Wahonekelwa Ova Loma
4 Naina ine ongootyo, opo etyi ombwale yetu kohitu Ambalayau apola-po matutyitiwi? 2 Ine Ambalayau watilwe tupu ondingaviwa ovievi alinga, opo ankho upondola umwe okulimphanda, mahi ehelimphandela mu Huku. 3 Oityi ovihonekwa vipopia? “Ambalayau wayumbile onthumbi mu Siovaa,* otyo akatilwa ondingaviwa.”+ 4 Omuundapi okufetwa katyitiwa walingwa okankhenda, wapewa vala ondyambi* yae. 5 Mahi omunthu wehena ovilinga alinga, ayumbu onthumbi mu Ou upondola okutala ondingavivi emuti ondingaviwa, omunthu oo matiwa ondingaviwa tyeyumba-nthumbi olio ena-lio.+ 6 Na Ndaviti wapopia ehambu liomunthu Huku atala emuti ondingaviwa, ahatale kovilinga viae, wati: 7 “Vahambukwa ovava vapikiyile ovitumino avaevelwa, vononkhali mbahikwa;* 8 uhambukwa oyou una onkhali mahi Siovaa* ehesuku vali nayo.”+
9 Okuti naina vamona ehambu olio, ovokwapita vala ekwendye, ine no vokwahapitile ekwendye?+ Onthwe tuti: “Eyumba-nthumbi lya Ambalayau olio ekemutila ondingaviwa.”+ 10 Onalupi akatiwa ondingaviwa? O pweetyi apita-le ekwendye, ine o pweetyi ehenepite ekwendye? O pweetyi nkhele ehenepite ekwendye. 11 Watambulile otyilekesa+ — etyi tuti okwenda ekwendye — ngatyo tyilinga otyilimbo* tyimuti ondingaviwa mokonda yeyumba-nthumbi ankho ena-lio-ale+ pokweheneende ekwendye, alinge he yovanthu aveho vena eyumba-nthumbi vahapitile ekwendye, navo vatiwe onondingaviwa; 12 alinge he yo vomuhoko wo vokwapita ekwendye, mahi ahalingi vala he yo ovo vokwenda ekwendye, tupu alinge he yaava veli monomphai mbeyumba-nthumbi mba tate yetu Ambalayau,+ wali neyumba-nthumbi pokwehenepite-ale ekwendye.
13 Mokonda hatyovitumino-ko Ambalayau no vokwatuka mwe* vakatilwa mavakalinga onomphinga mbouye,+ mahi otyeyumba-nthumbi lievekalesa onondingaviwa.+ 14 Ine ava vapola-po tyovitumino ovo onomphinga, opo naina eyumba-nthumbi kalisilivila, neetyi tyatolewe opo naina tyanyimwa-po-ale. 15 Mahi mwene, Ovitumino vityita onyengo,+ apa pehena otyitumino nonkhali kaikala-po.+
16 Otyo mwene tyilingila tyeyumba-nthumbi, tyituke mokankhenda okanene,+ opo etyi tyatolelwe tyilinge otyili kovanthu aveho vatuka mwe,*+ ha kwaava vala vapola-po Tyovitumino, mahi no kwaava vapola-po tyeyumba-nthumbi lya Ambalayau, tate yetu atuho.+ 17 (Ngwe mwene tyahonekwa-ale: “Ame nekunaka ulinge he yomihoko, omihoko nomihoko.”)+ Otyo tyali otyilekesa tya Huku, ou ngwe ayumba onthumbi, upa omwenyo vokwankhia, uti tyina apopia evi vieheko uvipopia ngatyina oko vili.* 18 Namphila ankho ehetyisoko-ale vali, mahi akevela-ko umwe, ayumbu-ko onthumbi okuti malingi he yomihoko nomihoko mokonda otyo atolelelwe, watilwe: “Ongootyo ava vakatuka mwoove* mavakakala.”+ 19 Otyili, eyumba-nthumbi liae ankho kaliatepulukile, mahi tyina atala ñgaa olutu lwae uti lwankhia-le (mokonda ankho una-le omanima ekehika 100),+ na tyina atala ñgaa, ela lya Sala ankho uti liankhia-le.*+ 20 Mahi tyondaka atolelelwe na Huku, eyumba-nthumbi liae kaliatengaile; eyumba-nthumbi liemupele umwe okulinga ovinene, ape omunkhima Huku, 21 ankho wayumba-ko umwe onthumbi okuti Huku etyi apopia, nokutyilinga utyivila.+ 22 Otyo, “otyo atilwa ondingaviwa.”+
23 Mahi, ondaka “otyo atilwa” hae vala yahonekelwa,+ 24 yahonekelwa umwe noonthwe, onthwe matukapopiwa ngootyo, mokonda tutavela ku Ou wapindula-po Sesusi Tatekulu yetu kovokwankhia.+ 25 Wapakulilwe tupu o kombanda yoviponyo vietu,+ apindulwa-po, onthwe tutiwe tunondingaviwa.+