Neemiya

9 Monthiki 24 yohanyi ya pandu-vali, ova Isilayeli aveliongiya; avakala ononthiki mbumwe tyahali, avavale onongosa, avelipake etwe.+ 2 Ova Isilayeli aveliyapuka novanthu vovilongo ovikwavo aveho,+ avakatuka avatalama, avelipopi ononkhali mbavo, novivi ovakwaukulu vavo valingaile.+ 3 Avatalama apa veli, avatangela peulu omukanda Wovitumino+ vya Siovaa, Huku yavo monoola ononthatu; avakala vali onoola ononthatu tyilipopia evi valinga-linga, otyo velipetamena ku Siovaa, Huku yavo.

4 Ovo Sesuwa, na Mbani, na Kandimiyeli, na Sembaniya, na Mbuni, na Selembiya,+ na Mbani, na Kenani avatalama pomphangu yo vomuhoko wa Levii payeluka vali,+ aveliyave ku Siovaa, Huku yavo, avapopi nondaka yakaluluka. 5 Vomuhoko wa Levii, ovo Sesuwa, na Kandimiyeli, na Mbani, na Hasambineya, na Selembiya, na Hondiya, na Sembaniya na Petaiya avati: “Katukei, hivilikei Siovaa, Huku yenyi, otyo muna okulinga apeho-apeho.*+ Vahilivike enyina liove liakulama Tate yetu, namphila ove wapona pokuhilivikwa novanthu, namphila wakulama wahatele mokunkhimanekwa novanthu.

6 “Ove, ove vala Siovaa.+ Ove walinga eulu, eulu liomaulu, no noandyu ambuho mbukahi-ko, tupu walinga ohi novipuka aviho vikahi-mo, nomalunga novipuka aviho vikahi-mo. Aviho uvikalesa nomwenyo, onoandyu mbo keulu mbulipetamena kwoove. 7 Ove, ove Siovaa, Huku yotyotyili, wokwaholovona Ambalau+ omupolo ko Uli+ kova Kalindeya omuluku okuti o Ambalayau.+ 8 Wetyimona okuti omutima wae omukwatyili kwoove,+ olingi omphango nae yokumwavela eheke liova Kanaa, no liova Hete, no liova Amoleu, no liova Peliseu, no liova Sembusi, no liova Silingaseu, alipewa ovana vae,*+ walinga umwe etyi apopile mokonda ove ulinga evi viaviuka.

9 “Wamona ononkhumbi mbovakwaukulu vetu ko Isitu,+ weiva etyi veliyava etyi vekahi Melunga Liakuhuka. 10 Pahe, olingila Falaoo omaelema novililenya, novanthu aveho vemuundapela, novanthu aveho votyilongo tyae,+ mokonda utyii okuti vatekula onya+ ovanthu vove. Ove wankhimanesa enyina liove, litwalako tyankhimana atee hono.+ 11 Wayapula pokati elunga komutwe wavo, avayauka elunga pohi yakukuta,+ onondyale mbavo weveyumba kohi-kohi yelunga, ngemanya liayumbwa momaande apikaita.*+ 12 Ove komutenya wevehongolela nekaka, kounthiki ovehongolela nomutemo wotupia opo uminikile mondyila vena okweendela.+ 13 Walauka Komphunda Sinai,+ opopila ovanthu vove otyo uli keulu,+ oveavela ovitumino vionomphela viaviuka, novitumino viotyotyili,* nomahongolelo omawa, nomalondolo omawa.+ 14 Wevenoñgonokesa Otyasapalo+ tyove tyikola ovelondola, neetyi upopia, notyitumino waavelele Mwisesi omuundapi wove. 15 Weveavela ombolo yo keulu etyi valiwa nondyala,+ walingile etyi tyihuvisa etyi valiwa nohunga,+ monkhanda amutundu omaande, ovepopila opo vanyingile avapiñgana otyilongo wevelaele.*

16 “No ngootyo ovo tate vakalele nomalityindailo,+ vatesa onkhango*+ avehetavela ovitumino viove. 17 Kavahandele okutehelela+ nii kavahinangelele kovipuka ovinyingi vihuvisa walingile pokati kavo, mahi vakalele nonkhango* avanake onkhalamutwe ivekondole koupika mo Isitu.+ Mahi ove, ove Huku apeho weevela,* una ouwa-tima,* una okankhenda, una oumphwa-lundo,* weyula olwembia olunene,*+ ove kweveyekele-po.+ 18 Atee umwe etyi velilingila otyika-huku tyotyivela tyikahi ngonkhembe avati: ‘Ou, oe o Huku yetu wetupola ko Isitu,’+ avalingi ovipuka ovivi unene tyehena onthilo, 19 ove nokankhenda kove okanene, kweveyekelele moluhandya.+ Ekaka livehongolela mondyila komutenya, kaliatundile ponthele yavo, nii eluku-luku liotupia livemimikila kounthiki mondyila vena okweenda kalievehondovokele.+ 20 Ove weveavela ononkhono mbove+ opo vakale ovanongo,* kwevenuminine omanaa yove,+ wevepele omaande etyi valiwa nohunga.+ 21 Weveavelele okulia momanima 40 moluhandya.+ Vetupu etyi vakambele. Omuvalo wavo kawapwile,+ onomphai mbavo kambamitile.

