Isaiya
66 Etyi otyo tyapopia Siovaa, wati:
“Eulu otyipundi tyange, ohi otyiliatelo tyonomphai mbange.+
2 “Enkhanya liange lialinga ovipuka ovio aviho,
Ongootyo vieya-ko,” o Siovaa wetyipopia.+
“Mahi ou mandyitale, oyou:
O wokweliola omutima, womutima wateka-teka, una onthilo onene* nondaka yange.+
3 Una wiipaa ongombe onthwei, onga una wiipaa omunthu.+
Una waava ongi potyilikutila onga una utontha pekohi liotyimbwa.+
Una waava tyimwe, onga una waava ohonde yotyingulu!+
Una waava olimbanu ahinangailwe,+ onga una upeleyila mukwavo elao nonondaka mbamatutu.*+
Vakoya onondyila mbavo mwene,
Vahambukilwa* evi vitoyesa.
4 Mokonda yootyo, ame mwene mandyitale oñgeni mandyivekoyesa,+
Mandyiveetela umwe etyi ankho tyivetilisa owoma.
Mokonda etyi naihana, nawike wanthavelele.
Etyi napopia, nawike wanthehelele.+
Vatwaileko okulinga etyi tyapenga komaiho ange,
Vakoya okulinga etyi tyindumanesa.”+
5 Tehelelei etyi Siovaa apopia, onwe vokuna onthilo onene* nondaka yae, wati:
“Ava mulilandula navo, vokumuyele, vokwemutoya mokonda yenyina liange, vati: ‘Siovaa ahilivikwe!’+
Huku mekeya, emweetela ehambu,
Mahi ngwe mavakakundiswa.”+
6 Mepunda-umbo mwivalela onondyaya, mondywo ya Huku mwivalela ondaka!
Ondaka oyo, oya Siovaa ukahi nokukondolela onondyale mbae etyi tyata muvo.
7 Tyina nkhele onthiki wokukutula yehenehike-po, ngwe wakutula-le.+
Tyina nkhele onongembia mbae mbokukutula mbehenehike-po, ngwe wakutula-le omona omukwendye.
8 Olie weivile-ale ovipuka ngoovio?
Olie wamwene-ale ovipuka ngoovio?
Okuti otyilongo matyikutulwa vala monthiki ike?
Okuti ovanthu votyilongo mavakutulwa vala like?
Mahi, Siyau wati vala kalee nonongembia mbokukutula, akutula ovana vae ovakwendye.
9 “Okuti ame ndyieta onthiki yokukutula, mahi anahakutulisa?” o Siovaa watola.
“Okuti ame wokwaeta olutyito, nkhele ndyipondola vali okwiika olutyito?” O Huku yove watola.
10 Hambukilwei o Selusalei, amukwiilila nayo,+ onwe amuho vokwiihole.+
Kwiililei nayo nehambu enene, onwe amuho vokukahi nokwiilila.
11 Mokonda, onwe mamukanyama kevele liayo liokukengelela, amukekuta,
Mamukanwa amukowa, amukahambukilwa omunkhima wayo omunene.
12 Etyi otyo tyapopia Siovaa, wati:
“Ame ndyikahi nokuyeetela ombembwa ikahi ngondongi,+
Nomunkhima wovanthu vovilongo ukahi ngondongi yaeta.+
Onwe mamukanyama, amukatyindwa ponkhondo,
Amukasisilwa konongolo.
13 Ngeetyi omwali aungumanesa omona wae,
Ongootyo mandyitwalako okumuungumanesa.+
Mokonda yo Selusalei, onwe mamukaungumaneswa.+
14 Otyo, onwe mamuketyimona, omutima wenyi aukahambukwa,
Omankhipa enyi maakakala nononkhono ngeholi liayova pahe.
15 “Mokonda, Siovaa mekeya ngotupia,+
Omatemba ae, ekahi ngotyipepe,+
Opo akondolele nonyengo onene,
Aviyula nomutemo wotupia.+
16 Siovaa makakoyesa notupia,
Tyotyili, makakatulila ovanthu* aveho omutunga wae.
Siovaa makaipaa ovanthu ovanyingi.
17 “Vana velisukukisa, avelikoho opo vanyingile movitaka,*+ avalandula una uli pokati, vana vokulia ohitu yovingulu,+ novipuka vitoyesa, notyimphuku,+ aveho mavekehika konthyulilo yavo,” o Siovaa wetyipopia. 18 “Mokonda ndyii ovilinga viavo, nomalusoke avo, ndyikahi nokuya opo ndyiongiye ovanthu vovilongo aviho, nomalaka aeho. Mavekeya, avamono omunkhima wange.”
19 “Mandyikapaka enyingilikilo pokati kavo, vamwe pu vana vokwahupa, andyikevetuma kovanthu vovilongo, ko Talisi,+ no ko Puli, no ko Lunde,+ no ku vana vokuyaha nononkhondyi, no ko Tumbali, no ko Savaa,+ no kovilongo vyo kokule vili pokati kelunga, kovanthu veheneive-ale natyike konthele yange, nii vehenemone omunkhima wange. Mavakaivisa omunkhima wange pokati kovanthu vovilongo.+ 20 Mavakapola movilongo aviho+ vana mulilandula navo, aveveave ku Siovaa. Mavekevetyinda kononkhambe, no komatemba ovilwa, no komatemba okwatungilwa okafi, no ko nomula, no komakamelu okukanyauka, avevetwala komphunda yange ikola, ko Selusalei, ngeetyi ova Isilayeli valinga tyina vatyinda oviawa viavo povilindo viasukuka opo vatwale kondywo ya Siovaa.” O Siovaa wetyipopia.
21 “Tupu, mandyikaholovona vamwe avakala vovanakwa, ava ovakwavo, avakala vomuhoko wa Levii,” o Siovaa watola.
22 “Ngeetyi eulu epe nohi omphe+ ndyikahi nokulinga mavitwalako apeho komaiho ange, tupu ovana* venyi, nenyina lienyi mavitwalako apeho,” o Siovaa wetyipopia.+