Ovakoyesi
2 Oandyu ya Siovaa+ aitundu ko Silingale,+ aiya ko Mbokii aipopi okuti: “Ame nemupola ko Isitu andyimweta kotyilongo nalaele ovakwaukulu venyi.+ Tupu nemupopilile okuti: ‘Himayeke-po omphango nalinga noonwe.+ 2 Mwahalingei omphango naike novanthu vokukala motyilongo etyi,+ hanyaunei-mo omitala viavo viovilikutila.’+ Mahi, onwe kamwetavelele ondaka yange.+ Omokonda yatyi mwalingila ngootyo? 3 Otyo ame tupu nemupopilile okuti: ‘Himemutaata-vo;+ mavakakala eliva lienyi,+ ovika-huku viavo mavikemuyapula.’”+
4 Etyi oandyu ya Siovaa yapopila ova Isilayeli aveho onondaka ombo, ovanthu avahimbika okulila unene. 5 Ohika oyo aveiluku okuti o Mbokii,* ngapo valingila Siovaa ovilikutila.
6 Etyi Susuwee elilekela novanthu, ova Isilayeli aveho avaende no komapingo avo, opo vapiñgane otyilongo.+ 7 Ovanthu avatwalako okuundapela Siovaa, ononthiki ambuho Susuwee ena omwenyo, nononthiki ambuho ovakulu vakaleleko konyima ya Susuwee vena omwenyo, vana vamwene omahuviso aeho Siovaa alingile pokwaamena ova Isilayeli.+ 8 Susuwee omona wa Nuu, omuundapi wa Siovaa anyimi etyi ena omanima 110.+ 9 Avekemupaka mofika yepingo liae, ko Timinate-Helese,+ kotyilongo tyo nomphunda mbo Efalaii, kombanda komphunda Ngaasi.+ 10 Ovanthu aveho* vo pononthiki opo, avalandula kovakwaukulu vavo,* konyima akutyitwa ovana vehei Siovaa, neetyi alingilile ova Isilayeli.
11 Ova Isilayeli avalingi etyi tyapenga komaiho a Siovaa, avahimbika okufenda* ovika-huku ovi Mbaale.+ 12 Avayeke-po okufenda Siovaa Huku yo vohe, una wevepolele kotyilongo tyo Isitu.+ Avafende ovika-huku, ovika-huku viovanthu vakalele navo popepi;+ avafende kovika-huku ovio avanumanesa Siovaa.+ 13 Avayeke-po Siovaa avafende Mbaale, novilolo vyo Asitolete.+ 14 Onyengo ya Siovaa ainkhindukila ova Isilayeli, evepakula kovifwanga avivepundu ovipuka viavo.+ Evepakula pomavoko onondyale mbavo mbukala popepi navo,+ avehetyivili okulwisa onondyale mbavo.+ 15 Akuho oku vaya nako okuvoko kwa Siovaa kuvelwisa, mokuvemonesa ononkhumbi,+ ngeetyi Siovaa evepopilile, neetyi Siovaa eveanenene,+ vamwene unene ononkhumbi.+ 16 Siovaa eveovolela vokukoya onomphela veveyovola pomavoko a vana vevepunda.+
17 Mahi avaanye umwe no kovakoyesi ovo; vafendele ovika-huku,* ngavio vaundapela. Vayapuka liwa mondyila mwaendelele ovakwaukulu vavo, vokwetavelele ovitumino vya Siovaa.+ Kavalingile ngeetyi ovo valingile. 18 Apeho tyina Siovaa eveovolela omukoyesi+ Siovaa ukala nomukoyesi oo, eveyovola pomavoko onondyale mbavo, mokweenda kwononthiki ambuho mbomukoyesi; Siovaa uvelinga okankhenda*+ putyina vakema, mokonda ya vana vokuvemonesa ononkhumbi,+ na vana vevelinga onya.
19 Mahi tyina omukoyesi amankhi, vakondoka vali kokulinga ovivi tyipona ko vohe, avafende ovika-huku, ngavio vaundapela avelipetamena kuvio.+ Kavayekele-po ovilinga viavo ovivi, nii onontheto mbavo mboumphuki. 20 Otyo onyengo ya Siovaa yankhindukilila ova Isilayeli,+ ati: “Mokonda ovanthu ava vanyona omphango yange,+ nalinga novakwaukulu vavo, avehenthavela,+ 21 na ame, himataata ovanthu vovilongo ovikwavo vana Susuwee asa motyilongo omu, etyi anyima.+ 22 Mandyilingi ngootyo ndyitale ine ova Isilayeli mavaendela mondyila ya Siovaa,+ ngeetyi tyalingile ovakwaukulu vavo.” 23 Ngootyo, Siovaa ayekela-mo ovanthu vovilongo ovikwavo. Kevetaatele-mo liwa nii ehevepakula pomavoko a Susuwee.