Wa Vali Wahonekelwa Ova Kolindu
4 Naina, mokonda onthwe tuna otyilinga etyi mokwalingwa vala okankhenda, onthwe katuyeke-ko. 2 Mahi twayeka-po viokukundisa, evi viokulingilwa pokamphengi, katulingi viounkhembi, katunkhingi mondaka ya Huku;+ mahi mokuhololola otyili, onthwe tulilekesa, omitima viovanthu aveho vikululuke, na Huku umwe utyeete.+ 3 Ine naina oviwa ovipe tupopia viahikwa, viahikilwa pu ava veli nokuvomba-ko, 4 pu ava huku youye uno*+ ahika konondunge, ava vehevataveli,+ opo otyimimi* tyomunkhima woviwa ovipe vya Kilisitu otyifwika tya Huku,+ tyahaliaimine muvo.+ 5 Onthwe etyi tuli nokupopia movanthu, katyiyembe kwoonthwe mwene, tyiyemba ku Kilisitu Sesusi walinga Tatekulu, no kwoonthwe mweetyi twalinga ovapika venyi kombanda ya Sesusi. 6 Mokonda wetyipopile o Huku wati: “Menthiki muvete otyitei,”+ ngwe pahe uli nokumimikila momitima vietu opo amimikile-mo+ nenoñgonoko liomunkhima wa Huku utunda kotyipala tya Kilisitu.
7 Mahi onthwe tuna olumono olu+ lwakala monombiya mboluma,+ omo lwakala omo, opo ononkhono mbalambakana mbulinge mba Huku, mbahalinge mbetu.+ 8 Onthwe twahitikinywa umwe na nthele na nthele, mahi hakuti katupikita umwe vali; twahimapala, mahi hakuti pahe neetyi tulinga tutupu vali;*+ 9 onthwe tuhukaiswa, mahi hakuti twesala omapongo;+ onthwe tufondolwa atutoko, mahi katuhanyuka.+ 10 Apeho tukalela vala okukoleleya, olutu lwetu luhungikwa ononkhia, tumoneswa emone nga Sesusi,+ no momalutu etu mutumbuke omwenyo ngo wa Sesusi. 11 Mokonda onthwe vokuna omwenyo, tukalela vala okuhungikwa ononkhia,+ tutyilingilwa umwe Sesusi, no momalutu etu aa ankhia mutumbuke omwenyo ngo wa Sesusi. 12 Naina mwoonthwe mututumbila ononkhia, mahi mwoonwe omwenyo.
13 Pahe mokonda tuna omphepo ike yonthumbi, ei yapopilwe yatiwa: “Ame nayumba-ko onthumbi, otyo napopila”;+ noonthwe twayumba-ko onthumbi, otyo tupopila, 14 tutyii okuti Ou wapindula-po Sesusi noonthwe meketupindula-po lwa Sesusi, meketulekesila kumwe noonwe.+ 15 Atyiho otyo, tyilingilwa onwe, okankhenda okanene kalinge vali okanyingi, mokonda ovanyingi veli nokupandula omunkhima wa Huku.+
16 Naina, onthwe katuyeke-ko, olutu lwetu kondye ngaluvototela ñgoo, mwene-mwene mokati tuvanthu umwe valinga vala ovape nthiki na nthiki. 17 Mokonda mbili ononkhumbi mbulamba, mbahaleme, ombo mbutweetela* omunkhima umwe omunene,* omunkhima umwe wahapu;+ 18 otyo twaika omaiho, ha mweevi vimoneka, mahi o mweevi viahamoneka.+ Mokonda evi vimoneka kavisete vilamba ondyila, mahi evi viahamoneka ovio vikala-kala-ko.