Ovakoyesi

9 Etyi pakala, Ambimeleke+ omona wa Selumbaale, aende kovo inanthu, ko Sikei, evepopila aveho nombunga ili meumbo lya he-mbwale* okuti: 2 “Kapulei kononkhalamutwe* ambuho mbo ko Sikei pulei muti: ‘Hahe mutuminwe novana aveho 70 va Selumbaale,+ ine hahe mutuminwe nomunthu wike? Mahi hinangelei okuti tuvohonde ike.’”*

3 Onomphange mbatyo mba ina avakapopia onondaka ombo kovanene vo ko Sikei, omutima wavo ankho wayemba ku Ambimeleke mokonda vati: “Oo tyina tuna-e tulilandula.” 4 Pahe avemupe onopalata 70 mbo mondywo yokufendela Mbaale-Mbelite,+ Ambimeleke akongo nambo ovanthu vehena ovilinga, ovanthu vehekahi nawa vemulandule. 5 Aende keumbo lya he, ko Ofala,+ aipaa vana elilandula navo,+ ovana va Selumbaale 70, eveipaela konkhanda. Wahupile vala wike, Sotau, omona omututu watyo wa Selumbaale, mokonda waholamene.

6 Ovatumini aveho vo ko Sikei, novanthu aveho vo ko Mbete-Milo aveliongiya, avalingila Ambimeleke ohamba+ popepi nomuti omunene, ukala ponthele pomphandyi ili ko Sikei.

7 Etyi vetyipopila Sotau, ahateka aende liwa-liwa no keulu liomphunda Selisii,+ ngako atalama evepopila nondaka yakaluluka okuti: “Tehelelei kuno, onwe nonkhalamutwe mbo ko Sikei, na Huku memutehelela:

8 “Nthiki imwe, omiti viekelivialekela ohamba. Avipopila omundyambi okuti: ‘Kala ohamba yetu.’+ 9 Mahi omundyambi auvipopila okuti: ‘Ndyiyeka-po omulela wange,* una uhilivika Huku, novanthu aveho, andyikafuka-fuka kombanda yomiti mikwetu?’ 10 Pahe omiti avipopila omukuyu okuti: ‘Endyu ukale ohamba yetu.’ 11 Mahi omukuyu auvipopila okuti: ‘Ndyiyeka-po ovinyango viange vipepa, ovinyango oviwa, andyikafuka-fuka kombanda yomiti mikwetu? 12 Omiti avipopila vali omuti wonouva okuti: ‘Endyu ukale ohamba yetu.’ 13 Omuti wonouva auvipopila okuti: ‘Ndyiyeka-po ovinyu yange omphe, ihambukiswa Huku novanthu, andyikafuka-fuka kombanda yomiti mikwetu?’ 14 Konyima omiti aviho avipopila omukete okuti: ‘Endyu ukale ohamba yetu.’+ 15 Omukete aupopila omiti aviho okuti: ‘Ine tyili-tyili mwambialeka kouhamba opo ndyimutumine, endywei muholame mombwelo yange, mokafi. Mahi ine kamulingi ngootyo, opo momukete mutunde otupia, atuyoko-po omisendulu vyo ko Limbanu.’

16 “Okuti etyi onwe mwalinga o tyotyotyili, tyaviuka, okulinga Ambimeleke ohamba?+ Okuti onwe mwakala nokankhenda na Selumbaale, no veumbo liae, mwevelinga etyi vapondolwa okulingwa? 17 Etyi tate yange emwamena,+ wayumbilehi omwenyo wae* opo emuyovole pomavoko ova Mindiyaa.+ 18 Mahi hono mwatyitukila-po veumbo lya tate, mwaipaa ovana vae, mweveipaela aveho konkhanda, ovalume 70.+ Pahe mwalinga Ambimeleke omona womupika+ wa tate, akala ohamba yovatumini vo mo Sikei mokonda vala mulilandula nae. 19 Ine etyi onwe mwalinga Selumbaale no veumbo liae monthiki yohono o tyotyotyili, tyaviuka, hambukilwei Ambimeleke, nae ahambukwa noonwe. 20 Mahi okuti hatyo-ko, mu Ambimeleke mutunde otupia, ovatumini vo Sikei, no vo Mbete-Milo avapi,+ movatumini vo Sikei no vo Mbete-Milo mutunde otupia Ambimeleke api.”+

21 Sotau+ akahateka no ko Mbeele, ngako akala mokonda ya Ambimeleke, omukulu wae.

22 Ambimeleke atumina* mo Isilayeli omanima etatu. 23 Huku ayeke ovo Ambimeleke nononkhalamutwe mbo Sikei vakale nonondyaya,* avatyitukila-po Ambimeleke. 24 Otyo tyalingwa opo tyilifetele neetyi tyalingilwe ovana va Selumbaale 70, onombei mbohonde yavo ambutokela ku Ambimeleke omukulu wae, mokonda oe weveipaa,+ nae nononkhalamutwe mbo Sikei mokonda mbemukwatesile-ko okwipaa vana elilandula navo. 25 Ovatumini vo Sikei avatumu ovalume vemuyolamene keulu lionomphunda. Ovalume ovo ankho vapola ovanthu ovipuka viavo aveho vakwata puvo metapalo. Etyi pakala, ovanthu aveketyipopia ku Ambimeleke.

