Ovakoyesi
7 Selumbaale, ou vati o Sindeyau,+ nae novanthu aveho ali navo avakatuka komuhuka, avakaonga onthanda pondyivi-ndyivi yo ko Halonde, pweetyi vonthanda yo Mindiyaa vahula onthanda ya Sindeyau kombanda, popepi notyipunda tyo Molee, melola.* 2 Siovaa apopila Sindeyau ati: “Ovanthu una-vo ovanyingi unene, mandyipakula-le ova Mindiyaa pomavoko ove.+ Ova Isilayeli vapondola okulipaka-ko,* ngwe ame nevekwatesako, avati: ‘Okuvoko kwange mwene oko kwandyovola.’+ 3 Pahe mbambavo, popila ovanthu okuti: ‘Una una nokuteketa, watila owoma akondoke keumbo.’”+ Sindeyau evelolo. Etyi evelola, ovalume 22.000 avakondoka keumbo, esala vala novalume 10.000.
4 Mahi Siovaa apopila Sindeyau okuti: “Nkhele pahupa ñgoo ovanthu ovanyingi. Vetwala komaande, ame mandyivelolo, paholovonwe ava moende navo. Ou namati: ‘Oe moende nae,’ oe moende nae; mahi ou namati: ‘Kumaende nae,’ kumaende nae.” 5 Pahe atwala ovanthu pomaande.
Siovaa apopila Sindeyau okuti: “Pola-po vana vatyapa omaande ngotyimbwa, oveyapula ku vana vaikila konongolo tyina vanwa omaande.” 6 Ovalume vokwatyapa omaande peke vena 300. Ovalume ovakwavo aveho vaikila konongolo.
7 Siovaa apopila Sindeyau okuti: “Mandyimuyovola novalume ava 300 vatyapa omaande peke, andyipakula ova Mindiyaa pomavoko ove.+ Mahi ovalume ovakwavo aveho vakondoke keumbo.” 8 Etyi apola ovanthu okulia nononkhwino mbavo, atumu ovanthu aveho vo Isilayeli vakondoke keumbo, esala vala no 300. Onthanda yova Mindiyaa ankho ikahi kombwelo yavo, melola.+
9 Motyinthiki otyo, Siovaa emupopila okuti: “Katuka, lwisa ova Mindiyaa monthanda yavo, nevepakula pomavoko ove.+ 10 Mahi ine watila owoma okuvelwisa, opo nkhele endei vala monthanda yavo na Pula, noove nomukwatesiko wove. 11 Tehelela etyi vekahi nokupopia, konyima kumatili vali owoma,* otyivili okuvelwisa monthanda yavo.” Pahe ovo Sindeyau na Pula omukwatesiko wae, avaende atee apa paoyela onthanda yovakwa-vita.
12 Ova Mindiyaa, nova Amaleke, novanthu aveho vo koutundilo+ aveyula melola,* ovanyingi ngovimphunia-mphunia; omakamelu avo kaevilwa okuvalulwa+ omanyingi-nyingi, elifwe poluheke lwo kelunga. 13 Tyina Sindeyau ehika, avasi omulume ukahi nokupopila epanga liae ondyoi ata, ati: “Nata ondyoi: Pena ombolo imwe yosevata yelivolonga yanyingila monthanda yova Mindiyaa. Aiya nononkhono ononene, aiteye-po ekaka limwe alitoko.+ Yateya-po ekaka, alipinunuka, ekaka alisala pohi.” 14 Epanga liae emupopila okuti: “Ondyoi oyo ipopia vala omutunga wa Sindeyau+ omona wa Sowasi omulume omu Isilayeli. Huku wapakula ova Mindiyaa nonthanda yavo aiho pomavoko ae.”+
15 Sindeyau wati vala ivee ondyoi oyo, neetyi ihangununa,+ aikila konongolo opo afende Huku. Pahe akondoka konthanda yova Isilayeli, evepopila okuti: “Katukei, Siovaa wapakula onthanda yova Mindiyaa pomavoko enyi.” 16 Ayapula ovalume 300 ovikundyi vitatu, aveho eveavela ononkhwino+ nomalufo omanene ena ovihihi viotupia mokati. 17 Evepopila okuti: “Talei nawa etyi ndyikahi nokulinga, noonwe ngatyo mulinga. Tyina namehiki apa paoyela onthanda yavo, etyi namalingi, noonwe otyo muna okulinga. 18 Tyina ame na ava ndyina-vo twamahiki ononkhwino, noonwe hikei ononkhwino okuliseta nonthanda aiho, amuulula, amuti: ‘Ovilwa ovia Siovaa na Sindeyau!’”
19 Sindeyau novalume 100 ena-vo avehiki ponthele yonthanda kounthiki koola yomuyungi wa vali,* etyi omuyungi eya okupinga-ko mukwavo. Avahiki ononkhwino,+ avatyatyaula omilindi ominene vena-vio pomavoko.+ 20 Ovalume vovikundyi vitatu avahiki ononkhwino, avatyatyaula omilindi ominene. Avakwata ovihihi nokumbili, avahiki ononkhwino vakwata nokuvoko kwokulio, avaulula, avati: “Omutunga wa Siovaa no wa Sindeyau!” 21 Ovalume aveho avatalama ponomphangu mbavo okuliseta nonthanda yova Mindiyaa, omafwalali aeho onondyale mbavo aahimbika okwenda-nkholo, aahateka otyo eliyavela.+ 22 Putyina ovalume 300 vahika ononkhwino, Siovaa ahongiliya onondyale mbavo, ambuliipaela monthanda yambo mwene nomutunga;+ omafwalali atyo, aakahateka no ko Mbete-Sita, aatundu oko aaviuku ko Selelaa, no ko Ambele-Meolaa,+ ikala ko Tambate.
23 Ovalume vo Isilayeli vomuhoko wa Nafitalii, no wa Asele, novanthu aveho vomuhoko wa Manasesi avakongwa,+ aveya, avataata ova Mindiyaa. 24 Sindeyau atumu ovatumwa-ndaka kotyilongo tyonomphunda mbo Efalaii, ati: “Endywei tulwise ova Mindiyaa, kelelei poviyau no ko Mbete-Mbala no ko Solondau.” Ngootyo, avaongiya ovalume aveho vo ko Efalaii, avakakelela poviyau no ko Mbete-Mbala no ko Solondau. 25 Tyihe-otyo vala, avakwata ovakwatesiko vevali vohamba yo Mindiyaa, ovo Olembe na Seembe; avaipaela Olembe konkhanda yo Olembe,+ Seembe avemwipaela pomphangu yokuhinina ovinyu valuka okuti o Seembe. Avatwalako okutaata ova Mindiyaa,+ avatwala omutwe wa Olembe no wa Seembe ku Sindeyau, motyilongo tyo Solondau.