Omukanda wa Vali Ehipululo
13 Menima 18 Ohamba Selombowau eli kovipundi, Ambiya akala ohamba yo mo Sundaa.+ 2 Watuminine omanima etatu mo Selusalei. Ina utiwa o Mikaiya,+ omona wa Uliyeli wo ko Simbeaa.+ Pokati kavo ovo Ambiya na Selombowau pakalele ovilwa.+
3 Nthiki imwe, Ambiya aende kovilwa novita vina 400.000, ovakwa-vita vokwapama valongeswa nawa.*+ Selombowau aonganeka ovita viae vina 800.000 vokwalongeswa nawa,* ovakwa-vita vokwapama. 4 Ambiya atalama komphunda Semalaii ikala konomphunda mbo ko Efalaii, ati: “Ove Selombowau, nova Isilayeli aveho, nthehelelei. 5 Onwe kamutyii okuti Siovaa Huku yo Isilayeli, waavela Ndaviti, novana vae ouhamba wo Isilayeli,+ opo ukale wavo apeho,+ alingi omphango yomongwa?*+ 6 Mahi, Selombowau+ omona wa Nembate omupika wa Salomau omona wa Ndaviti, wakatukilile tatekulu yae emutyitukila-po.+ 7 Ovalume vokwehena ovilinga, vahasilivila, avahulu kwe. Vapama vali ku Lombowau omona wa Salomau, mokonda Lombowau omona, kapamene, kaveteleko.
8 “Pahe onwe mwati hamwe mutyivila okulwisa ouhamba wa Siovaa uli pomavoko ovana va Ndaviti, mokonda vala onwe muvanyingi muna ononthane mboolu Selombowau alinga mbulinge ono huku mbenyi?+ 9 Hanwe-ko mwataata ovanakwa va Siovaa,+ vokwatuka mu Alau, novana va Levii, amuliovolela ovanakwa venyi mwene ngeetyi tyilinga ovanthu vovilongo ovikwavo?+ Omunthu wameya* nondume-tane, nonongi epandu-vali ononthwei, upondola okukala omunakwa wovilolo vihe-no-huku. 10 Mahi onthwe, Huku yetu o Siovaa,+ katwemuyekele-po. Ovanakwa vetu, vokwatuka mu Alau vekahi nokulinga ovilinga vya Siovaa, ovana va Levii vevekwatesako movilinga ovio. 11 Ngwe vekahi nokulingila Siovaa ovilikutila viokuyokwa ononthiki ambuho komuhuka no kongulohi,+ nombao yanika nawa.+ Onombolo mbotyiawa,+ mbuli komesa yoolu yakangulwa. Apeho kongulohi+ vatemesa okandiyelo okalaale koolu+ nonolamba mbatyo, mokonda onthwe tukahi nokufwisapo ovilinga twapewa na Siovaa Huku yetu. Mahi onwe mwemuyeka-po. 12 Pahe talei! Huku yotyotyili una onthwe, ukahi nokutuhongolela, novanakwa vae vatyinda ononkhwino, opo vahike opo tumulwise. Onwe valume vo Isilayeli, muhalwisei Siovaa Huku yovakwaukulu venyi, kamamutyivili!”+
13 Mahi Selombowau waonganeka ovalume vamwe opo vevekalele monyima. Selombowau novita viae veli komutwe wo va Sundaa, mahi ovakwavo veli monyima yavo. 14 Etyi ovalume vo Sundaa valeuka vakati ñgana, ovita vimwe vili komutwe wavo, ovikwavo vili monyima. Avahimbika okuliyava ku Siovaa+ otyo ovanakwa vahika ononkhwino. 15 Ovalume vo Sundaa, avaulula onkhwo yovita. Etyi ovalume vo Sundaa vaulula onkhwo yovita, Huku yotyotyili apakula Selombowau no Isilayeli aiho ku Ambiya no Sundaa. 16 O Isilayeli aitili ko Sundaa, Huku evepakula pomavoko avo. 17 Ambiya novalume vae, avaipaa ovanthu ovanyingi, apankhi ovalume 500.000 vokwalongeswa nawa* vo Isilayeli. 18 Pononthiki opo ovalume vo Isilayeli avakundiswa, mahi ovalume vo Sundaa vapamene vali, mokonda vayumbile onthumbi* mu Siovaa, Huku yovakwaukulu vavo.+ 19 Ambiya atwala-ko okulwisa Selombowau, emupolo omapunda-umbo amwe: O Mbetele+ nonofika mbayo,* no Sesana nonohika mbayo, no Efalaii+ nonofika mbayo. 20 Selombowau kapindaulile-po vali outumini wae pononthiki mba Ambiya. Konyima, Siovaa emuvange, ankhi.+
21 Mahi Ambiya apame vali unene. Mokweenda kwononthiki anepe ovakai 14,+ atyiti ovana 22 ovakwendye, novakainthu 16. 22 Ovipuka ovikwavo vihipulula Ambiya, neetyi alingile, neetyi apopile, viahonekwa movihonekwa viomuuli* Indu.+