26 Ngaali omona wa Embende, na vana velilandula navo, avaende ko Sikei,+ ovatumini vo ko Sikei, avemuyumbu onthumbi. 27 Avaende mepia avanyange onouva, avembuliate, avalingi otyipito. Avanyingila mondywo ya huku yavo,+ avali, avanu, avahimbika okuteyela Ambimeleke onkhano. 28 Ngaali omona wa Embende ati: “Ambimeleke olie pahe, Sikei olie onthwe tukaundapela? Ha mona wa Selumbaale,+ Sembuli hae-ko umukalela-po? Undapelei ovana va Hamole, he ya Sikei! Omokonda yatyi matuundapelela Ambimeleke? 29 Ine nali onkhalamutwe yovanthu ava, ñgeno Ambimeleke nemupola-ko.” Pahe apopi okuti: “Ambimeleke ayawise komafwalali ae, eya tulwe.”

30 Etyi Sembuli omutumini wo mepunda-umbo eiva onondaka ombo, mba Ngaali omona wa Embende onyengo yae ainkhinduka. 31 Atumu ovatumwa-ndaka ku Ambimeleke pokamphengi,* vekemupopile okuti: “Tala! Ngaali omona wa Embende, na vana velilandula navo veli ko Sikei, vekahi nokuhongiliya ovanthu vekutyitukile-po. 32 Endyu kounthiki, noove, novakwa-vita vove, amuveyolamena mepia. 33 Komuhuka-huka, etango* nga liatunda, oende olwisa epunda-umbo. Tyina Ngaali nomafwalali ae vekulwisa, likwatesila opo vatile-ko kwoove.”*

34 Ngootyo, Ambimeleke novanthu aveho ena-vo avakatuka kounthiki, avelitepuka ovikundyi vikwana, avayolamena ovanthu vomo Sikei. 35 Etyi Ngaali omona wa Embende alupuka, akala pombundi yepunda-umbo, Ambimeleke novalume ena-vo avahololoka. 36 Etyi Ngaali evemona, apopila Sembuli okuti: “Tala! Kuna ovanthu vekahi nokutuluka keulu lionomphunda.” Mahi Sembuli emupopila okuti: “Etyi weete havanthu-ko, okafi konomphunda.”

37 Ngaali ati: “Tala! Kuna ovanthu vekahi nokuya vatundilila pokati kotyilongo, vamwe vekahi nokuya nondyila yo komuti omunene ko Meonenii.” 38 Sembuli ati: “Opi omalityindailo ove maekutwala nako, have watile: ‘Ambimeleke olie pahe, onthwe tukaundapela?’+ Ovanthu ovo havo ove watombele? Pahe lupuka ulwe navo.”

39 Ngaali apiti komutwe wononkhalamutwe mbo Sikei, alwisa Ambimeleke. 40 Ambimeleke ataata Ngaali, Ngaali akahateka; ovanthu ovanyingi avaipaelwa mondyila, atee kombundi yepunda-umbo.

41 Ambimeleke atwalako okukala ko Alumaa, Sembuli+ ataata Ngaali na vana velilandula navo, mo Sikei. 42 Onthiki yalandula-ko ovanthu avaende mepia, umwe etyipopi ku Ambimeleke. 43 Ayapaula ovalume ovikundyi vitatu, avekeveyolamena kepia. Etyi amona ovanthu vatunda mepunda-umbo evelwisa, eveipaa. 44 Ambimeleke novikundyi ena-vio, avaende avakala ponthele pombundi yepunda-umbo, ovanthu vovikundyi vivali vekahi nokulwisa aveho veli mepia, aveveipaa. 45 Ambimeleke alwisa epunda-umbo onthiki aiho, elitambula-ko. Aipaa ovanthu veli-mo; ahanyauna-po epunda-umbo olio,+ ahandaulila-mo omongwa.

46 Etyi ovatumini vo ketala liomuyungi lyo ko Sikei vetyinoñgonoka, avakahateka, avakaholama* mondywo yokufendela ko Eli-Mbelite.+ 47 Etyi Ambimeleke etyiiva okuti ovatumini aveho vo ketala liomuyungi ko Sikei veliongiya oko, 48 Ambimeleke novalume ena-vo avalondo komphunda Salumoo. Ambimeleke apolo onkhava atyoko ompha yomuti, elipake-yo potyipepe, apopila ovalume ena-vo ati: “Kuluminyei! Lingei ngeetyi na ame nalinga!” 49 Ovalume aveho avatyo-ko onompha, avalandula Ambimeleke. Onompha avembuhondyo apa vaholama avapake-ko otupia. Ovanthu aveho vokukala petala liomuyungi ko Sikei navo avankhi, apankhi ovalume novakai vehungi 1.000.

50 Ambimeleke aende vali ko Tembe; aongo onthanda ko Tembe, eitambula-ko. 51 Mepunda-umbo mwali otyimato tyimwe tyetala liomuyungi, ovalume novakai novatumini aveho vo mepunda-umbo ngamo vakaholama. Aveliikila metala liomuyungi, avalondo keulu. 52 Ambimeleke aende petala liomuyungi opo eliteye-po. Afwene pombundi yetala opo elipake otupia. 53 Omukai umwe ayumbu onkhunkho, avete Ambimeleke momutwe auvambuka.+ 54 Aihana liwa-liwa omukwatesiko wemutyindila-po ovihongati viae, ati: “Pola-mo omutunga ndyipae, opo vahatie: ‘Waipaelwe nomukai.’” Omukwatesiko wae emutomo atyikatumbuka nthele-ina, ankhi.

55 Etyi ovalume vo Isilayeli vetyimona okuti Ambimeleke wankhia, aveho avakondoka keumbo. 56 Ngootyo, Huku akondolela Ambimeleke otyivi alingile tate yae, etyi aipaele vana elilandula navo 70.+ 57 Huku tupu akondolela ovivi aviho ovalume vo ko Sikei valingile, avitokela komitwe viavo mwene. Ovihuna vina Sotau+ omona wa Selumbaale+ evepopilile aviya no kuvo.