Omukanda wo Tete Onohamba
17 Iliya*+ omu Tisimbee, ukala ko Sileyande,+ apopila Akambe okuti: “Na Siovaa umwe una omwenyo, Huku yo Isilayeli ou ndyiumbila,* kamakukala eyombo nii ombila mokweenda kwomanima ano, nkhwali oputyina vala ndyiituma!”+
2 Iliya atambula ondaka ku Siovaa yati: 3 “Tunda pomphangu apa, enda no koutundilo, okaholama Komulola wo Kelite,* koutundilo wo Solondau. 4 Ove mokanwa omaande mokandongi, ame mandyikatuma omakwaila ekwavele okulia.”+ 5 Liwa-liwa aende alingi ngeetyi ondaka ya Siovaa yapopia; aende akakala Komulola wo Kelite,* koutundilo wo Solondau. 6 Omakwaila ankho emwetela ombolo nohitu komuhuka, aemwetela vali ombolo nohitu kokangulohi, omaande ankho unwa mokandongi.+ 7 Mahi etyi pakala, okandongi akakukuta+ mokonda ankho ombila kaikahi nokuloka motyilongo.
8 Pahe atambula ondaka ku Siovaa yati: 9 “Enda liwa-liwa no ko Salefaa, kotyilongo tyo Sindone, ngako ukala. Mandyitumu omuhepe umwe ukala-ko ekwavele okulia.”+ 10 Ngootyo, aende ko Salefaa. Etyi ehika kombundi yepunda-umbo, avasi omuhepe umwe ukahi nokutiava ononkhwii. Ngwe emwihana, ati: “Mbambavo mphevo katutu omaande molufo ndyinwe.”+ 11 Pweetyi ankho omukai ekahi nokwenda akapole omaande, emwihana emupopila okuti: “Mbambavo ndyetelele-vo nokambolo.” 12 Omukai apopi okuti: “Na Siovaa umwe una omwenyo, Huku yove, ndyitupu ombolo, ndyina vala okahinde kehehi keyula vala peke kekahi momulindi omunene, nokamulela kehehi kekahi mokamulindi.+ Ndyikahi nokutiava ononkhwii ndyende keumbo ndyikateleke okakulia ndyilie nomona wange. Oko, oko vala okakulia matuli, nga kapwa-po matunkhi.”
13 Iliya emupopila okuti: “Wahatile owoma. Enda keumbo, linga ngeetyi wapopia. Mahi tete pola etyi una-tyo ondingila-po ombolo, ondyetela. Pahe, haa okateleka-po okakulia moli nomona wove. 14 Mokonda Siovaa Huku yo Isilayeli wati: ‘Ohinde momulindi omunene kamaipu-mo, omulela mokamulindi kamautongoloka-mo, atee onthiki Siovaa malokesa ombila kombanda yohi.’”+ 15 Aende alingi ngeetyi Iliya emupopila; omukai oo, nomuuli, nombunga yae avakala nokulia ononthiki ononyingi.+ 16 Ofinde momulindi omunene ayahapu-mo, omulela mokamulindi auhatongoloka-mo, ngeetyi Iliya apopile etyi atumwa na Siovaa.
17 Konyima omona womukai oo avele, ouvela wae auvilipo unene anyimi.*+ 18 Omukai apopila Iliya okuti: “Oityi nekulinga tatekulu,* munthu wa Huku yotyotyili? Weya meumbo liange unthyinangelese ononkhali mbange, oipaa omona wange?”+ 19 Ngwe emupopila okuti: “Omona mweta kuno.” Emukwate komavoko, emutyindi-po aende no keulu liondywo, emutwala no mondywo omu ankho ehikila emulangeka koula wae.+ 20 Iliya eliyave ku Siovaa ati: “Ove Siovaa Huku yange,+ okuti waetela ononkhumbi omuhepe oo, ngwe oe wanthambula meumbo liae?” 21 Pahe elipupika kombanda yomona tutatu eliyave ku Siovaa ati: “Siovaa Huku yange, mbambavo, omwenyo womona oo umukondokele.”* 22 Siovaa atehelela etyi Iliya emwita;+ omwenyo womona aumukondokela,* akala vali nomwenyo.+ 23 Iliya akwate omona, atuluka nae keulu liondywo okwenda no kondywo ya ina, emupakula ku ina. Iliya apopi okuti: “Tala! Omona wove una omwenyo!”+ 24 Omukai apopila Iliya okuti: “Pahe netyimona okuti ove umunthu wa Huku,+ ondaka upopia yatunda ku Siovaa, oyotyili.”