Susuwee

10 Andoni-Sendeke Ohamba yo Selusalei wati vala ivee okuti Susuwee wahanya-po o Ai, o Ai nohamba yatyo+ weilinga ngeetyi alinga o Selikoo nohamba yatyo,+ ava ova Simbeau valinga omphango nova Isilayeli+ vakale nombembwa, pahe vahula kuvo, 2 atili unene owoma,+ mokonda epunda-umbo lyo Simbeau enene unene, likahi ngomapunda-umbo onohamba. Enene vali ko Ai,+ ovalume aveho vakala-mo ovakwa-vita. 3 Andoni-Sendeke ohamba yo Selusalei, atumu ondaka ku Howau ohamba yo Hemboloo,+ no ku Pilau ohamba yo Salemute, no ku Safiya ohamba yo Lakisi, no ku Ndembile ohamba yo Engoloo, ati:+ 4 “Endywei munkhwateseko vakwe, endywei tukalwise o Simbeau, vana kuno vahonya na Susuwee, vahonya nova Isilayeli.”+ 5 Onohamba ombo ononthano mbova Amoleu,+ okuti ohamba yo Selusalei, ohamba yo Hemboloo, ohamba yo Salemute, ohamba yo Lakisi, ohamba yo Engoloo, nambo nomaswalali ambo, avelipake kumwe, avaongo onthanda, valwise o Simbeau.

6 Ovalume vomo Simbeau avatumu ondaka ku Susuwee uli monthanda ko Silingale, avati:+ “Wehetuyeke-vo* tuvapika vove.+ Endyu mbaa, lumbaana! Tuyovole, tukwateseko! Onohamba ambuho mbova Amoleu mbokukala mohika yonomphunda, velipaka kumwe mavetulwisa.” 7 Susuwee akatuka ko Silingale, akatula omafwalali aeho novakwa-vita vokwapama.+

8 Siovaa apopila Susuwee ati: “Wehevetile owoma,+ ame nevepakula kwoove.+ Nawike puvo maveteko kwoove.”+ 9 Susuwee novita viae avatundu ko Silingale avalala nokweenda otyinthiki atyiho, eveyombela. 10 Siovaa evepake membilimbili, avelivomba-vomba, ava ova Isilayeli+ avahimbika okuveipaa, avaipaela ovanthu ovanyingi mo Simbeau, avevetaata atee vekehika motyilondeka tyo ko Mbete-Oloo, otyo veveipaela mondyila atee ko Aseka no ko Makendaa. 11 Pokukahomboka ova Isilayeli, tyina vati motyilondeka tyo ko Mbete-Oloo, Siovaa alokesa ongandavila imwe onene. Avalokwa avankhi, yevelokele atee vekehika ko Aseka. Ongandavila oyo yaipaele vali ovanthu ovanyingi tyipona ava ova Isilayeli vaipaele nomutunga.

12 Monthiki Siovaa atilisa ova Amoleu, onthiki evetilisa kova Isilayeli, Susuwee apopi na Siovaa otyo ova Isilayeli vatala, ati:

13 Ekumbi alitalama, ohanyi ayahasesuka, atee ova Isilayeli vahanya-ko onondyale mbavo. Okuti otyo katyahonekelwe momukanda wa Sasale?+ Ekumbi alitalama pokati-na-kati keulu, alihimama meulu, aliahakanyingila liwa. 14 Nkhele twali kakunekale onthiki nga ina, nii katyapalekele vali. Siovaa weivile ondaka yomunthu,+ mokonda Siovaa ukahi nokulwila-ko ova Isilayeli.+

15 Pahe, Susuwee akondoka konthanda ko Silingale+ novita aviho viova Isilayeli.

16 Pokulwa apa, onohamba ambuho ononthano ambukahomboka, ambukaholama meleva lyo ko Makendaa.+ 17 Susuwee etyiivi okuti: “Onohamba ononthano mbavahiwa meleva lyo ko Makendaa,+ omo mbaholama.” 18 Etyi Susuwee etyiiva, ati: “Eleva liatyo lipatei nomamanya omanene, amupake-po ovalume vayunge-po. 19 Mahi onwe ovanyingi vatyo mwahatalamei. Taatei onondyale mbenyi, velandulei otyo muvevanga.+ Mweheveyekei, vehehike kokunyingila momapunda-umbo avo, Siovaa Huku yenyi wevepakula pomavoko enyi.”

