Susuwee
11 Sambii ohamba yo Hasole tyiivee vala, atumu ondaka ku Sombambi ohamba yo Mandoo+ no kohamba yo Siniloo, no kohamba yo Akisafe,+ 2 no konohamba mbali mofika yonomphunda okwenda no kombanda, no ko vokukala moluhandya* lwokwahula ko Kinelete okwenda no kombwelo, no ko vo ko Sefelaa no vokukala momakolo onomphunda ko Ndole+ vokwahula koutakelo, 3 no kova Kanaa+ vakala koutundilo nova Amoleu+ vakala koutakelo, no kovana va Hete nova Peliseu, no kova Sembusi vakala kofika yonomphunda nova Heveu+ vakala mekolo liomphunda yo Helemoo+ motyilongo tyo Misipaa. 4 Onohamba ombo ambuho, ambukatula ovakwa-vita vamwe ovanyingi-nyingi uti vala oluheke lwo kelunga, nononkhambe ononyingi-nyingi nomatemba ovilwa. 5 Onohamba ombo ambuho ambuhonyo ambulipake kumwe, ambweende ambukaonga onthanda popepi nomeva ko Meloo opo vakalwise ova Isilayeli.
6 Mahi Siovaa apopila Susuwee ati: “Wehevetile owoma,+ tyeetyi muhuka ngoopo mandyivepakula tyankhia kova Isilayeli. Teta omahipa ononkhambe mbavo,+ omatemba avo oepake otupia.” 7 Susuwee novakwa-vita aveho aveveyombela, avevelwisila pomeva ko Meloo. 8 Siovaa evepakula pomavoko ova Isilayeli+ avevelwisa avatili-ko, avevetaata atee ko Sindone+ Onene avekehika atee ko Misilefote-Maii,+ ovovo Kelola lyo Misipaa liahula koutundilo, aveveipaa aveho apahahupu nawike.+ 9 Susuwee evelingi umwe etyi Siovaa emupopila. Atete omahipa ononkhambe mbavo, omatemba avo eepake otupia.+
10 Susuwee akondoka, akanyingila mo Hasole aipaa ohamba yatyo nomutunga,+ ngwe o Hasole oyo yali ombala onene yomauhamba oo aeho. 11 Ovanthu aveho* vali-mo aveveipaa nomutunga, aveho avankhi.+ Kamwesalele natyike tyifima.+ O Hasole eipake otupia. 12 Susuwee anyingila momapunda-umbo aeho onohamba ombo, aipaa-mo onohamba mbatyo ambuho nomutunga.+ Ambuho embwipaa+ umwe ngeetyi Mwisesi omuundapi wa Siovaa atumine. 13 Omapunda-umbo ova Isilayeli vahayokele oo konomphunda vala, pwoo Susuwee wayokele-po vala o Hasole. 14 Momapunda-umbo omo, ova Isilayeli vapundile-mo ovipuka aviho novipako,+ ovanthu aveho vali-mo aveveipaa nomutunga.+ Aveho avankhi, kavasile-mo natyike tyifima.+ 15 Ondaka Siovaa apopilile omuundapi wae Mwisesi, oyo Mwisesi atolelele Susuwee,+ Susuwee ngatyo umwe alinga. Atyiho Siovaa atumine Mwisesi,+ wetyilingile kakambehile-po natyike.
16 Susuwee wanyingilile movilongo ovio aviho evepolo-vio, onofika mbonomphunda, akatoka ko Nengembe+ eipolo-ko, akaya motyilongo atyiho tyo Ngoosei akaya no ko Sefelaa,+ no ko Alambaa,+ ekehika kofika yova Isilayeli yonomphunda no Sefelaa yatyo.* 17 Wahimbikila umwe Komphunda Halake yakaviuka no ko Seili atee ko Mbaale-Ngande,+ Melola lyo Limbanu akatoka Komphunda yo Helemoo.+ Susuwee walwisile onohamba ombo ambuho, ambutili-ko embwipaa. 18 Okutuka apa Susuwee alwisa onohamba ombo atee embwiipaa pakalele ehimbwe. 19 Petupu vali epunda-umbo ekwavo lialingile omphango yombembwa nova Isilayeli ova Heveu vala vokukala mo Simbeau.+ Omakwavo aeho veelwisile aveehanye-ko.+ 20 O Siovaa weveyekele vateneke omitima viavo,+ avalwisa ova Isilayeli opo evehanye-ko, ehevelingi okankhenda.+ Vahanyenwe-ko umwe ngeetyi Siovaa atumine Mwisesi.+
21 Pononthiki opo, Susuwee ahanye-ko vokwatuka mu Anake+ mofika yonomphunda mo Hemboloo no mo Ndembile, no mo Anambe, no mofika aiho yonomphunda yo Sundaa no mofika aiho yonomphunda yo Isilayeli. Susuwee weveipaele-ko, omapunda-umbo avo eehanye-ko.+ 22 Motyilongo tyova Isilayeli kamwesalele omunthu nawike watuka mu Anake.+ Kwesalele vala vo ko Ngasa+ no vo ko Ngate,+ no ko Asindonde.+ 23 Pahe Susuwee atumina otyilongo atyiho ngeetyi Siovaa apopilile Mwisesi.+ Susuwee etyiavela ova Isilayeli atyilingi tyavo, opo aveho velitepaulile-tyo momihoko+ viavo. Otyilongo atyipululukwa-po kovilwa.+