Wa Vali Wahonekelwa Ova Kolindu
11 Nahandele ñgeno tyina namalambesa andyilingi ngoti nkhele onondunge mbatunda-mo, onwe amuliatelako vala. Mahi tyili muli umwe nokuliatelako vala ku evi ndyilinga! 2 Onwe ame mundingisa umwe onkhwelume lwa Huku,* mokonda mwene kohalwange omulume nemutolelele wike vala memunepe, mandyimutwala ankhemuhikiya umwe ku Kilisitu tyasukuka.+ 3 Mahi pahe nalinga otyiho, nati hamwe ngeetyi onyoka yayondyele Eva, mokwelilungukisa kwayo,+ noonwe omalusoko enyi maasiliswa, amutundu kokulinga ovanthu votyili, kokwasukuka, amwahatemo vali mokulinga va Kilisitu.+ 4 Mokonda ngwe ine umwe uya, apopi Sesusi omukwavo, ahapopi ou onthwe twapopia, hamwe amutambula omphepo imwe vali ilikalela neei mwatambula-le, hamwe oviwa ovipe vilikalela neevi mwetavela-le,+ mamukati vala ñgaa muli moyae. 5 Ame na tyina ndyitala petupu otyipuka natyike ndyitila ndyimututu vali kovatumwa vavo ovanene.+ 6 Namphila ame nehemunongo kokupopia,+ mahi enoñgonoko, olio ndyina-lio; mwene noonwe mwetyimona umwe nawa movipuka aviho tulinga, no omu tuvilingila.
7 Ine pahe mwati ame, ame ndyinapo onkhali ame wokwelikondola koututu onwe mulinge ovanene, etyi mwene kokwahanda kwange nemupopila oviwa ovipe vya Huku otyali?+ 8 Ame omawaneno neekatula umwe,* netavela evi vampha-ampha ndyityivile okulingila onwe.+ 9 Mahi, etyi ankho ndyili oko noonwe, nakambele umwe vimwe, mahi hemupele vali ovilinga mokonda vakwetu vatundile ko Masendonia vamphele evi ankho nakamba-kamba.+ Ame pahe nalinga tyokuti nahalinge omutengi wenyi motyipuka natyike, otyo mandyilingila umwe ononkhono nehemupe ovilinga.+ 10 Mwene omu otyili tya Kilisitu tyakalela umwe mwaame, hityiyeke-ale tyokulimphandela otyo,+ monohika mbo Akaya. 11 Omokonda yatyi? Okuti o mokonda onwe himuhole? Ame ndyimuhole umwe, na Huku utyii.
12 Mahi etyi ndyilinga himetyiyeke,+ opo ava vokuhanda okulifwa noonthwe vahamone apa vatatesila, movipuka* evi velimphandela. 13 Mokonda ovalume ovo havatumwa-le, o vomatutu, ovilinga viavo o viounkhembi, velipaka otyivala tyovatumwa va Kilisitu.+ 14 Ngwe otyo katyihuvisa-le, na Satanasi ulipaka otyivala tyoandyu yotyitei.+ 15 Otyo onthwe tyehetuhuvisila tyina tutala ovaundapi vae navo veliuunda otyivala tya ava vaviukisa. Mahi movilinga viavo, oku mavakavitukila oko umwe.+
16 Ame ndyiwana-po vali: Pahamone nawike uti hamwe ndyitupu onondunge. Mahi ine otyo tyiya momitwe vienyi, naina tyikale ngootyo, ndyitupu onondunge, naame ndyilimphande-vo katutu. 17 Ame ndyili nokupopia, mahi hakuti tyampha okupopia okulinga ovipuka lwa Tatekulu, mahi o tyoutyova, tyo ou uliyumba onthumbi elimphande. 18 Ovanyingi mokonda velimphanda lwohitu,* naame mandyilimphande. 19 Soka onwe vokuna “onondunge,” muli vala nokuliatela evi vilinga ovityova. 20 Onwe ava vemutyitula ovapika muvetala vala, valia tyenyi, vemupunda etyi muna-tyo, velipaka kounene onwe vemutombe, vemuveta motyipala nomalukuhi.
21 Ame nokutyipopia tyinkhundisa, vapondola okuti hamwe twayengenga.
Mahi ine vamwe vetupu otyinkhe — ndyili nokupopia lwoutyova — naame ndyitupu otyinkhe. 22 Ngwe ovo ova Hembeleu? Naame ndyimu Hembeleu.+ Ovo ova Isilayeli? Naame ndyimu Isilayeli. Ovo vatuka* mu Ambalayau? Naame omo natuka.+ 23 Ovo ovaundapi va Kilisitu? Opo pahe ndyikumbulula umwe ngotyova, ame ame umwe muundapi watyo mwene wa Kilisitu: Ame nalinga vali ovinene,+ nekehulaile movikaleya,+ natutunthwa-tunthwa-le ehimbwe, ehimbwe-ale nahupaila-ko ñgeno nankhia.+ 24 Tutano navetelwe novimbonde nova Sundaa, ko 40 akukambe tyike,+ 25 tutatu navetelwe novimbonde,+ like navetelwe nomamanya,+ tutatu himaa ndyinkhila melunga,+ andyikala otyinthiki tyike notyitenya mokati kelunga; 26 ndyeenda-enda vala unene, ñgeno nankhia-le konondongi, ñgeno nankhia-le kovifwanga, ñgeno nankhia-le kovange mwene,+ ñgeno nankhia-le ko vovilongo,+ ñgeno nankhila-le momapunda-umbo,+ ñgeno nankhila-le momaluhandya, ñgeno nankhila-le melunga, ñgeno nankhia-le ko vokuliti navo ovataveli, 27 okututumba, okukondya novilinga, okwahamono olumphoki ovinthiki novinthiki,+ ondyala handyala, ohunga hahunga,+ ehimbwe-ale nakala tyehena okulia,+ nakondya noutalala, nakala tyehena apa ndyivala.*
28 Ovio ngootyo o vyo kondye vala, ndyina vali tyimwe tyitutumba vala nthiki na nthiki tyili mokati kange omu: otyiho nomawaneno aeho.+ 29 Olie umwe hono usoya, ame atyahanthyoyesa? Olie umwe hono utoka, ame atyehendyihama?
30 Ine ame ñgeno ndyilimphanda, mandyilimphandela ovipuka vilekesa apa nayengenga. 31 Huku, Tate ya Tatekulu Sesusi, Ou una okuhilivikwa apeho, utyii okuti hili nokukemba. 32 Ko Ndamasiku omutumini watuminwe nohamba Aleta apake ovayungi konombundi mbepunda-umbo lyo va Ndamasiku vankhwate, 33 mahi andyipakwa mosesu* andyikwateswa pondyanena motyimato tyepunda-umbo,+ andyihupu umwe kokuvoko kwae.