Omukanda wo Tete wa Samuwele
20 Pahe Ndaviti akahateka aende no ko Naiyote ko Lamaa. Aende ku Sonataa emupulu okuti: “Oityi nalinga?+ Oityi nalinga tyaleva tate yove, onkhali patyi nalinga, etyi tate yove ahanda okumphola omwenyo?”* 2 Sonataa ati: “Otyo katyipondola okulingwa!+ Ove kumaipawa. Tala! Tate kamekulingi natyike, etyi malingi, tyilinge otyinene tyilinge otyitutu metyipopi. Okuti tate manthyoleka otyipuka otyo? Nii kametyinthyoleka!” 3 Mahi Ndaviti aane apopi okuti: “Tyotyili, tate yove utyii okuti ove unthyole unene,+ upondola okusoka okuti, ‘Sonataa kapondola okutyiiva opo ahanumane.’ Na Siovaa umwe una omwenyo, noove una* omwenyo, ame ndyikahi pokati kononkhia!”+
4 Sonataa apopila Ndaviti okuti: “Mandyilingi atyiho ove upopia.”* 5 Ndaviti apopila Sonataa okuti: “Muhuka ohanyi maiviale,+ ndyityii okuti ohamba maihande tukalie nayo; hahe ndyende, andyikaholama mohika atee muhuka-lina kounthiki. 6 Ine tate yove umphula, mupopila uti: ‘Ndaviti waita kwaame, opo aye ko Mbelei kotyilongo tyavo,+ vakalinge otyilikutila tyenima nombunga aiho.’+ 7 Ine ukupopila okuti: ‘Tyikahi nawa,’ opo omuundapi wove kamatili owoma. Mahi ine unumana, ove motyinoñgonoka okuti naina wahanda okundinga omapita. 8 Kala nolwembia olunene nomuundapi wove,+ mokonda ove walinga omphango nomuundapi wove komaiho a Siovaa.+ Mahi, ine ndyina etyi nalinga tyapenga,+ ndyipae umwe mwene ove. Omokonda yatyi momphakulila ku tate yove?”
9 Sonataa emupopila okuti: “Wahapopie otyipuka otyo! Ine ame ndyityiiva okuti tate yange mekulingi otyipuka otyivi, ame ndyikupopila.”+ 10 Pahe Ndaviti apulu Sonataa okuti: “Olie mamphopila ine tate yove ukukumbulula tyanumana?” 11 Sonataa apopila Ndaviti okuti: “Twende atuho kondye yepunda-umbo.” Ngootyo aveho vevali avatundu mepunda-umbo. 12 Sonataa apopila Ndaviti okuti: “Siovaa Huku yo Isilayeli akale ombangi, ame muhuka ngo opo, ine omuhuka-lina mandyiovola okunoñgonoka etyi tate ekahi nokusoka. Ine etyi asoka konthele yove* tyaviuka, okuti himekupopila? 13 Mahi, ine tate wahanda okukulinga omapita, ame anehekupopila-tyo wende nombembwa, opo Siovaa amonese ononkhumbi* mahi etyilinge nonya. Siovaa akale noove+ ngeetyi akalele na tate.+ 14 Ove kala nolwembia olunene naame nga Siovaa, tyina nkhele ndyina omwenyo, atee umwe tyina nankhia.+ 15 Wahayeke-po okukala nolwembia olunene no vomeumbo liange,+ atee umwe tyina Siovaa amanyimiko onondyale ambuho mba Ndaviti kombanda yohi.” 16 Sonataa alingi omphango neumbo lya Ndaviti, ati: “Siovaa makoyesa onondyale mba Ndaviti.” 17 Sonataa aiti Ndaviti aane vali okuti mavakala omapanga aveheliyeke, mokonda yolwembia memulingi, mokonda ngwe umuhole ngeetyi mwene elihole.*+
18 Sonataa emupopila okuti: “Ohanyi maiviale muhuka,+ matyimoneka okuti kweile, mokonda pomphangu yove petupu ou makala-po. 19 Muhuka-lina matyimoneka vali nawa okuti kweile, holama pomphangu apa waholamene-ale onthiki ina,* kala monkhanda ei. 20 Ame mandyiyahe onohevo ononthatu ponthele yayo, ngatyina ndyina etyi ndyiyaha. 21 Putyina ame namatumu omukwatesiko wange, mandyiti: ‘Kapole onohevo.’ Ine ndyipopila omukwatesiko wange okuti: ‘Onohevo mbuli vali nthele ino kuno, mbeeta,’ opo ngootyo upondola okuya, mokonda na Siovaa umwe una omwenyo, otyo matyilekesa okuti ukahi mombembwa, kumakala notyitateka natyike. 22 Mahi, ine ndyipopila omukwendye okuti: ‘Onohevo mbuli vali nthele ina kuna,’ opo enda mokonda Siovaa wekulekesa okuti ove una okwenda-nkholo. 23 Omphango twalinga,+ Siovaa akale apeho ombangi pokati ketu.”+
