Eholololo Swau Amona
22 Pahe andekesa ondongi yomeva omwenyo,+ omeva asukuka alinga ngemanya lyo kilisitale, itunda potyipundi tya Huku, no po Tyondyona,+ 2 ilauka no pokati ketapalo, ondyila onkhanaila yepunda-umbo. Ondongi yatyo oyo, kononthele kuna omiti viomwenyo, menima, hanyi na hanyi viima, onohanyi mbatyo ambuho 12. Aa omafo atyo alinga okuhakula ovanthu vovilongo.+
3 Kutupu vali tyokuhinga ovipuka. Mahi tyati otyipundi tya Huku tyounene, otyipundi Tyondyona+ mavikakala mepunda-umbo omo, ovapika vae mavekemulingila ovilinga vikola; 4 mavakamona otyipala tyae,+ enyina liae malikahonekwa monombamba mbavo.+ 5 Tupu kamukanthikovaila vali,+ kavekesuka-le vali notyimimi tyokandiyelo nii otyitei tyekumbi,+ mokonda Siovaa* Huku mekevemimikila, avakalinga onohamba, avakatumaina umwe apeho.+
6 Oandyu aimphopila aiti: “Onondaka ombu mbuyumbwa onthumbi, o mbotyotyili;+ Siovaa,* Huku wafiminine ovauli,+ watuma oandyu yae ilekese ovapika vae ovipuka vina okumoneka apa katutu. 7 Tala! Ame oo ndyiya hisete.+ Uhambukwa oyou weendela monondaka mbeulo liombwingwa ei.”+
8 Ame Swau, ame neiva-iva ovipuka ovio, ame nevimona. Etyi neviiva, etyi nevimona, andyiikila konongolo ponomphai mboandyu yandekesa ovipuka ovio, ndyiifende. 9 Mahi oandyu ainthi: “Eloo! Wahalinge ngootyo! Ame naame ndyimupika mukwenyi, ndyimupika vala ngovakulu vove ovauli, naava vaendela monondaka mbombwingwa ei. Fenda Huku.”+
10 Aimphopila vali aiti: “Onondaka mbeulo liombwingwa ei wehembwiike, mokonda omuvo wanakwa uli popepi. 11 Ondingavivi mwene ipangele movivi viayo, ou wasila apangele mokwasila kwae; mahi ondingaviwa ahayekeko kokuviukisa, omusukuki ahatunde-mo mousukuki.
12 “‘Tala! Ame oo ndyiya hisete, ondyambi mandyipe ovanthu ndyina-yo, opo ndyifete munthu na munthu etyi tyata movilinga viae.+ 13 Ame Alfa, ame Omenga,*+ wo tete, wo kwahulilila, onthyimbi, onthyulilo. 14 Vahambukwa ovava vakoha omivalo viavo omilaale,+ vayekwa vaye komiti viomwenyo,+ vetavelwa vakwate ponombundi avanyingila mepunda-umbo.+ 15 Kondye kuna ovimbwa,* no vokulipaka momatambu, no mouhayo wokulihanda,* no vokwiipaa, no vokufenda ovika-huku, novanthu aveho vehole ounkhembi, vakalela vala okukemba.’+
16 “‘Ame Sesusi, natuma oandyu yange imupe oumbangi uyemba kovipuka ovio, netyilingila omawaneno. Ame mwii, tupu natuka mu Ndaviti,+ ame nthungululu yokutya.’”*+
17 Omphepo ikola ili nokwiihana,+ nayo nomphunga, okuti: “Endyu!” ou wetyiiva atie: “Endyu!” ou waliwa nohunga eye;+ ou wahanda, apole omeva omwenyo kotyali.+
18 “Ame ndyipa aveho oumbangi, aveho veiva onondaka mbeulo liombwingwa ei: Ine umwe uyawisa-ko kovipuka ovio,+ Huku memuyawisila kovihuna viahonekwa mombwingwa ei;+ 19 ine umwe upola-ko otyipuka tyimwe konondaka mbombwingwa yeulo eli, Huku mekemupola etyi ankho apewa tyitunda komiti viomwenyo,+ tyitunda mepunda-umbo likola,+ ovipuka viahonekwa mombwingwa ei.
20 “Ou upopia ovipuka evi wati: ‘Yoo, ame oo ndyiya hisete.’”+
“Amem! Endyu, Tatekulu Sesusi.”
21 Okankhenda okanene ka Tatekulu Sesusi kakale novasukuki.