20 Susuwee nova Isilayeli, veveipaele, avapu-po, pahupile vala vamwe vakahombokele avanyingila momapunda-umbo ovimato viokwapama. 21 Ovanthu aveho avakondoka vala nawa ku Susuwee tyehelivetele napeke, avai monthanda yavo ko Makendaa. Nawike welipele ovipuka, apopi* omapita ova Isilayeli. 22 Susuwee ati: “Eleva lina pahe lipatulei, amweeta kuno onohamba ombo ononthano.” 23 Avakapola-mo onohamba ombo ononthano, avembutwala ku Susuwee. Onohamba ombo tyati: Ohamba yo Selusalei, ohamba yo Hemboloo, ohamba yo Salemute, ohamba yo Lakisi, ohamba yo Engoloo.+ 24 Etyi vatwala onohamba ombo ku Susuwee, Susuwee aihana ovalume aveho ova Isilayeli, apopila ononkhalamutwe mbomafwalali aile navo, ati: “Fwenei kuno. Pakei onomphai mbenyi pomakohi onohamba ombu.” Ngwe avafwene-ko, avaliate pomakohi onohamba ombo.+ 25 Pahe Susuwee evetolela okuti: “Mwahatilei owoma, mwahalingei otyiho.+ Kolei omitima, kalei tyapama, etyi otyo Siovaa malingi onondyale mbenyi ambuho mbumulwisa.”+

26 Susuwee aipaa onohamba ombo, embupapela momiti vitano. Ngamo mbuyendyelela, avembupolo-mo vala kekumbi. 27 Tyina ekumbi likanyingila, Susuwee atumu ovanthu vekevepole momiti,+ avekeveyumba meleva vaholamene. Avapate pombundi yatyo nomamanya omanene. Omamanya oo, no hono opo eli.

28 Monthiki omo, Susuwee ateye-po o Makendaa,+ ohamba yatyo eivange nomutunga, novanthu aveho* vakala-mo eveipaa, ahahupisa nawike.+ Ohamba yo mo Makendaa+ eilingi ngeetyi alinga ohamba yo Selikoo.

29 Susuwee atundu ko Makendaa nae nova Isilayeli aveho, aende, akalwisa o Limbina.+ 30 Epunda-umbo olio, nalio Siovaa elipakula peke liova Isilayeli kumwe nohamba yatyo.+ Ova Isilayeli avahanyauna-po epunda-umbo olio, ovanthu aveho* vakala-mo aveveipaa nomutunga, avahahupisa nawike. Ohamba yatyo, aveilingi ngeetyi valinga ohamba yo Selikoo.+

31 Etyi Susuwee atunda ko Limbina nova Isilayeli aveho, akaonga onthanda kohika yo Lakisi,+ eilwisa. 32 O Lakisi Siovaa eipakula peke liova Isilayeli, tyina tyiti monthiki ya vali aveihanye-po. O Lakisi aveihanye-po, aveho vakala-mo aveveipaa nomutunga,*+ avalingi ngeetyi valinga o Limbina.

33 Holau ohamba yo Sesele+ akatula ovita, akakwateseko o Lakisi. Mahi Susuwee eiipaa, aipaa novanthu vatyo aveho, apahahupu nawike.

34 Etyi Susuwee atunda ko Lakisi nae nova Isilayeli aveho, akaonga onthanda mohika yo Engoloo,+ eilwisa. 35 Monthiki yatyo omo, veihanyene-po, ovanthu vatyo aveveipaa nomutunga. Avevelingi ngeetyi valinga ko Lakisi.+

36 Etyi Susuwee atunda ko Engoloo nova Isilayeli aveho, aende ko Hemboloo,+ eilwisa. 37 Aveihanye-po, avahanye-po nonosandyala mbatyo, ohamba yatyo* aveiipaa nomutunga, novanthu vatyo aveho, avahahupisa-mo nawike. Etyi valinga o Engoloo, ngatyo valinga ovanthu aveho* vakala-mo, avevehanye-ko.

38 Etyi pahe Susuwee atunda oko, aende kohika yo Ndembile+ nova Isilayeli aveho, eilwisa. 39 Avahanye-po epunda-umbo olio, avahanye-po nonosandyala mbatyo, ohamba yatyo aveiipaa nomutunga, aveho* vakala-mo navo aveveipaa,+ ahahupisa nawike.+ Etyi alinga o Hemboloo no Limbina nohamba yatyo, ngatyo alinga o Ndembile nohamba yatyo.

40 Susuwee wahanyene-ko ohika aiho yo konomphunda, o Nengembe, no Sefelaa,+ nonofika mbokuli momakolo onomphunda, nonohamba mbatyo ambuho, ahahupisa nawike. Atyiho tyifima, wetyihanyene-ko,+ ngeetyi atuminwe+ na Siovaa Huku yova Isilayeli. 41 Susuwee wahanyene onofika ombo, okuhimbikila ko Kande-Mbalaneya+ atee ko Ngasa,+ notyilongo atyiho tyo Ngoosei+ atee ko Simbeau.+ 42 Susuwee wakatukile vala like, akwata onohamba ombo ambuho, ahanye-po ovilongo viatyo, mokonda, o Siovaa Huku yova Isilayeli walwililile-ko ova Isilayeli.+ 43 Pahe, Susuwee akondoka nova Isilayeli aveho monthanda ko Silingale.+