Ovilinga Viovatumwa
11 Pahe atyiivala kovatumwa* no ku vakwavo ankho veli mo Sundeya, okuti ovanthu vomihoko omikwavo navo pahe vetavela ondaka ya Huku. 2 Etyi Petulu eya mo Selusalei, vokwapola-po vala tyokupita ekwendye,+ avahimbika okumupopia,* 3 avati: “Otyili ove wanyingilile meumbo liovalume vahapitile ekwendye, amuli navo!” 4 Ngwe Petulu evepotoyolela umwe nawa atyiho, ati:
5 “Ame ankho ndyili mepunda-umbo lyo Sope ndyilikwambela, ndyikati ñgaa movililenya otyipuka tyilinga ngoti otyinyanga otyinene tyomulinya tyakwatwa komavava aeho ekwana otyo tyilauka no pohi, atyiya no pwaame.+ 6 Andyitale-po umwe nawa, ndyikati ñgaa pena ovinyama aviho viokuna ovikalo vikwana, noviyalalahi, noviila vyo meulu. 7 Pahe, andyiivi ondaka, aiivala okuti: ‘Petulu, katuka, ipaa ulie!’ 8 Ame andyiti: ‘Aasele, Tatekulu ame momulungu wange kamunenyingile etyi tyitoyesa, tyasila.’ 9 Mo lya vali ondaka yeivalela keulu aiti: ‘Wahatie-atie vali viasila ovipuka Huku asukula.’ 10 Aityipaleka vali lya tatu, atyiho atyinanenwa vali keulu. 11 Poola yatyo umwe opo, ndyikati ñgaa ovalume vetatu vetai kombundi meumbo ankho ndyilele, ankho vatumwa, vatunda ko Sesaleya.+ 12 Pahe omphepo ikola ainthi endei navo, wahahuhane. Ovalume ovo epandu avanthyindikila, atunyingila mondywo yomulume oo.
13 “Ngwe etweendesila umwe etuti wamona oandyu itai mondywo yae aiti: ‘Tuma ovanthu ko Sope vekekwihanene omulume utiwa o Simau, ou vati o Petulu,+ 14 oo oe mekupopila etyi noove no veumbo liove mamulingi muyovolwe.’ 15 Mahi etyi ame nahimbika okupopia, omphepo ikola aiwila muvo, ailingi umwe vala ngeetyi onthwe yetulinga-le po tete.+ 16 Okutala otyipuka otyo, ame andyihinangela ondaka Tatekulu apopaile, ankho uti: ‘Swau umbatisala nomeva,+ mahi onwe mamumbatisalwa nomphepo ikola.’+ 17 Ine Huku wapa ava otyali wevelinga vala otyali ngoonthwe vokutavela-le Tatekulu Sesusi Kilisitu, opo pahe, ame ame mandyityiki Huku?”*+
18 Okwiiva otyo, avamutu umwe,* pahe avankhimaneka Huku, avati: “Naina pahe novanthu vomihoko omikwavo Huku wevepa ombundi velivele vakamone omwenyo.”+
19 Vana pahe vokwelihanyaukile+ vala kombanda yokuhukaiswa, tyakatukile umwe pu Sitevau, avaende umwe, atyiti ava vaya no ko Fenisia, ava vaya no ko Sipele, no ko Andiokiya, mahi ankho ondaka veipopila vala ova Sundaa.+ 20 Mahi vamwe ankho vatunda ko Sipele no vo ko Silene aveya ko Andiokiya, avahimbika okupopila vokupopia elaka lyo Ngeleku, avaivisa oviwa ovipe vipopia Tatekulu Sesusi. 21 Mahi ngwe tupu ankho okuvoko kwa Siovaa* kunavo umwe, apetavela ovanthu ovanyingi avahulu ku Tatekulu.+
22 Ovipuka ankho veli nokulinga aviivala momakutwi ovewaneno lyo mo Selusalei, avatumu Mbalanambee+ aye ko Andiokiya. 23 Ngwe hikee kuna, ekemono okankhenda okanene ka Huku, ahambukwa, pahe ahimbika okuvepa ondundo aveho vahayeke-po Tatekulu vaike mwe omitima viavo;+ 24 ngwe Mbalanambee ankho omulume womutima omuwa, ankho weyula omphepo ikola, omunthu weyumba-nthumbi. Akuya vali ovanthu ovanyingi vahulile ku Tatekulu.+ 25 Pahe ngwe aende no ko Talusu akaovola Saulu.+ 26 Etyi velivasa, aveya nae no ko Andiokiya. Enima aliho ankho vakala pomaliongiyo ovewaneno lyo mo Andiokiya, otyo valongesa ovaunyingi, opo yatyo opo ko Andiokiya tyahimbika tyovalongwa okuvetumbula ngeetyi tyatuma Huku, okuveti Ovakwa-Kilisitu.+
27 Pononthiki mbatyo opo, ko Selusalei akutundu ovauli+ avalauka no ko Andiokiya. 28 Umwe ankho utiwa o Angambu,+ omphepo ikola aimupe okupopia ondyala imwe onene maiya motyilongo atyiho,+ ngwe ondyala yatyo oyo, yeileko pononthiki mba Kalaundiu. 29 Ovalongwa avelipakela-mo, munthu na munthu aete etyi evila,+ tyende tyikakwateseko*+ vakwetu ankho veli mo Sundeya; 30 ngatyo umwe valinga, avatumu ovo Mbalanambee na Saulu+ vevitwale kovakulu vatyo.