Etyi Tyahonekwa na Maluku
3 Anyingila vali mondywo imwe yokufendela, mwali omulume umwe walemana* okuvoko.+ 2 Ngwe ankho veli nokumulava, vatale ine mahakula omulume oo Motyasapalo, opo vamone apa mavakwatelela vemutendeleye. 3 Ngwe apopila omulume wokwakukuta* okuvoko ati: “Katuka, endyu no pokati apa.” 4 Pahe evepulu ati: “Tyasapalo, tyaviuka okulinga-tyi, hahe okulinga otyiwa ine hahe okulinga otyivi, hahe okuhupisa ohande* ine hahe okwipaa?”+ Mahi avahapopi natyike. 5 Aendaisa omaiho okuvetala aveho, okutala omitima viavo viatena vala,+ atyimunumanesa, atyimukala omapita, apopila omulume oo ati: “Tandaveka okuvoko.” Ekutandaveka, okuvoko akuveluka. 6 Ova Faliseu etyi vetyimona, avalupuka-mo, avekelipakaila-mo novalanduli va Helonde,+ vemwipae.
7 Mahi Sesusi aende no kelunga novalongwa vae, ovanthu vamwe ovanyingi vatunda ko Ngalileya no ko Sundeya avemulandula.+ 8 Naava umwe ankho vatunda ko Selusalei, novo ko Indumeya, nova himba lina o Solondau, novo ko Tilu, novo ko Sindone etyi veiva evi eli nokulinga, avemulandula. 9 Ngwe apopila ovalongwa vae vemuviukihile owato onthutu, opo ovanthu vehemuhitikinye. 10 Mokonda ankho uli nokuhakula ovanthu ovanyingi, aveho vavela avemwongelela, ankho vahanda vemuyame vala.+ 11 Naava umwe ankho vena onomphepo onombi,+ vati vala tuki kwe avaikila konongolo aveliyavela, avati: “Ove Umona wa Huku.”+ 12 Mahi pamwe ankho umbukandukila mbehemupopie movanthu.+
13 Alondo komphunda aihana-po ava akoya-po,+ ngwe avai no kwe.+ 14 Puvo aholovona-po* 12, ava tupu aluka okuti ovatumwa. Ovalume ovo, ankho ovo maenda-enda navo, ava ankho matumu vakaivise, 15 ava mape evililo liokutaata ovilulu.+
16 Ovalume ovo 12+ aholovonene* tyati, ou o Simau ou alukile okuti o Petulu,+ 17 oo Tiaku na Swau ovana va Sembendeu (ava ati Mbowanelesi, tyihangununa okuti “Ovana Vomutitimo”),+ 18 o Andelee, o Filipi, o Mbatulumeu, o Mateusi, o Tomee, o Tiaku omona wa Alufeu, o Tandeu, o Simau omu Kanaa,* 19 na Sunda Isikaliyote, ou konyima wemupakulile.
Pahe anyingila mondywo imwe, 20 ovanthu avakongoloka vali aveya, Sesusi novalongwa vae nokulia vala avehetyivili. 21 Etyi ombunga yae vetyiiva, avaende-ko vekemukwate, ankho vati: “Naina hamwe walinga komutwe.”+ 22 Ovahoneki vovitumino vatundile ko Selusalei, navo ankho vati: “Watulwa na Mbelesembu,* utaata tupu ovilulu ononkhono atambula ku mwene wovilulu.”+ 23 Etyi eveihanena pwe, evepopila omuhe, ati: “Oñgeni Satanasi ataata Satanasi? 24 Ine ouhamba ulitepauka, ouhamba oo kaupame;+ 25 ine eumbo limwe lilitepauka, eumbo olio kalitungu. 26 Na Satanasi ine ulipilukila-po, elitepauka, kamapame, opo mehulila. 27 Nawike utyivila okunyingila mondywo yomulume wapama, apolo-mo ovipuka viae, nkhwali nkhele umukuta. Ongootyo vala metyivili okupola ovipuka mondywo yomulume ngo oo. 28 Ame ndyimupopila otyili, ovipuka aviho ovanthu vapengesa vevieevelwa, tyilinge onkhali tyilinge ovipuka vapopia viomutomba. 29 Mahi ou upopia omapita omphepo ikola,+ oo kaevelwa, onkhali yae kaipu.”+ 30 Tyemupopisa ngootyo otyetyi vati: “Una omphepo ombi.”+
31 Pahe mee yae nonondenge mbae aveya,+ avehikila kondye avatumu omunthu ekemwihane.+ 32 Mokonda ankho waongelelwa vala novanthu vepumphi pwe, avemuti vala: “Mee yove uli pondye opo nonondenge mbove, vekwoovola.”+ 33 Ngwe eveti: “Mee yange olie, onondenge mbange ovalie?” 34 Atale ku ava vepumphi vemwoongelela, ati: “Muveete ava! Apa opo pena mee, opo pena onondenge mbange novakulu vange!+ 35 Ou ulinga etyi tyahanda Huku, oo oe ondenge yange, oe omukulu wange, oe omphange yange, haiye o mee.”+