Okutunda
21 “Evi ovitumino vionomphela ove una okuvepopila:+
2 “Ove ine ulanda omupika omu Hembeleu,+ una okukuundapela omanima epandu, menima lya pandu-vali ayovoka mahi ahafete natyike.+ 3 Ine weya aike, akondoke aike. Okuti omulume una omukai, aye nomukai wae. 4 Ine tatekulu yae umwavela omukai, akutula ovana ovakwendye ine ovakainthu, omukai novana mavakala va tatekulu yae, ngwe aende aike.+ 5 Mahi ine omupika uti: ‘Ame ndyihole tatekulu yange, nomukai wange, novana vange; hahandele okuyovoka,’+ 6 hekulu emutwale ku Huku yotyotyili. Emufweneke pepito ine pomuhingo wepito, omuhona wae emutiuula kokutwi notyitungo, alingi omupika omwenyo wae auho.
7 “Ine omulume umwe ulandesa omona wae omukainthu akakale omupika, kamayovolwa ngeetyi omupika womulume ayovolwa. 8 Ine hekulu kemuhandele ehemulingi onthawa yae, upondola okumuyeka alandwe-po,* mahi ehemulandesa kononthunda-vilongo, mokonda kakalele omukwatyili kwe. 9 Ine umunepesa omona wae, una yokumulinga ngatyina omona wae omukainthu. 10 Ine unepa omukai omukwavo, kapondola okutepula kovipuka tembo yeumbo apewa,+ okulia, novikutu, nokwenda mondywo yae.* 11 Ine ovipuka ovio vitatu kevipewa, omukai upondola okuyovoka ahafete natyike.
12 “Una wamavete otyipute omunthu atyimwipaa, nae una okwipawa.+ 13 Mahi ine wetyilinga motyiponyo, Huku yotyotyili etyiyeke, mandyimwavela omphangu oku ena okukaholama.+ 14 Ine omulume umwe unumanena unene mukwavo emwipaela tyawina,+ omulume oo una okunkhia, nga kala-kala umwe pomutala wange wovilikutila kemupole-po.+ 15 Una wamavete he, hamwe avete ina, aipawe.+
16 “Ine umwe uvaka omunthu,+ emulandesa, hamwe avasiwa unae,+ aipawe.+
17 “Ou uteyela he onkhano,* hamwe ateyela ina onkhano, aipawe.+
18 “Ovanthu vevali okulwa, umwe avete mukwavo nemanya, hamwe onosoko,* mahi ahankhi, akala vala moula, una okulingwa ñgaa: 19 tyina wokwavetwa etyivila okupinduka-po, aendela kotyimuti okwenda kondye yeumbo, wokwemuveta wayovoka. Memufete vala ononthiki akala tyahaende kovilinga viae etyi otyipute tyae tyiheneveluke.
20 “Ine omulume umwe uvanga omupika wae omulume ine omukai, omupika anyimi, una okukondolelwa etyi alinga omupika wae.+ 21 Mahi ine ukala nomwenyo onthiki ike hamwe onombali, tatekulu yae kapondola okutyikondolelwa, mokonda omupika oo walandwa nonombongo mbae.
22 “Ine ovalume valwa avapumu omukai umwe omulemi, apululukwa otyo ononthiki mbae mbehenehike-po,*+ mahi ehelivete unene, una wemupuma una okufeta etyi omulume womukai oo aita; afete etyi vokuteta onomphela vamanake.+ 23 Ine pakala ononkhia, wokwaipaa nae una okwipawa,+ 24 ine wapola-mo eiho nae una okupolwa-mo eiho, okuti eyo nae eyo, okuti okuvoko nae okuvoko, okuti omphai nae omphai,+ 25 okuti wemupisa nae una okupiswa, okuti wemuveta otyipute nae una okuvetwa otyipute, okuti wemupuma nae una okupumwa.
26 “Ine omulume umwe wapola eiho omupika wae omulume ine omukai, una okumuyeka ende mokonda yeiho liae.+ 27 Ine utokesa eeyo liomupika wae omulume ine omukai, una okumuyovola mokonda yeeyo liae.
28 “Ine onthwei iyaha omunthu umwe omulume ine omukai, omunthu oo anyimi,+ onthwei oyo ina okutyopwa nomamanya ainkhi, ohitu yatyo kaipondola okuliwa; mahi hekulu yonthwei mayovoka. 29 Mahi ine onthwei oyo iyaha-le ovanthu, hekulu avemulondola mahi eheikutu, onthwei oyo aiipaa omunthu omulume ine omukai, onthwei oyo ina okutyopwa nomamanya ainkhi, hekulu nae aipawa. 30 Ine wiitwa afete opo ayovoke,* una okufeta atyiho aitwa opo ayovole omwenyo wae.* 31 Ine onthwei itoma* omona omukwendye ine omukainthu, hekulu yonthwei nae o ngootyo ena okukoyeswa. 32 Ine onthwei itoma omupika omulume ine omukai, hekulu yonthwei mafete onosikulu* 30 ku hekulu yomupika, onthwei yatyo aityopwa nomamanya, ainkhi.
33 “Ine omulume umwe una onyombo yahahondyelwe, ine hamwe aheye onyombo eheihondyo, amutokela onthwei hamwe otyimbulu, 34 hekulu yonyombo una okufeta.+ Una okufeta hekulu yotyipako, otyipako tyatyo atyilingi tyae. 35 Ine onthwei yomunthu umwe itoma ya mukwavo, yokwatomwa ainkhi, vena okulandesa yokuñgwai, aveliyapulila onombongo mbatyo; tupu vena okuliyapulila yokwankhia. 36 Mahi ine tyiiwa-le okuti onthwei yae itoma ononkhwavo, hekulu eheikutu, una okwifeta nonthwei onkhwavo, ei yokwankhia ailingi yae.