Wa Vali Wahonekelwa Ova Kolindu
12 Etyi mandyilimphande umwe. Tyitupu etyi matyimphe mahi mandyii no movililenya,+ mehololoko lya Tatekulu.+ 2 Ndyii omulume umwe uli-ale kumwe na Kilisitu, omanima 14 — tyilinge uli molutu tyilinge keli molutu, otyo ame hityii; utyii o Huku — watyindwa-po atwalwa no keulu lya tatu. 3 Otyili, omulume oo ndyimwii — tyilinge uli molutu, tyilinge keli molutu ame hityii; utyii o Huku — 4 watyindwa-po atwalwa no motyilongo otyiwa, eivi onondaka mbahapopiwa, onondaka omunthu ahapondola okupopia. 5 Ame mandyilimphandela umwe omulume watyo oo, kwaame ndyitupu-ale etyi ndyilimphandela-ko, nkhwali otyokwayengenga ndyilimphandela. 6 Ine nahanda umwe okulifela, otyo ñgeno katyinthisa-le ndyityova, mokonda napo napopia otyili. Mahi ame otyo nati umwe nahalinge, opo pahamone ou unkhimaneka, ahankhimanekela etyi amona mwaame, hamwe otyetyi eiva kwaame, 7 ame tyokwatambula vala ehololoko olio enene.
Opo nehelipake-ko unene, napakwa ekete mohitu,+ oandyu ya Satanasi ikalela vala okumbeta nolukwihi,* netyilingwa nehelipake-ko unene. 8 Naita tutatu ku Tatekulu tyokulivondela umwe, hamwe ulimphola-vo. 9 Mahi ngwe wanthi: “Okankhenda kange okanene nekulinga katuuka-le, o mokwayengenga ononkhono mbange mbuli nokumonekela vali nawa.”+ Pahe ame mandyilimphandela okwayengenga opo ononkhono mba Kilisitu mbukale apeho kombanda yange lwekaka. 10 Ame pahe ndyihambukilwa umwe okwayengenga, okupenywa, ndyihambukilwa okuhulilwa, okuhukaiswa, nokumonena emona mu Kilisitu. Mokonda tyina nasoya, opo ndyina vali ononkhono.+
11 Ame nalinga otyova. Onwe umwe mwetyimpha, mokonda ñgeno ankho onwe mumphopia-vo nawa. Ame ndyitupu-ale etyi nalinga, natyike vala tyinthisa ndyimututu vali kovatumwa venyi vokulipaka-ko, namphila ame nehemunthu-ale.+ 12 Mahi, ovilimbo kwiimbukilwa omutumwa vialingilwa umwe pokati kenyi tyikoleleya,+ novilekesa, nomaelema, novilinga ovinene.+ 13 Onwe ñgaa otyityi-vo mwapumbwa vakwenyi momawaneno omakwavo vamona, nkhwali ha-tyetyi vala ame oko nehemupele vali ovilinga andyilingi omutengi wenyi?+ Ine napengesa, ndingei-vo onkhenda, ndyevelei-vo.
14 Tala! Hono ñgaa eli o lya tatu nahanda umwe okuya oko, mahi himemupe ovilinga andyilingi omutengi wenyi. Ame etyi ndyeendela oko, halumono lwenyi,+ ame ndyeendela onwe; mokonda havana-ko+ vapakela ovohe, ovohe ovo vapakela ovana. 15 Ame kohalwange, mwene mandyilipolo umwe tyange, naame mwene andyipwila-po umwe, onwe* mandyityilingila.+ Ine ame ndyimuhole unene, oityi naame nahahumbilwa-vo ngootyo? 16 Ame mwene ndyityii, ame hemupele ovilinga andyingi omutengi wenyi.+ Mahi soka onwe muti tyatiwa ame “nelilungukisa,” nemukwatela “meliva.” 17 Ame ava nemutumine hevetile vemupole tyenyi tyilinge tyange, hatyili? 18 Titu nemuti umwe enda, andyivetumu oko namutaveli mukwetu. Titu utupu etyi emupola, hatyili?+ Onthwe tupolela vala peke, ine hatyo? Tuli vala monomphai mbwike, ine hatyo?
19 Onwe pahe ñgaa naina apa mwiivala hamwe onthwe tuli nokuliaamena? Mwene na Huku utyeete, onthwe etyi tuli nokupopia tupolela peke na Kilisitu. Vanthu vange ndyihole, onthwe aviho tuli nokulinga okwahanda vala okumupameka. 20 Mokonda ame nalinga otyiho, nati hamwe apa ndyiya oko himemuvasi ngeetyi nahanda, naame anahakala ngeetyi onwe mwahanda, nati hamwe mandyivasi vala ovilwa, onkhi, ononthumba-ungo, omaliyapauko, viamakulitendailiya, viamakuliaamba-amba,* etyi tyokulipaka-ko, ombwandya. 21 Hamwe apa ndyiya vali oko, Huku yange mankhundisila umwe momaiho enyi, ndyilile ovanyingi vokwalingaile onkhali avehelivele, avahatundu mosilo yavo, no mouhayo wokulihanda,* no mu evi vikundisa* ankho vakalela vala okulinga.