Omukanda wo Tete wa Samuwele
30 Ndaviti novita viae, etyi vehika mo Sikalange+ monthiki ya tatu, avavasi ova Amaleke+ vanyingilile motyilongo kombwelo* no mo Sikalange, vahanya-po o Sikalange aveiyoko. 2 Vatwala koupika ovakai+ novanthu aveho vavasa-mo, okuhimbikila kovatutu atee kovanene vatyo. Avaende navo, mahi avahaipaa-po nawike. 3 Etyi Ndaviti novita viae vehika mepunda-umbo, vavasa aliho liayokwa-po, ovakai vavo novana vavo ovakwendye novakainthu vatyindwa-po vakalinge ovapika. 4 Ndaviti novita viae, avahimbika okulila unene, okulila umwe nononkhono mbatyo mbokulila ambuvepu umwe. 5 Tupu vatyindile-po ovakai vevali va Ndaviti, Ainowa wo ko Sesiliyeli, na Ambingaili omuhepe wa Nambale, wo ko Kalumelu.+ 6 Ndaviti aihamenwa unene, mokonda ovalume aveho* veli nokulipakela-mo vemwiipae nomamanya, vanumana unene mokonda vapeseka kovana vavo ovakwendye novakainthu. Mahi Ndaviti apamena mu Siovaa Huku yae.+
7 Ndaviti apopila omunakwa Ambiyatale+ omona wa Aimeleke okuti: “Mbambavo eta kuno otyikutu tyovanakwa.”+ Ambiyatale aeta otyikutu tyovanakwa ku Ndaviti. 8 Ndaviti apulu ku Siovaa okuti:+ “Okuti kovifwanga oko ndyilandula-ko? Okuti mandyivevasi?” Ngwe ati: “Velandula, movevasi oyovola-ko atyiho vatyinda.”+
9 Liwa-liwa Ndaviti novita viae 600+ avevelandula, etyi vehika Melola lyo Mbesole vamwe ngapo vesala. 10 Ndaviti novita viae 400 otyo vevelandula vala, mahi ovalume vena 200 avesala, mokonda vaponwa unene kavetyivilile okutauluka Elola lyo Mbesole.+
11 Avavasi omu Isitu umwe motyipembe, avemutwala ku Ndaviti. Avemwavela okulia nomeva, 12 notyimbembu tyomungome walingwa nomakuyu, nomingome vivali vialingwa nonombe. Etyi amana okulia akala nononkhono,* wakalele ovitenya vitatu novinthiki vitatu tyahali, nii tyahanu omeva. 13 Pahe Ndaviti emupulu okuti: “Ove uwapi, watunda-pi?” Akumbulula okuti: “Ame ndyi wo ko Isitu, ndyimupika womu Amaleke, mahi palamba-le ononthiki ononthatu tatekulu yange anthya-po mokonda navela. 14 Twakalwisile vo kombwelo* motyilongo tyova Keleta,+ notyilongo tyo Sundaa, no kombwelo* motyilongo tya Kalembe+ atuyoko-po o Sikalange.” 15 Ndaviti emupulu okuti: “Upondola okunthwala kovifwanga ovio?” Ngwe akumbulula ati: “Ine waana menyina lya Huku okuti kumandyipaa, tupu kumamphakula pomavoko a tatekulu yange, mandyikutwala kovifwanga ovio.”
16 Ngootyo atwala Ndaviti atee kovifwanga ovio. Ova Amaleke ankho veliyandyana motyilongo atyiho, otyo valia nokunwa, valinga otyipito mokonda yovipuka ovinyingi vapunda kotyilongo tyova Filisitiya, no tyo Sundaa. 17 Ndaviti ahimbika okuveipaa kombimba atee kokangulohi; nawike wahupile-po,+ pahupile vala 400 vakahatekele nomakamelu. 18 Ndaviti apolo-ko atyiho ova Amaleke vaile natyo+ ayovola-ko ovakai vae vevali. 19 Ahasi-ko natyike, nii omunthu nawike, okuhimbikila komututu atee komunene. Avayovola-ko ovana vavo ovakwendye novakainthu novipuka vapundwa;+ Ndaviti wayovolele-ko atyiho vaile natyo. 20 Ndaviti apolo onongi ambuho nonongombe, omafwalali ae aembupake komutwe wovipako viavo mwene. Ankho vati: “Evi ovipuka Ndaviti apunda.”
21 Ndaviti akondoka komafwalali 200 okwaponenwe unene, aesala konyima, Komulola wo Mbesole.+ Ngwe avelihonyena na Ndaviti na vana Ndaviti ena-vo. Etyi velivasa, Ndaviti apulu ine veli nawa. 22 Mahi, vamwe povalume vena onya, vahasilivila vaile na Ndaviti avati: “Ava mokonda kavaile noonthwe, katuveavela natyike povipuka twapunda. Munthu na munthu mapewa vala omukai wae, novana vae aende.” 23 Ndaviti evepopila okuti: “Vakulu vange, muhalingei ngootyo novipuka Siovaa etwavela. Oe wetuyovola apakula pomavoko etu ovifwanga vietwendela.+ 24 Olie metavela otyipuka otyo mwapopia? Etyi omunthu waile kovilwa mapewa, otyo una wesalele novityuma nae mapewa.+ Ovanthu aveho mavapolelwa povipuka twapunda.”+ 25 Okutuka monthiki oyo, Ndaviti alingi otyipuka otyo tyikale otyitumino nehongolelo ova Isilayeli ankho vena okulandula atee hono.
26 Etyi Ndaviti akondoka ko Sikalange, atumu ovipuka vimwe kovakulu vo mo Sundaa ankho omapanga ae ati: “Etyi otyiawa tyenyi tyatunda* konondyale mba Siovaa.” 27 Atumikisa otyiawa ku vamwe vekahi ko Mbetele,+ no ko Lamote yo ko Nengembe,* no ko Satile,+ 28 no ko Alowele, no ko Sifimote, no ko Esitemowa+ 29 no ko Lakale, no komapunda-umbo oko Selameeli,+ no komapunda-umbo ova Keneu,+ 30 no ko Holomaa,+ no ko Mbolasaa, no ko Atake, 31 no ko Hemboloo,+ no konomphangu ambuho Ndaviti novita viae vakalaile.