Wa Vali ku Timotiu
1 Ame Paulu, mutumwa wa* Kilisitu Sesusi kokwahanda kwa Huku, natuminwa ondaka yomwenyo utuka mu Kilisitu Sesusi yatolelwe,+ 2 nahonekela Timotiu, omona wange ndyihole:+
Okankhenda okanene katunda ku Huku, Tate, no ku Kilisitu Sesusi Tatekulu yetu kakale noove, atyiho nonkhenda yatyo, nombembwa yatyo.
3 Ame ndyipandula Huku, ou ndyilingila ovilinga vikola, ngeetyi ovo tate valingaile, tyasukuka umwe komutima, tyina ndyilivondela tyinthiki na tyitenya ove hikulimbwa nii vala. 4 Nga nasoka umwe kononkhuka mbove, pahe opo nahanda vala ñgeno ndyikumona, ndyipwile-vo vala mehambu. 5 Ame ndyihinangela eyumba-nthumbi liove liehe-liomaandambeyo,+ eyumba-nthumbi liali na nyoko-kulu Loinde na mee yove Eunise, ame ndyityii okuti otyo tyokuyumbako onthumbi tyili mwoove.
6 Otyo otyo ndyikuhinangelesila okuti, otyali wapewa na Huku tyinthiakana umwe ngatyina unthiakana potupia, otyali wapewa pweetyi nekuyambeka omavoko.+ 7 Mokonda Huku ketwaavelele omphepo yoluhuhu,+ mahi wetwaavela omphepo yononkhono,+ yonthyole, yonondunge. 8 Naina tyehekukundise tyokupopia ulinge ombangi ya Tatekulu,+ ulinge ombangi yange, ame wokwalinga onkhwatwa mokonda yae, mahi noove pola-ko kweetyi tyemone+ lioviwa ovipe, opamena mononkhono mba Huku.+ 9 Ngwe wetuyovola, etwiihana tulinge ovasukuki, ha vilinga vietu vietwiihanesa,+ mahi tyetwiihanesa omphango yae, okankhenda kae okanene.+ Otyo twetyipelwa-le mu Kilisitu Sesusi kohale-hale, 10 mahi pahe tyamoneka umwe nawa mokwahololoka Kwomuyovoli wetu, Kilisitu Sesusi,+ wokwanyima-ko ononkhia,+ oviwa ovipe+ ngavio aminikila navio omwenyo,+ neetyi tyokwahavolo,+ 11 oviwa ovipe evi nanakelwa ndyivipopie, ndyilinge omutumwa, ndyilinge omulongesi.+
12 Otyo naame ndyimonena emone eli,+ mahi ame katyinkhundisa.+ Mokonda Ou netavela ame ndyimwii, ame ndyityii umwe okuti metyivili okuyunga nawa evi nemupakulila atee onthiki ina iyapo.+ 13 Wahatunde mondyila yonondaka* mbweeta oviwa*+ ombu weiva kwaame, no meyumba-nthumbi lituka kokukala kumwe na Kilisitu Sesusi, no monthyole yatyo. 14 Paka nawa otyiwa otyo wapelwa momphepo ikola, ei ikala mwonthwe.+
15 Mwene noove utyii, ovalume aveho vo motyilongo tyo Asiya+ vandyeka-po, aveho novo Fiselu na Helemosene. 16 Tatekulu ape okankhenda veumbo lya Onesifolu,+ mokonda wamphamaika-le ehimbwe, omalienge ange kaemukundisile-ale. 17 Mahi, etyi ali mo Loma, welipilikileko umwe nokunthaindya atee ambasa. 18 Tatekulu emupe ombundi avase okankhenda katunda ku Siovaa* monthiki oyo. Ovilinga aviho alinga-linga mo Efesu ove uvii umwe nawa.