Omukanda wo Tete Onohamba

10 Onkhai-hamba yo ko Sambaa, yeivile omunkhima Salomau akalele nao menyina lya Siovaa,+ aende-ko ekemulole nomapulo epwilisa* unene.+ 2 Ehiki novaundapi vae ovanyingi+ ko Selusalei, nomakamelu atyinda omulela wombasamu,+ noolu onyingi-nyingi, nomamanya omawa. Eya ku Salomau emupopila atyiho ena-tyo momutima. 3 Salomau akumbulula omapulo ae aeho. Petupu natyike tyepwilisile* ohamba.

4 Etyi onkhai-hamba yo ko Sambaa yamona ounongo wa Salomau,+ nondywo atunga,+ 5 novikulia viae, novaundapi vae tyina vapumphama, novilinga vilingwa no vokupaka okulia ko mesa,+ novikutu vavala, no vokupaka ovikunwa komesa, novilikutila viokuyokwa alinga apeho mondywo ya Siovaa, aihuvu unene.* 6 Apopila ohamba okuti: “Atyiho neiva kotyilongo tyange konthele yovilinga viove,* nounongo wove naina otyili umwe. 7 Mahi netavela vala kweetyi neiva, etyi neya, andyilitalela-ko nomaiho ange mwene. Tala! Etyi vantholela kavetyipopile atyiho, tyotyili kavamphopilile nii vala otyinthimbu. Etyi namona, tyilamba-po unene pweetyi neiva konthele yove, tyilinge mounongo tyilinge molumono. 8 Ovanthu vove, novaundapi vove vena ehambu mokonda apeho vekahi ponthele yove otyo vatehelela ounongo wove!+ 9 Siovaa Huku yove ankhimanekwe,+ una wekuhambukilwa, ekupake kotyipundi tyoutumini wo Isilayeli. Mokonda Siovaa una olwembia luhapu nova Isilayeli, wekunaka ukale ohamba maitumina nouwa nouviuki.”

10 Ayiavela ohamba onotalendu 120* mboolu, nomulela+ omunyingi-nyingi wombasamu, nomamanya+ omawa. Motyilongo kamuneetwe vali omulela wombasamu ulifwe pu una onkhai-hamba yo ko Sambaa yaetelele Ohamba Salomau.

11 Omutete wonombapolo mba Hilau, mbokutyinda oolu okwipola ko Ofili,+ tupu mbapolele ko Ofili omavai+ omanyingi omusandalu nomamanya omawa.+ 12 Ohamba ailingi onondyako mbondywo ya Siovaa nomavai oo omusandalu, no mbondywo* yohamba, novisandyi, novihumba viovaimbi.+ Nawike vali wetyeetele omavai omusandalu nga ana, nii okwemona vala, atee onthiki yo hono.

13 Ohamba Salomau tupu waavelele onkhai-hamba yo ko Sambaa, atyiho ihanda, neetyi yaitile, ayawisa-ko vali ovikwavo emupa vala otyali.* Pahe onkhai-hamba yo ko Sambaa akondoka kotyilongo tyae novaundapi vae.+

14 Oolu Salomau apewa nima-na-nima, ipeyala onotalendu 666,+ 15 tyahavalula ei itunda kovalandesi, no kolukulu lwovakwa-vitanda, no konohamba ambuho mbova Alambe, no kovatumini votyilongo.

16 Ohamba Salomau alingi onondyakulilo 200 ononene mboolu+ yahonyaikwa (ondyakulilo ike ilema onosikulu* 600 mboolu)+ 17 nonondyakulilo 300 ononthutu* mboolu (ondyakulilo ike ilema onomina* ononthatu mboolu). Ovipuka ovio ohamba aivipake Mondywo yo Kotyiteta tyo Limbanu.+

18 Ohamba tupu ailingi otyipundi tyoutumini+ nomayo ondyamba, aityihoto noolu yakangulwa nawa.+ 19 Opo uhike potyipundi tyoutumini, pena ondondelo ina omatyeko epandu, kutyo kuna omwombelo weliseta elola; pokupumphamena pena ovipuka viokuyaka omavoko, vina ovilolo viononkhulika.+ 20 Komatyeko epandu kuna ononkhulika 12, ketyeko like kuna onombali-onombali, ike-ike kononthele. Petupu ouhamba nawike una otyipundi tyoutumini nga tyina.

21 Omalufo aeho Ohamba Salomau, oolu. Ovityuma aviho vyo Mondywo yo Motyiteta tyo ko Limbanu,+ tupu ovioolu yakangulwa nawa. Mutupu otyipuka natyike tyopalata, mokonda pononthiki mba Salomau+ opalata kaisilivila. 22 Ohamba ina onombapolo mbo ko Talisi+ mbuundapela kumwe no mba Hilau melunga, onombapolo mbo ko Talisi mbweta like momanima etatu oolu, nopalata, nomayo ondyamba,+ no nonthyima, no nopavau.

23 Ohamba Salomau wali vali omuhona,+ wali omunongo+ tyipona onohamba ambuho kombanda yohi. 24 Ovanthu aveho kombanda yohi vaovola* Salomau vatehelele ounongo wae Huku apaka momutima wae.+ 25 Aveho ankho vemweetela ovipuka vialingwa nopalata, noolu, nomivalo, noviti viokulwa, nomulela wombasamu, nononkhambe, no nomula. Nima na nima ankho otyo valinga.

26 Salomau atwalako okulipakela omatemba omanyingi ovilwa nononkhambe.*+ Wali nomatemba 1.400 ovilwa nononkhambe* 12.000. Ovipuka ovio wevipakele momapunda-umbo omatemba ovilwa mo Selusalei, popepi nohamba.+

27 Ohamba yaongiyile opalata noolu mo Selusalei, aikake unene ngomamanya. Tupu yaongiyile unene omavai omisendulu, aakake unene ngomikuyu vyo mo Sefelaa.+

28 Ononkhambe mba Salomau ankho mbutunda ko Isitu. Ovakwa-vitanda vohamba ankho valanda ononkhambe ononyingi* motyifwe tyike.+ 29 Omatemba ovilwa aeho atunda ko Isitu, like lilanda onopalata 600, onkhambe ike ilanda onopalata 150. Ngwe ankho vembutuma konohamba ambuho mbova Hete+ no mbova Silia.