Isekiyele
13 Ondaka ya Siovaa aindyendela vala aiti: 2 “Mona womulume, popia etyi matyikalingwa ovauli va Isilayeli,+ popila vokuhinda omaulo+ avo mwene* uti: ‘Tehelelei ondaka Siovaa apopia. 3 Etyi, otyo tyapopia Tatekulu Ohamba Onene Siovaa, wati: “Ovauli ovityova, vokulandula omalusoko avo* mwene ngwe vetupu etyi vamona, ngongo yavo!+ 4 Ove Isilayeli, ovauli vove uti vala olunga ityama-tyama nomatunthu. 5 Onwe, komanthiwi eli movimato viomamanya kamamwii-ko, mweepatele eumbo lya Isilayeli,+ ova Isilayeli vakale-kale tyitai no movilwa vionthiki ya Siovaa.”+ 6 “Veli nokumona omamonekelo ounkhembi, vaula omatutu, ava vokuli nokuti: ‘Ondaka ya Siovaa oyei,’ ngwe Siovaa ehena okuti wevetuma, mahi soka vakevela ondaka vapopia ilinge otyili.+ 7 Hamamonekelo ounkhembi ove wamona, hamatutu wapopia wiivala okuti: ‘Ondaka ya Siovaa oyei,’ ngwe ame ndyitupu etyi napopia?”’
8 “‘Tatekulu Ohamba Onene Siovaa wati: “‘Mokonda onwe mupopia omatutu, movililenya mumona-mo ounkhembi, ame nalinga ondyale yenyi,’ o Tatekulu Ohamba Onene Siovaa+ wetyipopia.” 9 Okuvoko kwange makulwisa ovauli vomamonekelo ounkhembi, vokuula omatutu.+ Kamavakakala vali pu ava ndyitolela ovipuka viange; kamavakahonekwa momukanda weumbo lya Isilayeli; kamavakakondoka motyilongo tya Isilayeli; onwe mamukankhola umwe okuti ame, ame Tatekulu Ohamba Onene Siovaa.+ 10 Matyimphe okulinga otyo atyiho, otyetyi vayapula ovanthu vange tyina vati: “Kuna ombembwa!” ngwe kutupu ombembwa.+ Tyina umwe atunga otyimato tyahakolele, vetyilomba nompheyu.’*+
11 “Popila vokulomba otyimato nompheyu uti matyitoko-po. Makuya ombila imwe onene, omamanya ongandavila* maakatoka, ovipepe ovinene, maviketyiteye-po.+ 12 Tyina otyimato tyamatoko-po, mamukapulwa okuti: ‘Ompheyu yenyi mwalombele-ko ili-pi?’+
13 “Etyi otyo tyapopia Tatekulu Ohamba Onene Siovaa, wati: ‘Mandyikakatula ovipepe ovinene monyengo yange, mandyikalokesa ombila imwe onene mokwanumana kwange, andyilokesa ongandavila monyengo ihanya. 14 Mandyikatokesa-po otyimato onwe mwalomba nompheyu, mandyityitokesila pohi, elisesu liatyo alisala poluhandya. Tyina epunda-umbo liamatoko-po, onwe mamunkhila mokati. Onwe mamukankhola umwe okuti ame, ame Siovaa.’
15 “‘Tyina ame namauyulila onyengo yange kotyimato otyo, no ku vana vokwetyilomba nompheyu, mandyimutolela okuti: “Otyimato katyipo vali, no vokwetyilombele nompheyu kave-ko vali.+ 16 Ovauli va Isilayeli kave-ko vali, ava vaulila o Selusalei, vokumona ombembwa movililenya, ngwe kutupu ombembwa,”’+ o Tatekulu Ohamba Onene Siovaa wetyipopia.
17 “Ove mona womulume, otyipala tyove tyipaka movana vovanthu vove ovahikwena, vokuhinda omaulo avo mwene, popia etyi mavakalingwa. 18 Vepopila uti: ‘Etyi otyo tyapopia Tatekulu Ohamba Onene Siovaa, wati: “Ovakai vokutungila omavoko aeho onofita,* valingila omitwe aviho onoveu, vayeva omienyo viovanthu,* ngongo yavo! Mwati hamwe, onwe muyeva vala omienyo viovanthu* vange, onwe otyo muhupisa omienyo vienyi?* 19 Onwe munthyilisila umwe pokati kovanthu vange kombanda yomavoko evali osevata, novinyanya umwe vala viombolo,+ mwiipaa ava ñgeno vahupa,* amuhupisa ava ñgeno vankhia,* okupopila ovanthu vange omatutu, vatehelela ounkhembi wenyi?”’+
20 “Tatekulu Ohamba Onene Siovaa wati: ‘Tala, mandyimbeendela onofita mbenyi, vakai onwe, ombu muyeva nambo ovanthu* ngoviila, mandyimutukula-mbo pomavoko enyi, andyikutulula ava onwe mwakwata lwoviila. 21 Mandyikemutukula onoveu mbenyi, mandyiyovola ovanthu vange pomavoko enyi, kavakayeywa-yewa vali noonwe; onwe mamukankhola umwe okuti ame, ame Siovaa.+ 22 Mokonda onwe mwapola omutima ondingaviwa nomatutu+ enyi ngwe ame hemuhulilikile,* mwapa ononkhono omavoko ondingavivi opo ahatunde mondyila yae ombi,+ mphoko ukala-ko nomwenyo.+ 23 Otyo onwe vakai mwahamamonena vali omamonekelo omatutu, nokutapesa+ kamamutapesa vali; ame mandyikayovola ovanthu vange pomavoko enyi, onwe mamukankhola umwe okuti ame, ame Siovaa.’”