Sakaliya
2 Namona omulume umwe watyinda peke ongoi yokweleka.+ 2 Andyimupulu okuti: “Wenda napi?”
Ngwe akumbulula okuti: “Ndyienda, nkhaeleka o Selusalei, opo ndyitale apa ilifwe mounthanda, na apa ilifwe moulaale.”+
3 Oandyu ankho ikahi nokupopia naame, ayiende, aihonyenena noandyu onkhwavo, ankho yeya kuyo. 4 Oandyu yokweya, aipopila onkhwavo okuti: “Hatekela omukwendye una, omupopila okuti: ‘“Mo Selusalei mamukala ovanthu.+ Mahi maikala ngepunda-umbo lihena ovimato,* mokonda yovanthu veli-mo, novipako vili-mo.+ 5 Ame mwene mandyikala,” o Siovaa wetyipopia, “mandyikala otyimato tyotupia tyepunda-umbo olio, andyilisete nalio.+ Mandyikala pokati kalio, nomunkhima omunene.”’”+
6 “Endywei! Endywei! Tundei kotyilongo tyo kombanda,”+ o Siovaa wetyipopia.
“Mokonda ame nemuyandyanesa monomphepo ononkhwana mbo keulu,”+ o Siovaa wetyipopia.
7 “Siyau, endyu! Komona wo Mbambilonia+ oku ukala, tunda-ko. 8 Siovaa womambamba ovita, una wokwati etyi ankhimanekwa* anthumu kovanthu vovilongo ankho vekahi nokumupunda,+ wati: ‘Una uyama kwoonwe, utoma ponthanga yeiho liange.*+ 9 Pahe, mandyivekatulila okuvoko kwange. Mavakapundwa novapika vavo mwene.’+ Onwe mamunoñgonoka umwe nawa okuti, ame natumwa na Siovaa womambamba ovita.
10 “Kwiilila nehambu, mona omukainthu wa Siyau,+ mokonda ndyikahi nokuya,+ mandyikala pokati kove,”+ o Siovaa wetyipopia. 11 “Monthiki oyo, ovanthu vovilongo ovinyingi, mavekeliongiya ku Siovaa,+ avakala ovanthu vange. Ame mandyikakala noove.” Ove monoñgonoka okuti, Siovaa womambamba ovita, wanthuma kwoove. 12 O Sundaa, maikakala ya Siovaa, maikakala ohika yae ikola. Ngwe makakoya vali o Selusalei.+ 13 Ovanthu aveho vahapopie* natyike ponthele ya Siovaa. Mokonda, ukahi nokutunda komphangu yae ikola, opo alinge etyi apanga.