22 “Ove weveavela omauhamba novanthu, weveyapaulila onofika,+ ngootyo avapiñgana otyilongo tyo Siyoo,+ otyilongo tyohamba yo Hesimboo,+ notyilongo tya Onge+ ohamba yo Mbasaa. 23 Wakalesa ovana vavo ovanyingi-nyingi ngatyina ononthungululu meulu.+ Wevetwala kotyilongo walaele ovakwaukulu vavo, omu mavanyingila avetyipiñgana.+ 24 Ovana vavo avanyingila motyilongo avetyipiñgana,+ ovekwatesako okutilisa ova Kanaa,+ vakala motyilongo otyo, vana wapakula pomavoko avo, no nohamba mbavo novanthu votyilongo tyavo, avevelingi etyi vahanda. 25 Vanyingilile momapunda-umbo okwapama,+ ena omaheke anina,* avapiñgana+ omaumbo eyula ovipuka aviho oviwa,+ ena ononyombo mbaheywa-le, nomapia omiti vionouva, no omindyambi, nomiti viovinyango ominyingi. Ngootyo, avali, avekuta, avavondoka.* Vapola ouwa kokankhenda kove okanene.

26 “Mahi, ngwe vakala onomphwililiki,+ avekutyitukila-po, avatyindamena Otyitumino tyove.* Vaipaele ovauli vove vevelondola opo vakondoke kwoove, avalingi ovipuka ovivi unene tyehena onthilo.+ 27 Mokonda yotyo, ovepakula pomavoko onondyale mbavo,+ avevemonesa ononkhumbi.+ Mahi ngwe veliyava kwoove mononthiki mbononkhumbi, ove keulu wiiva etyi vaita. Mokonda yokankhenda kove okanene, ove uveavela ovayovoli vevepole pomavoko onondyale mbavo.+

28 “Mahi, tyina vamayovoka,+ vakondoka liwa-liwa kokulinga ovivi. Ove uveyekela pomavoko onondyale mbavo, mbuna mbuvemonesa ononkhumbi.*+ Avakondoka kwoove aveliyave opo uvekwateseko,+ ove keulu wiiva etyi vaita, otyo apeho uveyovola mokonda yokankhenda kove okanene.+ 29 Ove wevelondola opo vaendele vali Motyitumino tyove, mahi ngwe avakala nomalityindailo avehetavela ovitumino viove.+ Vaanyene etyi wapopia avalingi onkhali, etyi upopia tyikwatesako ovanthu vokukutavela vakale nomwenyo.+ Vatesa onkhango avekutyindamena, avakala onomphwililiki avahahande okukutehela. 30 Ove wapwile elundo navo+ mokweenda kwomanima omanyingi, ove waavela ononkhono mbove ovauli avevelondola, mahi avehetavela. Konyima oveyekela pomavoko ovanthu vovilongo ovikwavo.+ 31 Mokankhenda kove okanene,+ kweveipaele, nii kweveyekele-po, mokonda ove Huku, una ouwa-tima* nokankhenda.+

32 “Pahe Huku yetu, Huku omunene, wevililo, utilisa owoma, ufwisapo omphango yove, una olwembia olunene,+ wahatale kovitateka vietu tyihesukile, viamonekela onthwe, no nohamba mbetu, novatumini vetu,+ novanakwa vetu,+ novauli vetu,+ novakwaukulu vetu, novanthu vove aveho, okutuka pononthiki mbo nohamba mbo Asilia+ atee pononthiki mbetu. 33 Movipuka aviho vietumonekela ove wakala omuviuki, wetutekula noukwatyili; mahi onthwe, onthwe twapengesa.+ 34 Onohamba mbetu, novatumini vetu, novanakwa vetu, novakwaukulu vetu, kavetavelele Otyitumino tyove, nii avehesuku neetyi upopia, neetyi wevelondolele.* 35 Atee umwe etyi vekahi moutumini wavo, otyo vapola ouwa kokankhenda okanene wakala navo, motyilongo otyinene tyina omaheke anina* weveavelele,+ kavekulingilile nii kavayekele-po ovituwa viavo ovivi. 36 Mokonda yotyo pahe onthwe tuvapika,+ tuvapika motyilongo waavelele ovakwaukulu vetu opo valie ovinyango viatyo, novipuka viatyo oviwa. 37 Ovipuka viteywa motyilongo muno vienda vala no konohamba wetupakulila mokonda yononkhali mbetu.+ Onthwe novipako vietu vetutumina* ngeetyi vahanda, tukahi mononkhumbi onene.

38 “Mokonda yotyo atyiho, tukahi nokulinga omphango onene yahonekwa,+ ikahi nokupakwa otyilimbo novatumini vetu, no vomuhoko wa Levii, novanakwa vetu.”+