Omukanda wo Tete Ehipululo
29 Ohamba Ndaviti apopila ewaneno aliho okuti: “Omona wange Salomau, ou Huku akoya,+ nkhele omututu, kei nawa ovipuka,*+ ngwe otyilinga otyinene, mokonda ondywo* maitungwa ha yomunthu-ko, mahi o ya Siovaa Huku.+ 2 Nalinga ononkhono mbokwonganeka ovipuka viokutunga ondywo ya Huku yange. Naonganeka oolu yokulinga ovipuka vioolu, nopalata yokulinga ovipuka viopalata, novitasu viokulinga ovipuka viovitasu, novivela viokulinga ovipuka viovivela,+ nomavai+ okulinga ovipuka viomavai, nomamanya o onikisi, nomamanya omawa unene, noumanya wokwaunda-unda wokuhiviswa, nomamanya omawa, nomamanya o alabastru omanyingi-nyingi. 3 Mokonda nahambukilwa unene ondywo ya Huku yange,+ ndyikahi nokwaava omalumono ange mwene,+ oolu nopalata, vikale viondywo ya Huku yange, opo ndyiyawise kovipuka naonganekela ondywo ikola. 4 Tupu ndyikahi nokwava onotalendu* 3.000 mboolu yo ko Ofili,+ no notalendu 7.000 mbopalata yakangulwa nawa yokusolongolola ovimato vionondywo, 5 nokulinga ovipuka vilingwa noolu, no viokulingwa nopalata, novipuka aviho mavilingwa novanongo. Pahe, olie hono meliaave, aetela Siovaa otyiawa?”+
6 Onohongoi, nononkhalamutwe mbomihoko vya Isilayeli mbovityita ekwii, no mbotyita,+ no vokuhongolela ovilinga viohamba,+ aveliave. 7 Avaave onotalendu 5.000 mboolu, nono ndaliku* 10.000, nonotalendu 10.000 mbopalata, nonotalendu 18.000 mbovitasu, nonotalendu 100.000 mbovivela viovilinga viondywo ya Huku yotyotyili. 8 Una ankho wokuna omamanya omawa, eeave, aakala kolumono lwondywo ya Siovaa, ankho luyungwa na Seyeli+ watuka mu Seleso.+ 9 Ovanthu aveho avahambukilwa okwava oviawa ovio, mokonda ankho vekahi nokwavela Siovaa nomutima auho,+ ohamba Ndaviti tupu ahambukwa unene.
10 Ndaviti ahilivika Siovaa komaiho ewaneno aliho. Ndaviti ati: “Siovaa, Huku yo Isilayeli, tate yetu, hilivikwa apeho-apeho. * 11 Siovaa, ounene owove,+ nevililo,+ nouwa, nomunkhima, noukulami,*+ mokonda atyiho tyili keulu no kombanda yohi, otyove.+ Siovaa,+ ouhamba owove, ove Umutwe wa aveho. 12 Omalumono nomunkhima vitunda kwoove,+ ove utumina atyiho.+ Pomavoko ove pena ononkhono+ nevililo,+ tupu pena evililo liokunkhimaneka,+ nokupameka aveho.+ 13 Pahe, Huku yetu, onthwe tukupandula, tuhilivika enyina liove ewa.
14 “Pahe, ame, ame-lie? Ovanthu vange ovalie, opo tukulingile oviawa evi? Ovipuka aviho vitunda kwoove, tukwavela vala evi vitunda pomavoko ove. 15 Komaiho ove, onthwe tunonthunda-vilongo, tunongendi, ngeetyi tyali ovakwaukulu vetu aveho.+ Mokonda ononthiki mbetu kombanda yohi mbukahi vala ngokahi,+ tutupu ekevelelo. 16 Siovaa Huku yetu, omalumono aa aeho twaongiya opo tutunge ondywo inkhimaneka enyina liove likola, atunda pomavoko ove, atyiho otyove. 17 Huku yange, ame ndyityii nawa okuti, ove utala nawa momutima,+ uhambukilwa ouviuki.*+ Ame na ava ovipuka evi aviho, nomutima wange auho,* ndyihambukwa unene tyina ndyitala ovanthu ava aveho vekahi nokwava ovipuka viavo tyihakuluminyinwe. 18 Siovaa Huku ya Ambalayau, na Isake na Isilayeli, ovakwaukulu vetu, eyembelo eli liovanthu vove, nomalusoke avo, vikalesa momitima viavo, oviukisa omitima viavo kwoove.+ 19 Omona wange Salomau, mwavela omutima wafwapo*+ opo aendele movitumino viove,+ no momalondolo ove, etavela ehongolelo liove, na alinge ovipuka ovio aviho, atungu ondywo* yove naonganekela ovipuka evi.”+
20 Ndaviti apopila ewaneno aliho okuti: “Pahe hilivikei Siovaa, Huku yenyi.” Ewaneno aliho alihimbika okuhilivika Siovaa, Huku yovakwaukulu vavo, avaikila konongolo avelipetamena ku Siovaa no kohamba. 21 Monthiki yalandula-ko, avatwalako okulinga ovilikutila ku Siovaa, nokulingila Siovaa oviawa viokuyokwa.+ Avaave onondume-tane 1.000, nonongi ononthwei 1.000, nonondyona 1.000, noviawa viatyo viovikunwa.+ Avalingila o Isilayeli aiho ovilikutila ovinyingi.+ 22 Monthiki yatyo oyo, valile, avanu nehambu enene+ komaiho a Siovaa. Avavialeka otyivali Salomau omona wa Ndaviti kouhamba, avemulembulila komaiho a Siovaa akala omutumini,+ tupu avalembula Sandoke akala omunakwa.+ 23 Salomau apumphama kotyipundi tyoutumini tya Siovaa,+ apingi Ndaviti tate yae kouhamba. Ovipuka aviho avimweende nawa, ova Isilayeli aveho ankho vemutavela. 24 Ononkhalamutwe ambuho,+ novakwa-vita vokwapama,+ novana aveho Vohamba Ndaviti,+ avetavela kohamba Salomau movipuka aviho. 25 Siovaa akalesa Salomau omunene mo Isilayeli aiho, emwavela omunkhima omunene, uhenekale nohamba naike mo Isilayeli tundee kohale.+
26 Ngootyo, Ndaviti omona wa Sesee watuminine o Isilayeli aiho. 27 Mo Isilayeli watuminine-mo,* omanima 40. Mo Hemboloo watuminine-mo omanima 7,+ mo Selusalei watumine-mo omanima 33.+ 28 Wankhia tyekula unene,+ tyakululuka mokonda wakalele nomwenyo omule,* nomalumono, nomunkhima. Omona wae Salomau, emupingi kouhamba.+ 29 Ehipululo liohamba Ndaviti, okuhimbikila konthyimbi atee konthyulilo, liahonekwa movihonekwa viomutali Samuwele, no viomuuli Nataa,+ no viomutali Ngande,+ 30 kumwe nouhamba wae, nounene wae, novipuka aviho viamonekele momwenyo wae, no wova Isilayeli, no momauhamba ovilongo ovikwavo.