Omukanda wa Vali Ehipululo
23 Menima lya pandu-vali, Seoyanda apameka omutima, alingi omphango* nononkhalamutwe mbotyita:+ Asaliya omona wa Selowau, na Isimayeli omona wa Seowanaa, na Asaliya omona wa Ombende, na Maaseya omona wa Andaiya, na Elisafate omona wa Sikili. 2 Konyima, avaenda-enda mo Sundaa aiho, avaongiya ovana va Levii+ vomapunda-umbo aeho o Sundaa, nonohongoi mbo Isilayeli. Etyi vehika mo Selusalei, 3 ewaneno aliho alilingi omphango+ nohamba mondywo ya Huku yotyotyili. Konyima, Seoyanda apopi okuti:
“Talei! Omona wohamba matumina, ngeetyi Siovaa alaele konthele yovana va Ndaviti.+ 4 Onwe muna okulinga ñgaa: votyikundyi tyimwe ovanakwa novana va Levii mavaundapa+ motyasapalo, avalingi vo konombundi,+ 5 tyimwe atyikala meumbo liohamba,*+ otyikwavo atyikala Kombundi Yelisesu. Ovanthu aveho vena okukala momapata ondywo ya Siovaa.+ 6 Mwahayekei nawike anyingile mondywo ya Siovaa, munyingile vala ovanakwa, novana va Levii veli nokuundapa.+ Ovo, vena okunyingila mokonda otyikundyi tyikola. Ovanthu aveho vena okulinga etyi vatumwa na Siovaa. 7 Ovana va Levii vapake pokati ohamba, otyo vakwata ovihongati viavo peke. Ou wamanyingila mondywo, aipawe. Kalei ponthele yohamba, na tyina ilupuka na tyina inyingila.”*
8 Ovana va Levii no Sundaa aiho, avalingi umwe etyi omunakwa Seoyanda evetuma. Aveho avaongiya ovalume veli nokuundapa motyasapalo, na vana vatunda movilinga motyasapalo,+ mokonda omunakwa Seoyanda kapolele otyikundyi+ natyike movilinga viavo. 9 Seoyanda omunakwa ape ononkhalamutwe mbotyita+ omaonga no nondyakulilo ononthutu* mbeliseta elola mbuna mbali mbohamba Ndaviti,+ mbuli mondywo ya Huku yotyotyili.+ 10 Apake ovalume aveho ponomphangu mbavo, munthu na munthu akwata ovihongati* avaoyo umwe ondywo aiho, okupolelela kokulio atee kokumbili, ponthele pomutala wovilikutila, ponthele pondywo, okuliseta nohamba. 11 Pahe, avaeta omona wohamba+ pondye, avemupake otyuuya,* Noumbangi,*+ avemuvialeka, ovo Seoyanda novana vae, avemulembula, avati: “Kala nomwenyo omule hamba!”+
12 Ataliya eivi ovanthu vaviela unene vahateka, otyo vahilivika ohamba, liwa-liwa aende atee no kuvo kondywo ya Siovaa.+ 13 Amono ohamba itai pomphandyi yae yo kombundi. Ovakwatesiko vohamba,+ no vokuhika ononkhwino, veli opo vena ohamba. Ovanthu aveho motyilongo veli nokuhela,+ otyo vahika ononkhwino. Ovaimbi vena oviti viavo viokuhika, ovo vakalela komutwe otyipito* otyo. Etyi Ataliya etyimona, atandaula ovikutu viae, apopila eliyavela ati: “Valinga onomphuki! Valinga onomphuki!” 14 Mahi omunakwa Seoyanda atolela ononkhalamutwe mbotyita, ovanene vatyo ati: “Mupolei pokati kovanthu, wamalandula ku-e mwipaei nomutunga!” Omunakwa ankho weveti: “Mwehemwipaelei mondywo ya Siovaa.” 15 Avemukwata etyi vehika Kombundi Yononkhambe, keumbo liohamba,* vati vala hikee opo, avemwipaa.
16 Seoyanda alingi omphango yokuti, ovanthu aveho, nohamba, nae mwene, mavatwalako okukala ovanthu va Siovaa.+ 17 Pahe ovanthu aveho avaende mondywo ya* Mbaale, aveihanye-po.+ Avahanyauna omitala viatyo viovilikutila, novilolo viatyo.+ Omunakwa wa Mbaale, Mataa, avemwipaela+ pomutala wovilikutila. 18 Pahe Seoyanda apakula otyilinga tyokuyunga ondywo ya Siovaa, pomavoko ovanakwa, novana va Levii, vana Ndaviti aonganekele ovikundyi opo vaundape mondywo ya Siovaa, okulingila Siovaa ovilikutila viokuyokwa,+ ngeetyi tyahonekwa Movitumino vya Mwisesi.+ Vetyilinga nehambu otyo vaimba ngeetyi tyapopile* Ndaviti. 19 Tupu apake ovayungi konombundi+ mbondywo ya Siovaa, opo mwahanyingile nawike wasila. 20 Pahe aongiya ononkhalamutwe mbotyita,+ nomanene atyo, novatumini, novanthu aveho motyilongo, avalandula ohamba yenda no kombwelo, kondywo ya Siovaa avatundu-ko, avaende no keumbo liohamba,* mahi vakwatele kombundi yokwaya peulu. Avapumphika ohamba kotyipundi+ tyoutumini.+ 21 Ovanthu aveho motyilongo avahambukwa, mepunda-umbo amukala ombembwa, mokonda Ataliya waipawa nomutunga, waipaelwa pondywo yohamba.