeli, avatalama avehemutaata vali.

33 Mahi omulume umwe ayahe nonkhondyi yae, ohevo aiponyokela* mohamba yo Isilayeli, aimutomena apa pahonyena ovivela viotyikutu tyae tyondyakulilo. Pahe ohamba aipopila omwomboli wetemba liae aiti: “Kondoka, mphole movilwa, navangwa omapita.”+ 34 Ovilwa avitokota unene monthiki oyo, avatalameka ohamba ketemba liae liovilwa onthiki aiho, tyapilukila kova Silia atee lieketaka; tyina likanyingila anyimi.+