Isekiyele

18 Ondaka ya Siovaa aindyendela vali, aiti: 2 “Omuhe ou muna-o mo Isilayeli upopia-tyi, ou wokuti: ‘Ovohe ovo valia onouva mbatwanyanya, mahi kwalinga ouñge, o komayo ovana vatyo’?+

3 “‘Ndyitukaila umwe omwenyo wange,’ o Tatekulu Ohamba Onene Siovaa wetyipopia ‘onwe kamamupopia-popia vali omuhe oo mo Isilayeli.’ 4 Tala! Onohande ambuho — ame hekulu.* Ilinge ohande ya he, ilinge ohande yomona — ame hekulu. Ohande ilinga* onkhali, oyo mainkhi.

5 “‘Soka ñgeno pena omunthu umwe ondingaviwa, ulinga oviwa, ulinga evi viviuka. 6 Kali ovilikutila vialingilwa ovilolo konomphunda;+ kakatulila omaiho ae ovilolo vitoyesa* vieumbo lya Isilayeli; kasilisa omukai wa mukwavo,+ kalala nomukai uli konohanyi;+ 7 kalingi onya nawike,+ ou wemulevala okumupa opinyolo, wiikondola;+ kavake tya munthu,+ mahi upa okulia kwae ou wankhia ondyala,+ uvaleka ou weenda epene;+ 8 kalevalesa haa atenthekelwe-ko, kesuku nokutyitisa,+ uliyunga umwe ahalinge etyi tyahaviukile;+ omphela yovanthu vevali wiiviukisa, utupu oku ayembela;+ 9 kayeke-po ovitumino viange, utavela ovitumino viange vionomphela, opo alinge omunthu wotyili. Omulume ngo oo omuviukisi, oo makala-kala umwe nomwenyo,’+ o Tatekulu Ohamba Onene Siovaa wetyipopia.

10 “‘Mahi soka ñgeno omulume oo, una omona otyimphulu,+ hamwe omwipai,*+ okuti hatyo, hamwe ulinga tyike povipuka ovio, 11 (ngwe he ovipuka ovio kenevilinge) — omona oo ulia ovilikutila vialingilwa ovilolo konomphunda, ulala nomukai waamwene, 12 ulinga onya epongo, no wokwahepa,+ uvaka, tyina amalevalesa apewa opinyolo, keikondola, uyelulila omaiho ovilolo vitoyesa,+ ulinga novipuka ovikwavo vali vitoyesa,+ 13 okulevalesa utenthekelwe-ko, utyitisa+ — omona oo kamaende-ko ehimbwe. Ovipuka ovio aviho vitoyesa alinga, ovio mavimwiipaesa, ohonde yae maiwila kwe mwene.

14 “‘Pahe soka ñgeno umwe una omona, otyo alinga ononkhali omona otyo atala, utyimona umwe, mahi ngwe ahalingi ovipuka vilinga he. 15 Kali ovilikutila vialingilwa ovilolo konomphunda; kayelulila omaiho ovilolo vitoyesa vieumbo lya Isilayeli; kasilisa omukai wa mukwavo; 16 kalingi onya nawike; okulevalesa apewa opinyolo, keyaanyena; kavake natyike; mahi upa okulia ou wankhia ondyala, uvaleka ou una epene; 17 uliyunga ahalinge onya omuhepi, kalevalesa atenthekelwe-ko, atyitisa; ulandula vala ovitumino viange, utavela ovitumino viange vionomphela. Omulume ngo oo, kamankhila mononkhali mba he. Oo tyili makala-kala-ko umwe nomwenyo. 18 Mahi mokonda he uvakela mounkhembi, uvaka ou velikwai nae, walinga etyi tyapenga pokati kovanthu vae, mankhila umwe onkhali yae.

19 “‘Mahi onwe mamuti: “Omokonda yatyi omona ahavelelwa onombei mbonkhali ya he?” Omokonda omona walinga oviwa, waviukisa, wetavela ovitumino viange waendela-mo, makala-kala umwe nomwenyo.+ 20 Ohande ilinga* onkhali, oyo mwene inkhia.+ Omona kamakavelelwa onombei monkhali ya he, he kamakavelelwa onombei monkhali yomona wae. Wokuviukisa, makatiwa umwe waviukisa, ou wokulinga ovivi, akatiwa umwe wapengesa.+

21 “‘Pahe ine ondingavivi uyeka-po ononkhali alinga, alandula ovitumino viange, alingi oviwa, neetyi tyaviuka, tyotyili makala-kala nomwenyo. Kamakankhia.+ 22 Ovivi aviho alingaile natyike vali makatanthwa.*+ Makaka-kala umwe nomwenyo mokonda yokwalinga etyi tyaviuka.’+

23 “‘Okuti ame ndyihambukilwa ondingavivi okunkhia?’+ o Tatekulu Ohamba Onene Siovaa wetyitola. Ame etyi nahanda hakuti ñgeno uyeka-po-vo onondyila mbae onombi, akala-kala nomwenyo?’+

24 “‘Mahi ine omunthu ondingaviwa uyeka-po okuviukisa alingi etyi tyapenga,* alingi ovipuka aviho vitoyesa vilinga onondingavivi, okuti makala-kala nomwenyo? Ovipuka alingile viaviuka, natyike matyikahinangelwa.+ Makankhia mokonda kalingile omunthu wotyili, walinga onkhali.+

25 “‘Mahi onwe mamuti: “Ondyila ya Siovaa kayaviukile.”+ Tehelelei onwe umbo lya Isilayeli! Okuti ondyila yange oyo umwe yahaviukile?+ Hanondyila mbenyi-ko mbahaviukile?+

26 “‘Ine ondingaviwa uyeka-po okuviukisa kwae alingi etyi tyapenga, ankhila otyo alinga, makankhia mokonda yonkhali yae.

27 “‘Mahi ine ondingavivi uyeka-po ovivi alinga, ahimbika okulinga oviwa neetyi tyaviuka, makahupisa omwenyo wae* mwene.+ 28 Ine ulimona ayeke-po ovivi aviho alinga, opo tyili makakala-kala nomwenyo. Kamakankhia.

29 “‘Mahi eumbo lya Isilayeli malikati: “Ondyila ya Siovaa kayaviukile.” Okuti onondyila mbange ombo umwe tyili mbahaviukile ove umbo lya Isilayeli?+ Hanondyila mbenyi-ko mbahaviukile?’

30 “‘Ame mandyikaongela omphela munthu na munthu kombanda yonondyila mbae,+ ove umbo lya Isilayeli,’ o Tatekulu Ohamba Onene Siovaa wetyitola. Vakwe, tyiyekei-po, tyiyekei-po tyovivi vienyi aviho, viahapundikise ovanthu, amuvelwa onombei. 31 Tundei movivi aviho mwalinga-linga,+ kalei nomutima* omupe, nomphepo omphe,+ oityi unkhila,+ ove umbo lya Isilayeli?’

32 “‘Ame hihambukilwa omunthu nawike okunkhia,’+ o Tatekulu Ohamba Onene Siovaa wetyipopia. ‘Kondokei-vo, mukale-kale-ko umwe nomwenyo.’”+