Neemiya
13 Onthiki oyo omukanda wa Mwisesi autangelwa ovanthu,+ mwahonekelwe okuti ova Amoo, nova Moambe+ kavapondola okukala mewaneno lya Huku yotyotyili,+ 2 mokonda kavatwailile ova Isilayeli okulia nomaande; vafetele Mbalaau opo evehingane.+ Mahi Huku yetu, apilulula ehingano olio eveyambe.+ 3 Etyi veiva Otyitumino, avahimbika okuyapula ova Isilayeli kovanthu aveho vana vatyitwa nononthunda-vilongo.*+
4 Etyi vehenelinge ngootyo, omunakwa onkhalamutwe yovilimba* viondywo ya Huku*+ yetu o Eliyasimbe,+ velii na Tombiya.+ 5 Wapakulile ku Tombiya otyilimba* otyinene tyikala apa papakwa otyiawa tyovilia, nolimbanu, novityuma, neetyi vatepula kovilia,* no kovinyu omphe, no komulela,+ ovipuka vipewa vomuhoko wa Levii,+ novaimbi, novayungi vo konombundi, tupu ankho mupakwa otyiawa tyovanakwa.+
6 Mokweenda kwononthiki ombo ambuho, ame ankho hikahi mo Selusalei, mokonda naile kohamba menima 32+ lioutumini wa Alitaselesi+ Ohamba yo Mbambilonia. Onthiki imwe andyiiti kohamba opo ndyikondoke. 7 Etyi nehika mo Selusalei andyimono otyipuka otyivi unene Eliyasimbe+ alinga, etyi aavela Tombiya+ otyilimba mepata liondywo ya Huku yotyotyili. 8 Andyinumana unene notyipuka otyo, andyiyumbuhi ovipuka viatyo aviho vya Tombiya vikahi motyilimba.* 9 Konyima andyitumu ovanthu vakakombe movilimba,* ovityuma viondywo ya Huku yotyotyili+ andyivipake-mo vali, andyipake-mo ovilia nolimbanu.+
10 Tupu andyinoñgonoka okuti vomuhoko wa Levii+ kavekahi nokupewa onthele yavo,+ mokonda yotyo vomuhoko wa Levii novaimbi, avasi-po ovilinga, avaende komapia avo.+ 11 Andyihimbika okukandaukila ovakwatesiko vovatumini+ andyiti: “Omokonda yatyi mwayekela ñgaa ondywo ya Huku yotyotyili?”+ Andyiveongiya, andyivepake vali povilinga viavo. 12 Aveho mo Sundaa avaeta+ movilimba etyi vatepula kovilia, no kovinyu omphe, no komulela.+ 13 Andyiavela omunakwa Silemia, na Sandoke omuhoneki,* na Pendaiya umwe po vomuhoko wa Levii otyilinga tyokuyunga ovilimba, Hanaa omona wa Sakule, Sakule omona wa Mataniya, akala omukwatesiko wavo, ovo aveho vayumbwa onthumbi. Vena otyilinga tyokwavela vana velilandula navo etyi vesuka natyo.
14 Nthyinangele-vo+ Huku yange, wahalimbwe-vo etyi nalinga, wahalimbwe-vo etyi nalingila ondywo yove, novilinga vilingwa-mo,* mokonda ndyikuhole unene.+
15 Pononthiki opo, andyimono ovanthu mo Sundaa, vekahi nokuliata onouva opo vanyunge ovinyu Motyasapalo,+ otyo vaongiya ononthumbo mbovilia, avevipake kovimbulu. Vaeta ovinyu, nonouva, nomakuyu, novipuka viatyo aviho okutwala no ko Selusalei monthiki Yotyasapalo.+ Andyivepopila opo vahalandese vali okulia monthiki oyo.* 16 Ova Tilu vakala mepunda-umbo, vaeta ombisi novipuka aviho viokulandeswa, valandesa kovanthu vomo Sundaa nomo Selusalei monthiki Yotyasapalo.+ 17 Andyikandaukila omanene-atyo omo Sundaa, andyivepopila okuti: “Omokonda yatyi mulingila otyipuka etyi otyivi ñgaa, okusilisa onthiki Yotyasapalo? 18 Hatyo ovakwaukulu vetu valingile-ale pahe Huku yetu aetela ononkhumbi onthwe nepunda-umbo eli? Pahe onwe mukahi nokuyawisa vali konyengo onene Huku ena no Isilayeli mokusilisa Otyasapalo.”+
19 Pahe etyi okahi kahimbika okufika komapito o Selusalei tyina nkhele Otyasapalo tyihenehike-po, andyitumu okwiika omapito. Tupu andyivepopila okuti muhayelulei omapito atee Otyasapalo tyilamba, ponombundi andyipake-po vamwe povakwatesiko vange opo vahayeke nawike weeta ovipuka mokati monthiki Yotyasapalo. 20 Ngootyo, ovakwa-vitanda, no vokulandesa ovipuka viatyo aviho, avehikila kondye yo Selusalei, tyafwile avalala-ko onthiki ike ine onombali. 21 Andyivelondola andyivepulu okuti: “Omokonda yatyi mulalela ponthele yotyimato apa? Ine mutyiwana vali, mandyimupolo-po kononkhono.” Okutuka opo kavakondaukile-po vali monthiki Yotyasapalo.
22 Andyipopila vomuhoko wa Levii opo apeho velisukule, aveya okuyunga konombundi opo onthiki yo Tyasapalo ilinge umwe onthiki ikola.+ Tupu nthyinangele-vo Huku yange, mokonda yotyipuka otyo, ndinge-vo okankhenda mokonda yolwembia lwove olunene.+
23 Pononthiki opo, andyimono ova Sundaa vanepa* ovakai+ ova Asindonde,+ nova Amoo, nova Moambe.+ 24 Vamwe povana vavo vapopia elaka liova Asindonde, nomalaka okovilongo ovikwavo, mahi nawike puvo utyivila okupopia elaka liova Sundaa. 25 Andyivekandaukila, andyiveteyela onkhano, vamwe andyivevete,+ andyivetukula onohuki mbavo, andyivetumu vaane menyina lya Huku andyiti: “Onwe kamupondola okunepesa ovana venyi kovana vavo, nii kamupondola okutavela nawike povana vavo opo anepwe novana venyi, nii onwe kamupondola okuvenepa.+ 26 Havo valingisisile-ale onkhali ohamba yo Isilayeli Salomau? Movilongo aviho mutupu omunthu ohamba welifwa nae,+ uholwe na Huku,+ mokonda yotyo Huku emulingi ohamba yo Isilayeli aiho. Mahi, nae walingile onkhali mokonda yovakai ononthunda-vilongo.+ 27 Oñgeni onwe mukalinga otyipuka otyivi ngootyo, amuyeke-po Huku yetu, amulinepe novakai ononthunda-vilongo?”+
28 Umwe povana va Soyanda,+ omona wa Eliyasimbe+ omunene-nakwa, wanepele omona wa Sambalaa,+ omu Mbete-Oloo. Mokonda yotyo andyimutaata.
29 Vehinangela-vo Huku yange, mokonda vasilisa otyilinga tyounakwa, nomphango yalingwa novanakwa,+ no vomuhoko wa Levii.+
30 Ngootyo andyivesukukisa, vahasile ngovanthu vovilongo ovikwavo, andyiavela ovilinga ovanakwa, no vomuhoko wa Levii, omunthu na munthu andyimwavela otyilinga tyae;+ 31 tupu andyionganeka nawa ovipuka opo apeho pakale ononkhwii pononthiki mbatyo,+ novinyango viokwapia tete.