Omukanda wo Tete Onohamba
2 Etyi Ndaviti ehungi kokunkhia, alongesa omona wae Salomau ovipuka evi: 2 “Ame ñgaa mandyinkhi-ale.* Kola omutima,+ kala omulume.+ 3 Linga atyiho Siovaa Huku yove ekutuma, okweendela monondyila mbae, otavela etyi ekutolela, novitumino viae aviho, novitumino viae vionomphela nomalondolo* ae ngeetyi tyahonekwa Movitumino viapelwe Mwisesi.+ Okulinga ngootyo, ove mokala omunongo mu atyiho ulinga,* akuho oku moende nako. 4 Siovaa mafwisapo omphango alinga, etyi ati: ‘Ine ovana vove vakakatela monondyila mbange, avalingi umwe votyili komaiho ange nomutima wavo auho nomwenyo wavo auho,*+ apeho makukakala umwe makatuka mwoove* makapumphama kotyipundi tyoutumini wo Isilayeli.’+
5 “Tyihe-otyo vala, ove utyii etyi Sowambe omona wa Seluya andinga neetyi alinga ononkhalamutwe onombali mbomafwalali ova Isilayeli, Ambinele+ omona wa Nele na Amasa+ omona wa Setele. Weveipaa, okunengula ohonde+ mononthiki mbombembwa ngatyina omononthiki mbovilwa, asilisa ekwamo liae ankho ena-lio monomanekelo nononkhaku mbae ankho ena-mbo konomphai nohonde ngo yovilwa. 6 Ove una okweendela mounongo wove, wahayeke onohuki mbae onongonga mbwende nombembwa Kondyembo.*+
7 “Mahi kala nolwembia olunene novana va Mbalasilai+ omu Sileyande, ovana ovo vena okukala pu vana valia komesa yove mokonda vahulile kwaame+ etyi naya-nkholo Ambisalau,+ omukulu wove.
8 “Simei omona wa Sela omu Mbesamii wo ko Mbaulii kakala kokule. Oe wantheyela onkhano+ monthiki naya ko Maanaii,+ mahi etyi andandula ko Solondau, ame andyiane menyina lya Siovaa okuti: ‘Ame himekwipaa nomutunga.’+ 9 Pahe wehemuhupise,+ ove umulume omunongo, utyii etyi una okumulinga. Wehemuyeke aye Kondyembo* mokonda vala yokwakulupa.”*+
10 Ndaviti akapululukwa-po novakwaukulu vae, akapakwa Kepunda-umbo lya Ndaviti.+ 11 Ononthiki Ndaviti atumina mo Isilayeli mbutuuka omanima 40. Mo Hemboloo+ watuminine-mo omanima 7, mo Selusalei watuminine-mo omanima 33.+
12 Salomau alondo kotyipundi tyoutumini tya tate yae Ndaviti. Katutu-katutu ouhamba wae auhimbika okupama.+
13 Etyi pakala, Andoniya omona wa Hasite akapopia na Mbate-Semba ina ya Salomau. Mbate-Semba emupulu okuti: “Weya vala ombembwa?” Ngwe akumbulula okuti: “Yoo, neya vala ombembwa.” 14 Ayawisa-ko okuti: “Pena etyi nahanda okukupopila.” Mbate-Semba ati: “Popia.” 15 Ngwe ati: “Ove utyii nawa okuti ouhamba maa ulinga wange,+ ova Isilayeli aveho ankho vakevelela* ndyilinge ohamba, kwakambele katutu ouhamba ñgeno wakala pomavoko ange, mahi pahe wakala wondenge yange, mokonda oe Siovaa ahanda akale ohamba.+ 16 Pahe ndyina vala otyipuka tyike mandyihande okukwita. Wahaanye etyi mandyikwiti.” Ngwe ati: “Popia.” 17 Emupopila okuti: “Mbambavo, ndyitile-vo kohamba Salomau indyavele Ambisange+ omu Sunei opo akale omukai wange. Ove kamekwanye etyi waita.” 18 Mbate-Semba ati: “Tyikahi nawa! Mandyikekupopila-ko kohamba.”
19 Ngootyo Mbate-Semba aende kohamba Salomau opo akapopile-ko Andoniya. Ohamba aikatuka liwa-liwa, aiya no kwe, ailipetamena-po. Pahe aipumphama kotyipundi tyoutumini wayo, aitumu vapake kokulio kwae otyipundi otyikwavo tyoutumini kupumphame mee yae. 20 Ina emupopila okuti: “Pena okapuka kamwe nahanda okukwita. Wahandyanye etyi mandyikwiti.” Ohamba aiti: “Mee ita, himaanye etyi moiti.” 21 Emwiiti okuti: “Avela omukulu wove Andoniya, Ambisange omu Sunei akale omukai wae.” 22 Ohamba Salomau aikumbulula ina aiti: “Omokonda yatyi wahandela Ambisange omu Sunei ende ku Andoniya? Mee ove wakamba vala okwiita ouhamba wende kwe,+ mokonda oe omukulu wange+ ukwateswako na Ambiyatale omunakwa na Sowambe+ omona wa Seluya.”+
23 Ohamba Salomau aane menyina lya Siovaa ati: “Huku amonese ononkhumbi etyilinge nonya ine Andoniya otyipuka otyo aita kamapeseka komwenyo wae.* 24 Na Siovaa umwe una omwenyo, una wokwamphaka kotyipundi tyoutumini+ wa tate yange Ndaviti, wanthungila ondywo*+ ngeetyi alaele, hono Andoniya una okunkhia.”+ 25 Ohamba Salomau aitumu liwa-liwa Mbenaya+ omona wa Seoyanda, aende akavanga* Andoniya ankhi.
