Wahonekelwa Ova Hembeleu
5 Mwene omunene-nakwa uholovonwa povanthu, anakwa evelingile ovilinga vya Huku,+ opo apakule evi viaawa, novilikutila vilingilwa ononkhali.+ 2 Ngwe weetehila-mo umwe onkhenda* ava vehena etyi vei, vokupengesa,* mokonda nae ulwa-vo nononkhali* mbae, 3 otyo nae alingila ovilikutila viononkhali mbae, ngeetyi alingila ononkhali mbovanthu aveho.+
4 Omunthu kalingi otyilinga otyo otyinene kokwelihinda kwae, otyo omunthu utyipewa vala tyina aihanwa na Huku, ngeetyi tyalingilwe Alau.+ 5 Na Kilisitu ongootyo, kelinkhimanekele elilingi omunene-nakwa,+ mahi wankhimanekelwe na Una wemupopilile okuti: “Ove umona wange; hono ame nalinga ho.”+ 6 Ngeetyi tupu apopile pamwe vali atile: “Ove molinga-linga umwe vala omunakwa, molingi lwa Melekisendeke.”+
7 Pweetyi apa Kilisitu eli pano pohi,* welivondelele, tupu waitile, tyokulila umwe, okutokesa umwe ononkhuka,+ okwiita ku Una ankho utyivila okumuyovola kononkhia, atehelelwa umwe etavelwa mokonda yonthilo yae na Huku. 8 Namphila ngwe omona wa Huku, mahi walongokela okutavela movipuka akondya-kondya navio.+ 9 Etyi pahe aviukiswa umwe,+ eyovo liahapu liovanthu aveho vemutavela alikala kolutei lwae,+ 10 mokonda wanakwa na Huku alinge omunene-nakwa lwa Melekisendeke.+
11 Onthwe ovinyingi-ale tuna-vio ñgeno tupopia viyemba kwe, mahi vipwiya okuvipotoyola, mokonda onwe mwatena kamwiivi. 12 Soka onwe pahe* ñgeno ñgaa muvalongesi, mahi nkhele mwesukisa omunthu umulongesa okuhimbikila umwe kweevi+ viokwapepuka vionondaka mbukola mba Huku, onwe mwakondoka vali kokupewa omahini, kokulia kwakwata kamuko. 13 Ngwe omunthu ukalela vala okutekulwa nomahini, oo kei ondaka yeetyi tyaviuka, oo nkhele onkhupula.+ 14 Mahi okulia kwakwata oko vokwakola-le, ava valinga umwe vionondunge vetyiliyise onondunge mbavo okukungunyika,* vetyivile okupunga ovipuka, no tyokwaviuka no tyokwapenga.