Omukanda wa Vali Ehipululo
35 Sosiya walingilile Siovaa Opasikwa+ mo Selusalei, ovipako viovilikutila Viopasikwa+ aviipawa monthiki 14 yohanyi yo tete.+ 2 Aholovona ovanakwa, evepake povilinga viavo, eveavela ondundo opo vafwisepo ovilinga viavo mondywo ya Siovaa.+ 3 Pahe, apopila vokwatuka mu Levii, ovalongesi vo Isilayeli aiho,+ ovakwa-ukola va Siovaa, ati: “Otyikasa tyikola, tyipakei mondywo yatungwa na Salomau omona wa Ndaviti,+ ohamba yo Isilayeli. Onwe kamamutyityinda-tyinda vali potyipepe.+ Pahe lingilei Siovaa Huku yenyi, novanthu vae, ova Isilayeli. 4 Lifwiikei ngeetyi mwatepaulwa ovikundyi momaumbo ovoho, amulandula etyi tyahonekwa na Ndaviti+ Ohamba yo Isilayeli, na Salomau omona wae.+ 5 Kalei lutai momphangu ikola, amulionganeka ovikundyi-ovikundyi okutalela komihoko viovanthu aveho,* vana mulikwai navo, momaumbo ovoho. Movikundyi aviho muna okukala otyikundyi tyike tyomuhoko wa Levii. 6 Ipaei ovipako viovilikutila Viopasikwa,+ amulisukukisa, amutelekela-ko vana mulikwai navo, opo vafwisepo etyi Siovaa apopilile Mwisesi.”
7 Sosiya aavela-ko ovanthu aveho ankho veli-po oviawa Viopasikwa, onongi novinkhombo 30.000, nonongombe 3.000. Oviawa ovio aviho, viapolelwe polumono lwohamba.+ 8 Ovakwatesiko vae, navo vaavelele-ko ovanthu aveho, novanakwa, no vokwatuka mu Levii otyiawa tyihakuluminywa. Hilikiya,+ na Sakaliya na Seyeli, ononkhalamutwe mbondywo ya Huku yotyotyili, vaavelele ovanakwa ovipako viovilikutila Viopasikwa vina 2.600, nonongombe 300. 9 Konaniya na vana elikwai navo, Semaiya, na Netaneli, kumwe na Hasambiya, na Seyele na Sosambande ononkhalamutwe mbo vokwatuka mu Levii, vaavelele-ko vokwatuka mu Levii ovipako viotyilikutila Tyopasikwa vina 5.000, nonongombe 500.
10 Ovipuka aviho avionganekwa, ovanakwa, no vokwatuka mu Levii movikundyi viavo,+ avaende ponomphangu mbavo, ngeetyi ohamba ankho yatuma. 11 Avaipaa ovipako viovilikutila Viopasikwa,+ ovanakwa ankho vanyanya ohonde vapewa no vokwatuka mu Levii,+ putyina vayuva ovinyama.+ 12 Konyima, avaonganeka nawa ovilikutila viokuyokwa opo vevitepaulile ovanthu aveho vatepaulwa ovikundyi okutalela komaumbo ovohe, opo ovilikutila vipakulwe ku Siovaa, ngeetyi tyahonekwa momukanda wa Mwisesi. Tupu ngatyo valinga onongombe. 13 Avateleka* otyiawa tyo Pasikwa potupia, ngeetyi ankho tyilingwa-le.+ Avateleka oviawa vikola momilindi, no movihayo no monombiya, avatwaila liwa-liwa ovanthu. 14 Konyima, avelitelekela-ko okulia Kwopasikwa, tupu avatelekela-ko ovanakwa, mokonda vokwatuka mu Alau vatwaileko okwaava ovilikutila viokuyokwa, novilenga atee kongulohi. Ngootyo, vokwatuka mu Levii avelitelekela-ko okulia Kwopasikwa, tupu avatelekela-ko ovanakwa vokwatuka mu Alau.
15 Vokwimba, ovana va Asafe,+ ankho veli ponomphangu mbavo, ngeetyi tyatumine Ndaviti,+ na Asafe,+ na Hemaa na Sendutuu+ omutali wohamba. Vokuyunga konombundi, ankho veli konombundi.+ Ankho kavesukisile okusa-po ovilinga viavo, mokonda vana velilandula navo, vokwatuka mu Levii, ankho vevetekela-ko-ale okulia Kwopasikwa. 16 Monthiki oyo, avamane okwonganeka ovipuka aviho Siovaa ankho ahanda vilingwe Popasikwa,+ nokulinga ovilikutila komutala wovilikutila wa Siovaa, ngeetyi ankho tyatuma ohamba Sosiya.+
17 Ova Isilayeli avalingi Opasikwa pononthiki opo, Notyipito Tyonombolo Mbahapakelwe Onkhiso mononthiki epandu-vali.+ 18 Tundee pononthiki mbomuuli Samuwele, kakunelingwe Opasikwa ngooyo. Tupu mo Isilayeli kamunekale ohamba yalingile Opasikwa ngeei yalingilwe na Sosiya,+ kumwe nova Isilayeli, novanakwa, no vokwatuka mu Levii, novanthu aveho ankho veli-po vakala mo Sundaa, nomo Isilayeli, nomo Selusalei. 19 Opasikwa oyo, yalingilwe menima 18 lioutumini wa Sosiya.
20 Konyima yovipuka ovio aviho, etyi Sosiya aviukisa ondywo ya Huku,* Neku+ Ohamba yo Isitu, akatuka opo akalwile ko Kalekemisi, ikala konthele yo Eufalate. Sosiya akatuka opo ekemulwise.+ 21 Neku atumu ovatumwa-ndaka vekemupopile okuti: “Oityi ove uhanda, hamba yo Sundaa? Hono, ame heile okulwa noove, mahi neya okulwa neumbo ekwavo, Huku wati ndyina okukanyauka. Lityilika okulwisa Huku wahula kwaame, opo ehekuvange.” 22 Mahi Sosiya ahakondoka-ko, eliimbilika+ opo ekemulwise. Ketavelele onondaka mba Neku ankho mbatunda momulungu wa Huku. Ngootyo, aende, ekemulwisila Moluhandya lwo Mesitu.+
23 Vokuyaha nononkhondyi, avayahe Ohamba Sosiya, ohamba aipopila omafwalali ayo, okuti: “Pano mpholei-po, navangwa unene.” 24 Omafwalali ae, aemupolo ketemba, aemupake ketemba liae lya vali liovilwa, avemutwala ko Selusalei. Sosiya anyimi, avekemupaka meendo liovakwaukulu vae,+ o Sundaa aiho no Selusalei avemulili unene. 25 Selemiya+ aimbi otyiimbo tyokulila Sosiya. Aveho vokwimba, tyilinge ovalume tyilinge ovakai,+ vatwalako okutumbula Sosiya monongengeya mbavo* atee hono. Akutiwa mbuna okwimbwa mo Isilayeli, onongengeya ombo mbahonekwa.
26 Ovipuka ovikwavo vihipulula Sosiya, nevi alingile nolwembia olunene, mokutavela etyi tyahonekwa Movitumino vya Siovaa, 27 neetyi alingile okuhimbikila konthyimbi atee konthyulilo, viahonekwa Momukanda Wonohamba mbo Isilayeli no mbo Sundaa.+