Esitala

10 Putyina Esitala ekahi nokulikwambela,+ nokulipopia ku Huku, otyo alila tyelipetamena kondywo ya Huku yotyotyili, ovanthu ovanyingi ova Isilayeli, ovalume, novakai, novana, aveliongiya avemupake pokati; otyo valila unene. 2 Sekaniya omona wa Seyeli,+ umwe povana va Elau+ apopila Esitala ati: “Twalinga onkhali ku Huku yetu, twapengesa okwanepa ovakai* vomuhoko omukwavo, ovanthu vovilongo ovikwavo.+ Mahi, ova Isilayeli nkhele vena ekevelelo. 3 Pahe tulingei omphango na Huku yetu+ opo tutaate ovakai aveho kumwe novana vavo, ngeetyi Siovaa etupopila, na vana vena onthilo* notyitumino tya Huku yetu.+ Tulingei ngeetyi Ovitumino vipopia. 4 Katuka, mokonda otyitateka otyo tyitei kwoove, onthwe matukukwatesako. Kala tyapama, olingi etyi tyesukisa.”

5 Ngootyo, Esitala akatuka, apopila ononkhalamutwe mbovanene-nakwa, no vomuhoko wa Levii novanthu aveho vo Isilayeli opo valae okulinga ngeetyi tyapopiwa.+ Aveho avalingi omulao. 6 Esitala atundu komutwe wondywo ya Huku, aende mondywo* mukala Seowanaa, omona wa Eliyasimbe. Namphila apita mondywo omo, mahi ahali natyike, ahanu omeva, walinga ngootyo opo alekese okuti weihamenwa unene neetyi tyalinga ovanthu vokwatunda koukonde,+ valingile onkhali.

7 Avapopila ovanthu mo Sundaa no mo Selusalei okuti aveho vokwatunda koukonde veliongiye mo Selusalei; 8 ngeetyi ovatumini novakulu vapopia, una wehehikile liwa apalambe ononthiki ononthatu upolwa ovipuka viae,* mewaneno lyo vokwatunda koukonde atewa-mo.+ 9 Ngootyo, ovalume aveho vomuhoko wa Sundaa no wa Mbesamii aveliongiya mo Selusalei mononthiki ononthatu, monthiki 20 yohanyi ya tyive. Ovanthu aveho avapumphama mepata liondywo ya Huku yotyotyili, otyo vateketa mokonda yotyitateka otyo, nombila onene.

10 Esitala, omunakwa, akatuka evepopila ati: “Onwe kamwalingile ovanthu votyili etyi mwelinepa novakai ononthunda-vilongo,+ pahe mwayawisa konkhali ya Isilayeli. 11 Pahe lipopiei ononkhali mbenyi ku Siovaa, Huku yovakwaukulu venyi, amulingi etyi ahanda. Liyapukei novanthu vovilongo ovikwavo, amuliyeke-po novakai ononthunda-vilongo.”+ 12 Ewaneno aliho avakumbulula peulu okuti: “Onthwe matulingi umwe ngeetyi ove wapopia. 13 Mahi tuvanyingi unene, ngwe omuvo wombila. Kamatutyivili okukala pondye, otyitateka kamatyitetululwa monthiki ike ine mononthiki onombali, mokonda etyi twalinga tyapenga unene. 14 Mbambavo, yeka ononkhalamutwe mbetu mbukalele-po ewaneno aliho,+ aveho vekahi momapunda-umbo etu vanepa ovakai ononthunda-vilongo, mwene veliete monthiki wevenakela, veye novakulu, novakoyesi vomapunda-umbo avo, opo tukondole onyengo onene ya Huku yetu, yaetwa notyitateka otyo.”

15 Mahi, Sonataa omona wa Asaeli, na Saseiya omona wa Tikivaa avehetavela, Mesulau na Sambetai+ vomuhoko wa Levii, avaame kuvo. 16 Mahi vana vokwatundile koukonde, avalingi ngeetyi tyapopiwa. Esitala, omunakwa, no nohongoi mbonombunga vokwahonekwa omanyina aveliongiya monthiki yo tete aveke, mohanyi ya 10 opo vaovolole otyitateka otyo. 17 Monthiki yo tete, mohanyi yo tete avamane okutetulula otyitateka tyovalume vokwanepele ovakai ononthunda-vilongo. 18 Avanoñgonoka okuti vamwe povana vovanakwa vanepa ovakai ononthunda-vilongo.+ Vamwe ovana va Sesuwa,+ omona wa Seosandake, na vana Sesuwa elilandula navo: Maaseya, na Eliyesele, na Salimbe, na Sendaliya. 19 Mahi avapopi okuti mavataata* ovakai vavo. Mokonda yonkhali yavo, mavapolo motyiunda ongi aveyaave mokonda yonkhali yavo.+

20 Pomuhoko wa Imele+ tyati o Hanani na Sembandiya; 21 pomuhoko wa Halii,+ o Maaseya, o Iliya, o Semaiya, o Seyeli, na Usiya; 22 pomuhoko wa Pasule,+ o Eliyoenai, o Maaseya, o Isimayeli, o Netaneli, o Sosambande na Eleyasaa. 23 Pomuhoko wa Levii ankho tyati o Sosambande, na Simei, na Kelaiya (Kelita), na Petaiya, na Sundaa, na Eliyesele; 24 povaimbi o Eliyasimbe; povayungi vo konombundi, o Saluu, o Telei, na Uli.

25 Pova Isilayeli, pomuhoko wa Pateesi+ tyati o Lamiya, o Isiyaa, o Malikiya, o Miyamii, o Eliyasale, o Malikiya na Mbenaya; 26 pomuhoko wa Elau,+ o Mataniya, o Sakaliya,+ o Seyeli, o Ambindi, o Selemote na Iliya; 27 pomuhoko wa Satu,+ o Eliyoenai, o Eliyasimbe, o Mataniya, o Selemote, o Sambande na Asisa; 28 pomuhoko wa Mbembai,+ o Seowanaa, o Hananiya, o Sambai na Atalai; 29 pomuhoko wa Mbani, o Mesulau, o Maluke, o Andaiya, o Sasumbe, o Seali na Selemote; 30 pomuhoko wa Paate-Moambe,+ o Andina, o Kelali, o Mbenaya, o Maaseya, o Mataniya, o Mbesaleli, o Mbinwi na Manasesi; 31 pomuhoko wa Halii,+ o Eliyesele, o Isisa, o Malikiya,+ o Semaiya, o Simiyoni, 32 o Mbesamii, o Maluke na Semaliya; 33 pomuhoko wa Hasuu,+ o Matenai, o Matata, o Sambande, o Elifelete, o Selemai, o Manasesi na Simei; 34 pomuhoko wa Mbani, o Maandai, o Anilau, o Weli 35 o Mbenaya, o Mbendaya, o Keluwii, 36 o Vaniya, o Melemote, o Eliyasimbe, 37 o Mataniya, o Matenai na Saasu; 38 pomuhoko wa Mbinwi, o Simei, 39 o Silemia, o Nataa, o Andaiya, 40 o Makinandembai, o Sasai, o Salai, 41 o Asalele, o Silemia, o Semaliya, 42 o Saluu, o Amaliya na Susee; 43 Pomuhoko wa Nembu, o Seyele, o Matitiya, o Sambande, o Sembina, o Sandai, o Sowele na Mbenaya. 44 Aveho ovo vanepele ovakai ononthunda-vilongo,+ avevetaata kumwe novana vavo.+