Omukanda wo Tete Ehipululo
17 Etyi Ndaviti pahe akala-le mondywo* yae, apopila omuuli Nataa+ okuti: “Tala, ame ndyikala mondywo yatungwa nomisendulu+ mahi otyikasa tya Siovaa tyomphango tyili mekaka.”+ 2 Nataa apopila Ndaviti okuti: “Atyiho wasoka momutima wove tyilinga, mokonda Huku yotyotyili una ove.”
3 Motyinthiki tyatyo otyo, Huku apopila Nataa okuti: 4 “Enda kapopile omuundapi wange Ndaviti okuti: ‘Etyi otyo tyapopia Siovaa wati: “Have-ko motungu ondywo omu mandyikala.+ 5 Ame hinekale mondywo naike, tundee monthiki naeta kuno ova Isilayeli atee hono. Mahi natwalako okukala monohinge no momakaka okufendela.*+ 6 Mokweenda kwononthiki naenda no Isilayeli aiho, pena onthiki imwe napulile umwe povakoyesi vo Isilayeli naavela otyilinga tyokulisa ovanthu vange okuti: ‘Omokonda yatyi mwahanthungilile ondywo yomisendulu?’”’
7 “Pahe popila omuundapi wange Ndaviti okuti: ‘Etyi otyo tyapopia Siovaa womambamba ovita, wati: “Ame nekupola kounthita, monyima yonongi, opo ukale omutumini wovanthu vange ova Isilayeli.+ 8 Ame mandyikala noove akuho wenda nako,+ andyinyimi-ko* onondyale mbove ambuho komutwe wove;+ mandyilingi enyina liove likale nomunkhima omunene, enyina lielifwa no liomanene atyo kombanda yohi.+ 9 Mandyiovolela omphangu ovanthu vange ova Isilayeli, ngapo ndyivepaka. Mavakakala momphangu oyo, natyike matyikevetyopola; onondingavivi kamambuvemonesa vali ononkhumbi* ngeetyi mbevelingile kohale,+ 10 okuhimbikila monthiki naholovona ovakoyesi vovanthu vange ova Isilayeli.+ Mandyikatilisa onondyale mbove ambuho.+ Tupu ndyikupopila okuti: ‘Siovaa mekekutungila ondywo.’*
11 “‘“Tyina ononthiki mbove mbamehiki konthyulilo oende kovakwaukulu vove, mandyikakatula ombuto yove,* umwe povana vove,+ andyikapameka ouhamba wae.+ 12 Oe makanthungila ondywo,+ ame andyikapameka otyipundi tyae tyoutumini atyitwala-ko atee-tee.+ 13 Ame mandyikakala tate yae, ngwe akakala omona wange.+ Himayeke-po okukala nolwembia olunene nae,+ ngeetyi nayekele-po okukala nolwembia olunene na una ove wapinga koutumini.+ 14 Mandyikemupaka mondywo yange no kouhamba wange apeho.+ Outumini wae maukakala-ko apeho.”’”+
15 Nataa apopila Ndaviti onondaka ombo ambuho, nemonekelo liatyo aliho.
16 Ohamba Ndaviti anyingila apumphama elipetamena ku Siovaa, ati: “Ame, ame-lie Siovaa Huku? Eumbo liange pahe eumbo patyi, etyi undingila ovipuka ovio aviho?+ 17 Tyehe-otyo vala Huku yange, wamphopila okuti eumbo liomuundapi wove malitwala-ko atee komutwe wandyila.+ Siovaa Huku, ove unthala ngatyina ndyimunthu una okunkhimanekwa unene.* 18 Oityi vali ame Ndaviti omuundapi wove ndyipondola okukupopila konthele yomunkhima umpha, tyina mwene ove wii nawa omuundapi wove?+ 19 Siovaa, mokonda yomuundapi wove neetyi wasoka momutima wove,* walinga ovipuka evi aviho ovinene, mokwahololola ounene wove.+ 20 Siovaa, kutupu nawike ulifwe pu ove.+ Kutupu vali Huku omukwavo, ove vala.+ Ovipuka aviho tweiva nomakutwi etu, vityilekesa nawa. 21 Okuti kombanda yohi kuna vali ovanthu votyilongo tyimwe vekahi ngovanthu vove ova Isilayeli?+ Huku yotyotyili weveyovola, vakale ovanthu vae.+ Welilingila enyina mokwalinga ovipuka ovinene vitilisa owoma,+ etyi wataata ovanthu vovilongo, otyo ovanthu vove wayovola ko Isitu vetyilwete.+ 22 Walinga ovanthu vove ova Isilayeli vakale vove atee-tee.+ Ove Siovaa wakala Huku yavo.+ 23 Pahe Siovaa, omulao walinga omuundapi wove neumbo liae, ukale wotyotyili apeho, ove linga umwe ngeetyi wapopia.+ 24 Enyina liove litwaleko,* linkhimanekwe+ apeho, opo ovanthu vapopie okuti: ‘Siovaa womambamba ovita, Huku ya Isilayeli, o Huku ya Isilayeli.’ Eumbo liomuundapi wove Ndaviti likale tyapama komaiho ove.+ 25 Huku yange, ove waholololela omuundapi wove omphango yove yokumutungila ondywo.* Otyo omuundapi wove akalela nonthumbi yokulinga elikwambelo eli kwoove. 26 Siovaa, ove, ove Huku yotyotyili, walaa okulingila omuundapi wove ovipuka ovio oviwa. 27 Hambukilwa okuyamba eumbo liomuundapi wove litwaleko atee-tee komaiho ove, mokonda weliyamba nawa Siovaa. Malitwalako okuyambwa atee-tee.”