Omukanda wa Vali Ehipululo
28 Akasi+ wali nomanima 20 etyi akala ohamba, atumina omanima 16 mo Selusalei. Kalingile etyi tyaviuka komaiho a Siovaa, ngeetyi tyalingile Ndaviti he-mbwale yavo.+ 2 Mahi, waendelele monondyila mbonohamba mbo Isilayeli,+ atee umwe alingila Mbaale ovilolo viotyivela.*+ 3 Tupu walingile omwihi wovilikutila Melola Liomona wa Hinoo,* ayoko ovana vae,+ okulandula oviso vitoyesa viovanthu Siovaa ataatele,+ otyo ova Isilayeli vatala. 4 Tupu wapakulile ovilikutila, alingila ovilikutila viokutwima ponomphangu mbukola mbaya peulu+ no kovipunda no mombwelo yomiti aviho viokwavinda.+
5 Mokonda yotyo, Siovaa Huku yae, emupakula pomavoko ohamba yo Silia.+ Avemutilisa, avatwala ononkhwatwa ononyingi ko Ndamasiku.+ Tupu apakulwa pomavoko ohamba yo Isilayeli, yokwemulwisile, aiipaa ovanthu ovanyingi. 6 Monthiki ike vala, Peka+ omona wa Lemaliya, aipaa ovalume aveho vokwapama vena 120.000 vomo Sundaa, mokonda ankho vayeka-po Siovaa Huku yovakwaukulu vavo.+ 7 Sikili, eswalali liova Efalaii, aipaa Maaseya omona wohamba, na Asilikau onkhalamutwe yombala,* na Elekana omunene wa vali motyilongo, okulandula kohamba. 8 Ova Isilayeli tupu vakwatele vana velilandula navo vena 200.000, ovakai, novana ovakwendye, novakainthu. Tupu avapundu ovipuka ovinyingi, avevitwala ko Samaliya.+
9 Omuuli umwe wa Siovaa utiwa o Ondende, ankho nae opo-eli. Akahonyenena nomafwalali ankho ekahi nokuhika ko Samaliya, evepopila okuti: “Talei! Siovaa Huku yovakwaukulu venyi, wanumanena o Sundaa, otyo evepakulila pomavoko enyi.+ Mahi onwe mweveipaa nonyengo onene yehika keulu. 10 Pahe onwe muhanda ovanthu vo Sundaa novo Selusalei vakale ovapika venyi.+ Okuti noonwe ngootyo kamwapengesile ku Siovaa Huku yenyi? 11 Pahe nthehelelei, amukondola ononkhwatwa mwapola ku vana mulikwai navo, mokonda onyengo onene ya Siovaa ili kombanda yenyi.”
12 Omaswalali amwe ova Efalaii, Asaliya omona wa Seowanaa, na Mbelekiya omona wa Mesilemote, na Seisikiya omona wa Saluu, na Amasa omona wa Handilai, avahonyenena no vokutunda kovilwa, 13 avevepopila okuti: “Mwahaetei kuno ononkhwatwa, matuvelwa onombei na Siovaa. Etyi muhanda okulinga matyiyawisa kononkhali mbetu, atuvelwa vali onombei, ngwe ononkhali mbetu ononene-ale, o Isilayeli yanumanenwa-le unene.” 14 Omaswalali okwamaneka, aapakula ovapika, nevi vapunda,+ kovakwatesiko vohamba no kovanthu aveho. 15 Ovalume vokwatumbulwa omanyina pokwatumwa, avapolo ononkhwatwa ombo ambuho, ava vokwahavalele, avapewa ovikutu, avevevaleka. Tupu aveveavela ononkhaku, nokulia, nokunwa, nomulela wokuwava. Ava vokwaponwa aveveveleka kovimbulu, avevetwala ku vana velikwai navo ko Selikoo, epunda-umbo liomindende. Pahe avakondoka ko Samaliya.
16 Pononthiki opo, Ohamba Akasi waitile konohamba mbo Asilia mbumukwateseko.+ 17 Ova Endoo avaululila vali mo Sundaa, aveilwisa, avakwata ovanthu, avaende navo. 18 Ova Filisitiya+ tupu valwisile epunda-umbo lyo Sefelaa,+ no Nengembe mo Sundaa, avapolo-ko o Mbete-Seme,+ no Aisaloo,+ no Sendelote, no Soko nonofika mbayo,* no Timinaa+ nonofika mbayo, no Siso nonohika mbayo, ngamo vakala. 19 Siovaa akundisa o Sundaa kombanda ya Akasi ohamba yo Isilayeli, mokonda kayungile nawa o Sundaa, avayeke-po okukala ovakwatyili ku Siovaa.
20 Tilingate-Pilunesele,+ ohamba yo Asilia ehemukwatesako, mahi eya okumulwisa, emweetela ovitateka.+ 21 Akasi wavakele mondywo ya Siovaa, no meumbo liohamba,*+ no momaumbo ovakwatesiko vohamba, atwaila ohamba yo Asilia. Mahi otyo, katyemukwatesileko. 22 Mokweenda kwononkhumbi mbae, ohamba Akasi aivilipo vali okuhakala omukwatyili ku Siovaa. 23 Ahimbika okwaava ovilikutila kono huku mbo ko Ndamasiku,+ vokwemutilisile,+ ati: “Mokonda ono huku mbonohamba mbo Silia mbevekwatesako, mandyiave ovilikutila kono huku ombo, opo naame mbunkhwateseko.”+ Mahi, ono huku ombo, mbapundukisile o Isilayeli aiho, nae mwene. 24 Akasi tupu waongiyile ovityuma viondywo ya Huku yotyotyili. Anyanyauna ovityuma viondywo ya Huku yotyotyili,+ aiki omapito ondywo ya Siovaa,+ elilingila omitala viovilikutila pomavindi* aeho o Selusalei. 25 Momapunda-umbo aeho o Sundaa, walingile-mo onomphangu mbokwaya peulu opo alingile ono huku ononkhwavo omwihi wovilikutila,+ aleve Siovaa, Huku yovakwaukulu vae.
26 Ovipuka ovikwavo vimupopia, neetyi alingile, okuhimbikila konthyimbi atee konthyulilo, viahonekwa Momukanda Wonohamba mbo Sundaa no mbo Isilayeli.+ 27 Pahe Akasi akapululukwa-po nonombwale mbavo, avekemupaka mepunda-umbo, mo Selusalei, mokonda kavemutwaile komaendo onohamba mbo Isilayeli.+ Isekiya, omona wae emupingi kovipundi.