Omukanda Wa Vali wa Samuwele
21 Kwakalele ondyala onene+ kononthiki mba Ndaviti omanima etatu. Ndaviti apulu Siovaa, Siovaa emukumbulula okuti: “Saulu no vomeumbo liae ovo vavelwa onombei mbohonde, mokonda yetyi aipaa ova Simbeau.”+ 2 Ohamba aihana ova Simbeau+ aitomphola navo. (Ova Simbeau ankho hava Isilayeli mahi ankho ova Amoleu+ vokwahupa-po. Ova Isilayeli ankho valingile omphango yokuti maveveevela,+ mahi Saulu mokonda yombili ankho ena novanthu vae ova Isilayeli nova Sundaa, aovola okwipaa ova Simbeau.) 3 Ndaviti apulu ova Simbeau okuti: “Oityi ndyina okumulingila, oityi mandyilingi tuyovoke konkhali oyo, opo muyambe epingo lya Siovaa?” 4 Ova Simbeau avakumbulula okuti: “Otyitateka tyetu na Saulu no vomeumbo liae ha tyopalata noolu,+ nii katupondola okwipaa nawike mo Isilayeli.” Ngwe evepopila okuti: “Etyi mwamandyiti, otyo mandyilingi.” 5 Ngwe avapopila ohamba okuti: “Omulume wokwetwipaa-ko apange okutunyima-ko motyilongo atyiho tyo Isilayeli,+ 6 twavele-vo ovana vae epandu-vali. Onthwe matuyendyelesa ovivimbi viavo momuti*+ ko Simbeaa+ ya Saulu omulembulwa wa Siovaa, otyo Siovaa atala.”+ Ohamba aiti: “Mandyimwavela-vo.”
7 Mahi, ohamba aikala nokankhenda na Mefimbosete,+ omona wa Sonataa, Sonataa omona wa Saulu mokonda yomphango Ndaviti valingile na Sonataa+ omona wa Saulu, otyo Siovaa atala. 8 Ohamba aipolo Alumoni na Mefimbosete, ovana vevali va Lisipa+ omona wa Aiyaa vakutula na Saulu, novana vetano va Mikale*+ omona wa Saulu vakutula na Andiliyeli,+ Andiliyeli omona wa Mbalasilai omu Meolaa. 9 Evepakula kova Simbeau ngwe avayendyelesa ovivimbi viavo momiti komphunda otyo Siovaa atala.+ Aveho epandu-vali avankhila kumwe; vaipawa pononthiki mbo tete mbokuteya, pokuteya osevata. 10 Lisipa+ omona wa Aiyaa apolo otyinyanga etyiyale konkhanda, ngako akala, okuhimbikila pokuteya atee ombila yahimbika okuloka ovivimbi ovio avilokwa, ngwe kayekele oviila vilapele-ko komutenya nii ovinyama viohika vifweneko kounthiki.
11 Avapopila Ndaviti etyi Lisipa omona wa Aiyaa onthawa ya Saulu alingile. 12 Ndaviti akapola-ko omankhipa a Saulu no a Sonataa omona wa Saulu, ankho ena ovatumini vo* ko Sambesi-Sileyande.+ Ononkhalamutwe ombo mbavakele omalutu avo kopalasa yo ko Mbete-Saa, oku ova Filisitiya veeyendyelesile etyi vaipaela Saulu ko Silimbowa.+ 13 Akaeta-ko omankhipa a Saulu no a Sonataa omona wa Saulu tupu aongiya omankhipa ovalume vokwaipaelwe.*+ 14 Avakapaka omankhipa a Saulu no a Sonataa omona wae ko Sela motyilongo tyo Mbesamii,+ melangalo lya Kisi,+ tate ya Saulu. Etyi vamana okulinga atyiho ohamba yevetumine, Huku eivi omalikwambelo avo, valingila otyilongo.+
15 Apakala vali ovilwa pokati kova Filisitiya nova Isilayeli.+ Ndaviti nomaswalali ae avaende, avakalwisa ova Filisitiya, mahi Ndaviti epwila unene. 16 Umwe po vomuhoko wova Lefaii+ utiwa o Isimbi-Mbenombe, una eonga liotyitasu lilema onosikulu 300,*+ ankho wamaneka omutunga omupe, ankho uhungi kokwipaa Ndaviti. 17 Liwa-liwa Ambisai+ omona wa Seluya, ahukulula Ndaviti,+ avange omu Filisitiya emwipaa. Ovakwa-vita va Ndaviti avaane, avemupopila okuti: “Tatekulu ove kumeya-aya vali noonthwe movilwa,+ opo okandiyelo ko Isilayeli kahanyime!”+
18 Etyi pakala, avakalwisa vali ova Filisitiya+ ko Ngombe. Pononthiki opo Simbekai,+ omona wa Husaa aipaa Safe, wokwatuka mova Lefaii.+
19 Avakalwisa vali ova Filisitiya+ ko Ngombe, Elanaa omona wa Saale-Olengii omu Mbelei aipaa Ngoliya omu Ngate ankho una eonga lina omupii ukahi ngomuti wo vokutunga.*+
20 Apakala vali ovilwa ko Ngate. Omo mwali omulume umwe omunene-nene, una ominwe 6 komavoko, nominwe 6 konomphai. Ominwe viae aviho vina 24. Nae watukile mova Lefaii.+ 21 Ahimbika okukwela ova Isilayeli.+ Otyo Sonataa, omona wa Simei+ velikwai na Ndaviti, emwipaelele.
22 Aveho ovo vekwana o vomuhoko wa Lefaii vo ko Ngate. Vaipaelwe na Ndaviti nomafwalali ae.+