Omukanda wo Tete Onohamba

12 Lombowau aende ko Sikei mokonda ova Isilayeli aveho vaile ko Sikei+ opo vekemulinge ohamba.+ 2 Etyi Selombowau omona wa Nembate etyiiva (nkhele ankho uli ko Isitu, waile-nkholo mokonda yohamba Salomau akakala ko Isitu),+ 3 avatumu okukemwihana. Selombowau nova Isilayeli aveho avaende ku Lombowau, avati: 4 “Tate yove walemesile okanga yetu.+ Mahi ine ove upepukisa ovilinga tate yove alemesile, nokanga yalema* atenthekele ku onthwe, opo matukulingila.”

5 Evekumbulula okuti: “Endei, nga pakala ononthiki ononthatu amuya kuno.” Ovanthu avaende.+ 6 Ohamba Lombowau akapula kovakulu* vapakaililemo tate yae Salomau etyi nkhele ena omwenyo. Evepulu ati: “Nkhele nkhwatesei-ko, oityi mandyikumbulula ovanthu ava?” 7 Avemukumbulula okuti: “Tatekulu ine hono ulinga omuundapi wovanthu ava, olingi etyi vekwiita oveavela ekumbululo likahi nawa, apeho mavakala-kala ovaundapi vove.”

8 Mahi ehetavela etyi apakelwa-mo novakulu,* akaovola ovakwendye, omakula ae, pahe valinga ovakwatesiko vae.+ 9 Evepulu ati: “Nkhele nkhwateseiko, oñgeni matukumbulula ovanthu ava, vati: ‘Pepukisa okanga tate yove etutentheka’?” 10 Ovakwendye ovo omakula ae, avemupopila okuti: “Ovanthu ovo vokwekupopila okuti: ‘Tate yove walemesa okanga yetu, tatekulu ipepukisa,’ vepopila uti: ‘Ame mandyiilemesa vali tyipona etyi tate alinga.* 11 Tate wemupakele okanga yalema, mahi ame mandyiilemesa vali. Tate wemumonesile ononkhumbi nongola, mahi ame mandyimulingi-tyo nongola yomankhwenya.’”

12 Atyiti na Selombowau novanthu aveho avaende ku Lombowau monthiki ya tatu, aveketavela kohamba yevepopilile okuti: “Kondokei kuno nga palamba ononthiki ononthatu.”+ 13 Mahi ohamba aivekumbulula omapita, ohamba Lombowau waanya etyi apakelwa-mo novakulu.* 14 Alandula etyi ovakwendye vemupopila ati: “Tate walemesa okanga yenyi, mahi ame mandyiilemesa vali. Tate wemumonesile ononkhumbi nongola, mahi ame mandyimumonesa ononkhumbi nongola yomankhwenya.” 15 Mahi ohamba ayehetavela etyi ovanthu vapopia, mokonda etyi tyili nokulingwa o Siovaa+ wetyilinga, tyaenda ngootyo opo onondaka Siovaa atumine Aiya+ omu Silo, apopilile Selombowau omona wa Nembate mbufwiswepo.

16 Etyi ova Isilayeli aveho vetyimona okuti ohamba kayetavelele, ovanthu aveho aveipopila avati: “Ku Ndaviti onthwe tupolako-tyi? Komona wa Sesee, onthwe tutupu-ko epingo! Onwe va Isilayeli kondokei kovika-huku vienyi! Ove Ndaviti, mwene pahe yunga eumbo liove.” Ova Isilayeli aveho avakondauka komaumbo avo.*+ 17 Mahi Lombowau atwalako okutumina ova Isilayeli vakala momapunda-umbo o Sundaa.+

18 Pahe Lombowau evetumu Handolau+ omuyungi wo vokuundapa movilinga vialema, mahi ova Isilayeli avemwiipaa nomamanya. Ohamba Lombowau avelama ketemba liae liovilwa, akaholama ko Selusalei.+ 19 Ova Isilayeli avatyitukila-po+ eumbo lya Ndaviti atee na hono.

20 Etyi ova Isilayeli aveho vetyiiva okuti Selombowau wakondoka, avemwihanena apa ovanthu aveho veliongiya, avemulingi ohamba mo Isilayeli.+ Petupu nawike wakwatesileko eumbo lya Ndaviti, ovomuhoko wa Sundaa+ vala.

21 Etyi Lombowau ehika ko Selusalei, liwa-liwa akongo ovanthu aveho veumbo lya Sundaa, no vomuhoko wa Mbesamii, omafwalali 180.000 okwalongeswa nawa* movilwa vaye vakalwise veumbo lya Isilayeli na vakondole ouhamba ku Lombowau omona wa Salomau.+ 22 Pahe ondaka ya Huku yotyotyili aiya ku Semaiya+ omunthu wa Huku yotyotyili aiti: 23 “Popila omona wa Salomau, Lombowau, ohamba yo Sundaa, nae nova Isilayeli aveho veumbo lya Sundaa, no lya Mbesamii novanthu ovakwavo uti: 24 ‘Etyi otyo tyapopia Siovaa wati: “Mwahakalwisei vakwenyi mulilandula navo, ova Isilayeli. Munthu na munthu una okukondoka keumbo liae, mokonda ame netyilinga.”’”+ Ngwe avetavela ondaka ya Siovaa, avakondoka komaumbo avo, ngeetyi Siovaa evetolela.

25 Selombowau apameka* epunda-umbo lyo Sikei,+ motyilongo tyonomphunda mbo Efalaii, ngako akala. Konyima atundu ko Sikei apameka* epunda-umbo lyo Penweli.+ 26 Selombowau elipopila okuti: “Pahe ouhamba maukondoka meumbo lya Ndaviti.+ 27 Ine ovanthu ava vatwalako okwenda ko Selusalei,+ vakaave ovilikutila kondywo ya Siovaa, omutima wovanthu ava maukondoka ku tatekulu yavo Lombowau ohamba yo Sundaa. Mavandyipaa avakondoka ku Lombowau ohamba yo Sundaa.” 28 Ohamba aikaita ko vokumupakaila-mo, etyi vemupakaila-mo, ailingi ononthane onombali mboolu,+ aipopila ovanthu okuti: “Tyimupwilisa unene okwenda ko Selusalei. Isilayeli, Huku yenyi wokwemupola kotyilongo tyo Isitu oyou.”+ 29 Apake onthane imwe yoolu ko Mbetele,+ onkhwavo eipake ko Ndaa.+ 30 Otyo atyilingisisa ovanthu okulinga onkhali,+ ankho vaya atee ko Ndaa opo vakafende onthane yoolu ankho ikala-ko.

31 Atungu onondywo mbokufendela ponomphangu mbukola mbokwaya peulu, aholovona ovalume povanthu ankho vehe-vomuhoko wa Levii+ opo vakale ovanakwa. 32 Selombowau tupu alingi otyipito monthiki 15 yohanyi ya tyinana, tyelifwa notyipito ankho tyilingwa mo Sundaa.+ Komutala atungile ko Mbetele+ ankho ulingila-ko ovilikutila ononthane atungile; ko Mbetele aholovona ovanakwa vaundape konomphangu mbukola mbokwaya peulu ombu atungile. 33 Monthiki 15 yohanyi ya tyinana, mohanyi aholovonene, ahimbika okulinga oviawa komutala atungile ko Mbetele. Alingila otyipito ovanthu vo Isilayeli, alondo komutala opo alinge oviawa, novilikutila viokutunda omwihi.