Ndaniyele
8 Tyina tyiti menima lya tatu Ohamba Mbelesasale+ ili kovipundi, hono ndyikati ñgaa ndyili memonekelo, ame Ndaniyele, otyo ngootyo tyilandula kweetyi namwene-ale tete.+ 2 Natala ñgaa, memonekelo omo, ndyili ko Susaa*+ mombala yohamba* motyilongo tyo* Elau;+ okutala movililenya omo, ndyili pondongi ko Ulai. 3 Nakatula vala omaiho, tala! ndyikati ñgaa ongi imwe onthwei+ ina onombinga onombali+ itai kondongi. Onombinga mbatyo ombo ononde, mahi imwe onde vali konkhwavo, oyo onde yatyo, oyo yesaililwa okutumba.+ 4 Ndyikati ñgaa ongi oyo iti aiyahe* koutakelo, aiyahe kombanda, aiyahe kombwelo, ovinyama aviho viohika kavivete-ko, itupu-ale omunthu nawike wiivila ayovola etyi yakwata peke.*+ Mwene ilinga vala etyi yahanda, ilipaka-ko.
5 Ndyikati vali ñgaa, tala! onkhombo imwe onthwei+ itundilila koutakelo,* aitauluka ohi aiho mahi tyahaliate pohi. Onkhombo oyo ina ombinga imwe onene-nene pokati komaiho.*+ 6 Aiya, okuviuka umwe vala mongi onthwei yonombinga onombali, ei namona itai kondongi; onkhombo yahateka yeya tyankhia onyengo okuviuka mongi.
7 Tyina ndyiti ñgaa onkhombo iya umwe ifwena kongi, yankhinduka yanumanena ongi. Onkhombo oyo aiti umwe tuu mongi, onombinga mbongi ambuteke, ambuho onombali, ongi ayahavete-mo. Ayuumphula ongi aiitutika-po aiiliata-liata, apahamono ou utyivila okwiiyovola peke liayo.*
8 Pahe, onkhombo oyo onthwei ailipake-ko umwe, mahi etyi onkhombo oyo pahe yalinga umwe onene, kapakalele-ale ombinga onene-nene aiteke-ko. Apa yateka apatumbu onombinga ononkhwana ononene mbatala konomphepo ononkhwana mbeulu.+
9 Mombinga imwe amutumbu vali onkhwavo, onthutu, aikulu ailingi onene, yatala kombwelo no koutundilo,* no Kotyilongo Tyouwa.*+ 10 Aikulu ailingi onene, aihiki kovita vyo keulu* aitokesila pohi omafwalali amwe, nononthungululu mbumwe, ailiata-liata-ko. 11 Ailipake kounene tyahanda umwe ilambe-po Omunene wovita, otyilikutila tyokulingwa apeho,* etyipolwa, omphangu yapakwako yondywo yae ikola, aihanywa-po.+ 12 Ovita vimwe avipakulwa, avipakulilwa kumwe notyilikutila tyokulingwa apeho* kombanda yonkhali; ombinga oyo otyo iyumba-hi otyili ityiyumba pohi, ailipe-tyo, ailingi aityivili.
13 Nkhatehela omukwa-ukola umwe upopia, ou omukwa-ukola omukwavo apulu ou uli nokupopia, ati: “Matyikala-ko atee-pi, etyi tyamoneka movililenya tyotyilikutila tyilingwa apeho,* tyonkhali yeeta ehanyauno,+ omphangu ikola ilinge yokuliatwa-liatwa, nayo novita?” 14 Pahe amphopila ati: “Atee palamba ovinthiki 2.300 nomihuka viatyo; ngwe omphangu ikola maikapindulwa-po umwe aiviuku, aiya umwe apa yali.”
15 Pokuli movililenya omo, andyitale, andyihande-vo ndyityinoñgonoke, ndyikati ñgaa ame Ndaniyele, komutwe wange kutai umwe una olupe lwomulume. 16 Nkhatehela-ko ondaka yomulume, iivalela mondongi mo Ulai,+ aiti: “Ngambiliyeli,+ munoñgonokesa etyi amona.”+ 17 Ngambiliyeli eya na apa ndyitai, ame oku andyitili umwe owoma, andyilipupika-po. Ngwe anthi: “Mona womulume noñgonoka okuti etyi wamona memonekelo omu, matyikalingwa kononthiki mbonthyulilo.”+ 18 Pokuli opo nokupopia naame, ame andyinkhi olumphoki andyilala umwe otyinkhankhula, tyelipupika-po vala. Ngwe andyame, ankhatula, ame andyitalama opo yatyo.+ 19 Amphopila ati: “Mandyikunoñgonokesa etyi matyikamoneka komuvo wonyengo konthyulilo, mokonda evi wamona movililenya omu, mavikalingwa pononthiki mbanakwa mbonthyulilo.+
20 “Ongi onthwei wamona yonombinga onombali, oyo onohamba mbo Mendia no mbo Pelesa.+ 21 Onkhombo onthwei yomasakititi, oyo ohamba yo Ngelesia,+ ombinga onene ili pokati komaiho, oyo ohamba yo tete.+ 22 Ei ombinga yokwateka-po pakatumbuka ononkhwana,+ kuna omauhamba ekwana maakatunda motyilongo tyae aatumina, mahi mononkhono mbae kamaeya.
23 “Konthyulilo youhamba wavo, tyina pahe vokulinga ononkhali evi valinga viamaoyo,* makukatumbuka ohamba imwe ina otyitilisa, inoñgonoka ovipuka viepwiya.* 24 Maikankhimana unene mahi ha-kononkhono mbayo. Maikaeta ehanyauno limwe enene,* etyi yahanda maiketyivila, matyikeyeenda nawa. Maikahanya-ko vokuna ononkhono, novanthu votyilongo tyokuna ovakwa-ukola.+ 25 Mokwatonkhoka kwayo, maikakemba ityivile okulinga etyi yahanda; momutima maikelipaka-ko; omu momuvo wetuliyo,* maikahanya ovanthu ovanyingi. Maikalwisa umwe Nomutumini wovatumini, mahi maikahanywa-ko, mahi kaikahanywa nomavoko omunthu.
26 “Etyi tyapopiwa movililenya tyiyemba kovinthiki nomihuka, otyili, mahi etyi wamona movililenya tyiholeka tyeheivale, mokonda tyipopia evi mavikamonwa vala haa komutwe wandyila.”*+
27 Pahe ndyilitehela nepwila, ame Ndaniyele, andyikala umwe ononthiki tyavela.+ Etyi napinduka, andyikalinga ovilinga viohamba;+ mahi otyo nalimbililwa vala tyovililenya ovio namona, nawike wetyinoñgonokele.+