26 Ohamba aipopila omunakwa Ambiyatale+ okuti: “Enda konohika mbove ku Anatote!+ Ove ankho una okwipawa, mahi himekwipaa onthiki yo hono mokonda ove watyindile Otyikasa tya Tatekulu Ohamba Onene Siovaa pononthiki mba tate yange Ndaviti,+ ove wakalele na tate movitateka aviho alambelele.”+ 27 Salomau ataata Ambiyatale movilinga vya Siovaa viounakwa, opo onondaka Siovaa apopilile veumbo lya Elii+ ko Silo+ mbufwiswepo.
28 Etyi Sowambe etyiiva — mokonda Sowambe wakwatesileko Andoniya,+ mahi kakwatesileko Ambisalau+ — Sowambe akahateka no mekaka lya Siovaa,+ akakatela monombinga mbomutala wovilikutila. 29 Avapopila Ohamba Salomau okuti: “Sowambe waya-nkholo no mekaka lya Siovaa, ukahi ponthele yomutala wovilikutila.” Ngootyo, Salomau atumu Mbenaya omona wa Seoyanda okuti: “Enda kemwipae!” 30 Mbenaya aende kekaka lya Siovaa, akapopila Sowambe okuti: “Ohamba yati: ‘Lupuka pondye!’” Mahi ngwe ati: “Au! Mandyinkhila vala muno.” Mbenaya akondoka eketyipopila ohamba ati: “Ongotyo Sowambe apopia, otyo ankhumbulula ngootyo.” 31 Ngootyo, ohamba aimupopila okuti: “Linga ngeetyi apopia, mwipaa omuhihila, pola onombei kwaame no ko vomeumbo lya tate mbohonde yovanthu vahalingile natyike Sowambe aipaa.+ 32 Siovaa memutahela onombei mbohonde anengula, mokonda waipaa ovalume vevali ovaviuki, vekahi vali nawa kwe, otyo tate yange Ndaviti ehetyii, wevevanga eveipaa nomutunga. Waipaa Ambinele+ omona wa Nele onkhalamutwe yomafwalali o Isilayeli,+ na Amasa+ omona wa Setele, onkhalamutwe yomafwalali o Sundaa.+ 33 Onombei mbohonde yavo mbutokele komutwe wa Sowambe, no komitwe viovana* vae atee-tee;+ mahi ku Ndaviti, no kovana* vae, no ko veumbo liae, kukale ombembwa ya Siovaa atee-tee.” 34 Mbenaya omona wa Seoyanda akondoka, avange Sowambe emwipaa; akapakwa meumbo liae mwene moluhandya. 35 Ohamba aiholovona Mbenaya+ omona wa Seoyanda akala onkhalamutwe yomafwalali, pomphangu ya Sowambe; aipake Sandoke+ omunakwa pomphangu ya Ambiyatale.
36 Pahe ohamba aiihana Simei+ aimupopila okuti: “Tunga eumbo mo Selusalei, omo ukala; wahatunde mepunda-umbo oende komphangu onkhwavo. 37 Monthiki motundu-mo oyauka Elola lyo Kindoloo,+ noñgonoka okuti monkhi. Onombei mbohonde yove mambulingi mbove mwene.” 38 Simei apopila ohamba okuti: “Tatekulu etyi wapopia tyaviuka. Omuundapi wove malingi ngeetyi tatekulu hamba wapopia.” Simei akala mo Selusalei ononthiki ononyingi.
39 Etyi palamba omanima etatu, ovapika va Simei avaende-nkholo avakaholama ku Akisi,+ omona wa Maakaa, ohamba yo Ngate. Etyi vetyipopila Simei okuti: “Ovapika vove veli ko Ngate,” 40 Simei avelama kotyimbulu, aende ku Akisi ko Ngate, akapola ovapika vae. Etyi Simei atunda ko Ngate novapika vae, 41 avapopila Salomau okuti: “Simei watunda mo Selusalei, waile ko Ngate, pahe wakondoka-le.” 42 Ohamba aitumu okwihana Simei, aimupulu okuti: “Katwalingile omulao menyina lya Siovaa, andyikupopila okuti: ‘Monthiki motundu muno, oende no komphangu imwe, noñgonoka okuti monkhi?’ Ove kwakumbululile okuti: ‘Tatekulu etyi wapopia tyaviuka, mandyityitavela?’+ 43 Omokonda yatyi wahafwisilile-po omulao walinga ku Siovaa notyitumino etyi nekwavela?” 44 Ohamba aipopila Simei okuti: “Ove utyii nawa momutima wove ovivi aviho walinga tate yange Ndaviti;+ Siovaa mekukondolela ovivi walinga vitokele komutwe wove mwene.+ 45 Mahi Siovaa mayambe Ohamba Salomau,+ otyipundi tyoutumini wa Ndaviti atyikala tyapama atee-tee.” 46 Ohamba aitumu Mbenaya omona wa Seoyanda, aende akavanga Simei ankhi.+
Ngootyo ouhamba aukala tyapama pomavoko a Salomau.+