Omukanda wo Tete wa Samuwele
16 Pahe Siovaa apopila Samuwele okuti: “Atee nalupi mokala tyeihamenwa mokonda ya Saulu,+ tyina ame nemwanya-le akale ohamba yo Isilayeli?+ Paka omulela mombinga yove aiyula,+ oende. Mandyikutumu ku Sesee+ wo ko Mbelei, mokonda naholovona umwe povana vae opo akale ohamba.”+ 2 Mahi Samuwele ati: “Mandyeende ñgeni? Saulu okutyiiva, mandyipaa.”+ Siovaa emukumbulula ati: “Tyinda onthane ondema, oti: ‘Neya okulingila Siovaa otyilikutila.’ 3 Konga Sesee eye potyilikutila, ame mandyikupopila etyi una okulinga. Una okulembula omunthu ame mandyikulekesa.”+
4 Samuwele alingi atyiho Siovaa emupopila. Etyi ehika ko Mbelei,+ ovakulu vo mepunda-umbo nowoma avateketa, avati: “Weya vala ombembwa?” 5 Ngwe evekumbulula okuti: “Neya ombembwa. Neya okulingila Siovaa otyilikutila. Lisukukisei twende atuho kotyilikutila.” Ngootyo, asukukisa Sesee novana vae, konyima evekongo kotyilikutila. 6 Etyi vanyingila, Samuwele amono Eliyambe,+ ati: “Tyotyili, ou omulembulwa wa Siovaa.” 7 Mahi Siovaa apopila Samuwele okuti: “Wahatale kolupe, nii koule,+ mokonda ame nemwanya. Tyeetyi Huku katale ngeetyi omunthu atala; omunthu utala kolupe mahi Siovaa utala mokati komutima.”+ 8 Sesee aihana vali Ambinandambe+ emutwala ku Samuwele, Samuwele ati: “Ou nae haeko Siovaa aholovona.” 9 Konyima Sesee atwala Samaa,+ Samuwele ati: “Nou haeko Siovaa aholovona.” 10 Ngootyo, Sesee atwala ku Samuwele ovana vae epandu-vali, mahi Samuwele apopila Sesee okuti: “Siovaa kaholovonene nawike pu ava.”
11 Konyima Samuwele apulu Sesee okuti: “Ovana vove aveho ovava vala?” Ngwe akumbulula okuti: “Kwakamba vali omututu watyo;+ wokwakalisa onongi.”+ Ngootyo Samuwele apopila Sesee okuti: “Tuma vekemwihane, mokonda kamatukala pohi atuli tyina eheneye.” 12 Pahe, atumu vekemupole. Ankho omuwa, una omaiho omawa notyivala otyiwa.+ Siovaa ati: “Katuka oyoo, oe ulembula.”+ 13 Ngootyo, Samuwele akwata ombinga yomulela,+ emulembula otyo ovakulu vae vatala. Okutuka monthiki oyo, ononkhono mba Siovaa ambukwatesako+ Ndaviti. Konyima Samuwele akondoka ko Lamaa.+
14 Pahe ononkhono mba Siovaa ambutundu-mo mu Saulu,+ Siovaa ayeke omalusoke a Saulu emumonese ononkhumbi.*+ 15 Ovaundapi va Saulu avemupopila okuti: “Huku wekupola ononkhono mbae, Huku wayeka omalusoke ove mwene, ekumonese ononkhumbi. 16 Tuma ovaundapi vove vekahi pano vekekwovolele omunthu utyivila okuhika nawa otyisandyi.+ Tyina omalusoke omavi Huku ekuyekela ameya, ngwe ahiki opo ove ukale nawa.” 17 Saulu evepopila okuti: “Mbambavo ndyovolelei omunthu omunongo kokuhika, amumweeta kuno.”
18 Umwe povakwatesiko ati: “Ndyihole okumona omona umwe wa Sesee yo ko Mbelei, uhika nawa otyisandyi, efwalali liakola omutima, lityivila okulwa.+ Utyivila okupopia nawa, una otyivala otyiwa,+ Siovaa umukwatesako.”+ 19 Saulu atumu ovatumwa-ndaka ku Sesee opo vemupopile okuti: “Omona wove Ndaviti, omunthita wonongi eye kuno.”+ 20 Ngootyo, Sesee apake ombolo kotyimbulu, nokatenda kovinyu, notyinkhombo, evitumu nomona wae Ndaviti ku Saulu. 21 Ndaviti aende ku Saulu ahimbika okumuundapela.+ Saulu emupande unene akala wondyakulilo yae. 22 Saulu atumu ondaka ku Sesee yokuti: “Mbambavo omona wove Ndaviti akale omuundapi wange, nemupanda.” 23 Apeho tyina omalusoke omavi ana Huku ankho ayekela Saulu amemumonesa ononkhumbi, Ndaviti ankho ukwata otyisandyi, ahiki; ngootyo Saulu ankho ukala nawa, apame, omalusoke omavi aemutundu.+