Omukanda wo Tete wa Samuwele
19 Konyima, Saulu apopila omona wae Sonataa, novaundapi vae aveho olusoke lwae lwokwipaa Ndaviti.+ 2 Mokonda omona wa Saulu Sonataa ankho uhole unene Ndaviti,+ emupopila okuti: “Tate wahanda ove unkhie. Muhuka komuhuka lunguka; ovola oku moende nako, okaholama. 3 Ame mandyende na tate, na tyina eya komphangu oku ove ukahi, mandyiya nae. Mandyipopi na tate konthele yove, ine ndyina etyi ndyiiva, mandyikupopila-tyo.”+
4 Pahe Sonataa apopila-ko nawa Ndaviti+ ku Saulu, tate yae. Emupopila okuti: “Tatekulu hamba, wahalinge natyike omuundapi wove Ndaviti mokonda kekulingile onkhali naike, ovipuka Ndaviti alinga viekwetela ouwa. 5 Wayumbilehi omwenyo wae* akaipaa omu Filisitiya,+ Siovaa wakwatesako ova Isilayeli aveho okutilisa ova Filisitiya.* Ove wetyimwene, ohambukwa unene. Ngootyo, omokonda yatyi mokwatela onkhali yokwipaesa Ndaviti, wahalingile natyike?”+ 6 Saulu etavela etyi apopilwa na Sonataa aane, ati: “Na Siovaa umwe una omwenyo, kamaipawa.” 7 Konyima Sonataa aihana Ndaviti emupopila ovipuka ovio aviho. Pahe Sonataa atwala Ndaviti ku Saulu, ahimbika vali okuundapela Saulu ngeetyi alingile potete.+
8 Etyi pakala, avakala vali novilwa. Ndaviti aende okukalwa nova Filisitiya, eveipaa ovanyingi-nyingi, ova Filisitiya vamwe avakahateka.
9 Siovaa ayeke omalusoko omavi a Saulu+ emumonese ononkhumbi. Nthiki imwe upumphi mondywo yae neonga peke, Ndaviti otyo ahika otyisandyi.+ 10 Saulu ahetekela ñgoo okuyumba eonga opo apapelele Ndaviti motyimato, mahi Ndaviti ayepe, eonga alinyingila motyimato. Motyinthiki tyatyo otyo Ndaviti akahateka. 11 Konyima Saulu atumu ovatumwa-ndaka meumbo lya Ndaviti vekemutale-mo, opo komuhuka watyo vemwipae.+ Mahi tembwa Ndaviti, Mikale apopila Ndaviti ati: “Ine kukahomboka umwe* otyinthiki etyi, muhuka ove mokala otyivimbi.” 12 Liwa-liwa Mikale akwatesako Ndaviti atulukile pondyanena, opo akahateke. 13 Mikale apolo otyilolo* tyo meumbo, etyipake koula, apa Ndaviti atwala-twala napo omitwe, awingila-po otyikutu tyalingwa nomainya ovinkhombo, otyilolo etyivaleka otyikutu.
14 Saulu atumu ovatumwa-ndaka vakapole Ndaviti, mahi Mikale ati: “Ulangi wavela.” 15 Saulu evetumu vali vakatale Ndaviti, evepopila okuti: “Mweetei kuno noula watyo opo aipawe.”+ 16 Etyi ovatumwa-ndaka vanyingila mokati, avavasi otyilolo* tyo meumbo, apa Ndaviti atwala-twala napo omitwe, pena otyikutu tyalingwa nomainya ovinkhombo. 17 Saulu apulu Mikale okuti: “Omokonda yatyi wankhembela ñgaa, okukwatesako ondyale yange+ okwenda-nkholo?” Mikale akumbulula okuti: “Una wamphopila okuti ine himukwatesako akahomboke mandyipaa.”
18 Ndaviti una wakahateka, akavasa Samuwele ko Lamaa.+ Apopila Samuwele atyiho Saulu emulinga. Ndaviti na Samuwele avaende no ko Naiyote ngako vakakala.+ 19 Etyi pakala, Saulu apopilwa okuti: “Ndaviti uli ko Naiyote ko Lamaa.” 20 Liwa-liwa Saulu atumu ovatumwa-ndaka opo vakakwate Ndaviti. Etyi vamona ovakulu ovauli vekahi nokuula na Samuwele uvehongolela, ononkhono mba Huku ambunyingila movatumwa-ndaka va Saulu, navo avahimbika okulinga ngovauli.
21 Etyi Saulu etyiiva, liwa-liwa atumu vali ovatumwa-ndaka ovakwavo, mahi navo avahimbika okulinga ngovauli. Saulu atumu vali otyikundyi tya tatu navo avahimbika okulinga ngovauli. 22 Pahe konyima ngae mwene wenda ko Lamaa. Etyi ehika konyombo onene ko Seku, apulu okuti: “O Samuwele na Ndaviti veli-pi?” Avemukumbulula okuti: “Veli ko Naiyote+ ko Lamaa.” 23 Pweetyi Saulu ekahi nokwenda no ko Naiyote ko Lamaa, ononkhono mba Huku ambunyingila mwe, atwalako okwenda otyo alinga ngomuuli atee ehika ko Naiyote ko Lamaa. 24 Tupu elilulu ovikutu alingi ngomuuli komaiho a Samuwele, ngapo alangala muhoyo* otyitenya notyinthiki atyiho. Otyo ovanthu vapopila okuti: “Vati Saulu nae omuuli!”+