24 Ngootyo Ndaviti aholama kondye yepunda-umbo. Etyi ohanyi yaviala, ohamba aipumphama opo valie.+ 25 Ngeetyi valinga-linga, ohamba aipumphama pomphangu yayo poluhinyi. Sonataa upumphi komutwe wayo, Ambinele+ upumphi ponthele ya Saulu, mahi pomphangu ya Ndaviti petupu ou upumphi-po. 26 Saulu ahapopi natyike monthiki oyo, wati: ‘Hamwe pena etyi alinga, kasukukile.+ Tyipondola wasila.’ 27 Monthiki yavali, pomphangu ya Ndaviti petupu ñgoo nawike. Saulu apulu omona wae Sonataa okuti: “Omokonda yatyi omona wa Sesee+ eheililile okulia, nii mongulo nii hono?” 28 Sonataa akumbulula Saulu okuti: “Ndaviti wandyita opo ende ko Mbelei.+ 29 Wandyita okuti: ‘Mbambavo ndyeke-vo ndyende, mokonda ombunga yange maikaava otyilikutila mepunda-umbo, omukulu wange wandyihana. Ine unthyole, ndyeke-vo tukelimone-po novakulu vange.’ Otyo eheililile okulia nohamba.” 30 Saulu anumanena unene Sonataa emupopila okuti: “Mona womukai omphuki! Wasoka okuti ame hityii okuti ove waama komona wa Sesee? Otyo matyimukundisa noove na nyoko.* 31 Omona wa Sesee okukala nomwenyo kombanda yohi, nii ove nii ouhamba wove kamaukala tyapama.+ Tuma omunthu opo ekemweteko, mokonda una okunkhia.”*+
32 Mahi, Sonataa apulu tate yae Saulu okuti: “Omokonda yatyi aipaelwa?+ Oityi alinga?” 33 Ngootyo, Saulu ayumbu eonga opo emwipae,+ Sonataa amono okuti tate yae wahanda umwe okwipaa Ndaviti.+ 34 Sonataa anumana unene, akatuka ko mesa ahali natyike monthiki oyo yavali yohanyi yaviala, mokonda tyemwihamene unene tya Ndaviti okwipawa,+ neetyi akundiswa na he.
35 Etyi kwatya, Sonataa aende kondye yepunda-umbo opo vekelivase na Ndaviti, aende nomukwendye omukwatesiko wae.+ 36 Apopila omukwatesiko wae okuti: “Enda, hateka kakoye-ko onohevo ndyikahi nokuyaha.” Omukwatesiko ahateka, Sonataa ayahe ohevo aimulambe. 37 Etyi omukwatesiko ehika apa Sonataa aviukisa ohevo, Sonataa alaveleya omukwatesiko okumupula okuti: “Ohevo kaili vali komutwe?” 38 Sonataa aihana omukwatesiko wae okuti: “Kanyauka hateka! Wahasete!” Omukwatesiko akoyo-po onohevo akondoka no ku Sonataa. 39 Mahi omukwatesiko utupu-ale etyi ei; vetyii vala ovo Sonataa na Ndaviti. 40 Sonataa aavela ovihongati viae omukwatesiko wae, ati: “Enda, vitwala mepunda-umbo.”
41 Etyi omukwatesiko akondoka, Ndaviti atundu apa aholamene, okuyemba kombwelo. Aikila konongolo, elipetamena-po tutatu, avelihipi onombesu avalili, mahi walilile vali unene o Ndaviti. 42 Sonataa apopila Ndaviti okuti: ‘Enda nombembwa mokonda twalinga omphango atuho vevali atwaane+ menyina lya Siovaa okuti: ‘Siovaa akale ombangi pokati ketu noove no pokati kovatekula vove* novatekula vange* atee-tee.’”+
Pahe Ndaviti akatuka aende, Sonataa akondoka mepunda-umbo.