Ovilinga Viovatumwa
28 Etyi pahe twehika umwe, twahupa, ngapo pahe tunoñgonokela okuti naina pokalongo tuli patiwa opo Malata.+ 2 Ovanthu vatyo vo opo vapopia elaka limwe twehei-ale,* avetulingi umwe okankhenda.* Avetunthiakanena otupia, ankho vetweetehila-mo okankhenda tyombila ankho ili nokuloka, ngwe ankho kwatenda. 3 Ou Paulu atiave otyipandi tyononkhwii, tyina ahanda okumbupaka potupia, amutundu onyoka yombuta nkhwali yeiva outokotwe, aimwiimi umwe mokuvoko. 4 Etyi ovanthu vatyo vapopia vala elaka twehei vamona onyoka oyo onkhalavi yayendyelela mokuvoko kwae, otyo velipopila na vakwavo vati: “Omulume ou vakwe omwipai, wahula okuti melunga wahupa, mahi katyemuyekele* katyahandele ahupe.” 5 Mahi ngwe elinyanye onyoka oyo aitokela potupia, ahalingi-ale natyike. 6 Ovanthu ankho vati hamwe mamiti, okuti hatyo hamwe matokela umwe pohi ankhi. Oko vatala-tala vala oko, vakati ñgaa una uñgwai umwe vala, ku oyo yokuti hamwe una etyi malingi avaanguluka-ko, pahe avati ou o huku.
7 Ngwe pohika yatyo opo ankho pena omaheke omulume umwe ohongoi yo pokalongo katyo opo utiwa o Pumbiliyu, oo etuyakula nawa etulaleka, atukala meumbo liae ononthiki ononthatu. 8 He ya Pumbiliyu ankho uli moula walinga elema, ankho wati nokwalinga peimo, Paulu anyingila ekemutale, yee omo elikwambela, emuyambeka omavoko emuhakula.+ 9 Ovanthu okumona otyo, ovanyingi pokalongo opo ankho vavela navo avahimbika okuya, otyo evehakula.+ 10 Ngwe pahe avetwaavela ovipuka ovinyingi otyali, neetyi twati pokumaneka na twende, avetwaavela umwe ovipuka aviho ankho matusuku navio.
11 Twakala-ko onohanyi ononthatu, pahe atulondo mombapolo imwe yapakwa “Ovana va Seusi” mombamba. Ombapolo oyo ankho yatunda ko Alesandiliya, nkhele poutalala aikala pokalongo opo. 12 Atukatalama po Silakusa, atukala-po ononthiki ononthatu; 13 etyi twatunda opo, atuya no po Lesiyu. Twakala vala onthiki ike, omphepo aihimbika okutundilila kombwelo aitutahe, tyina tuti monthiki ya vali tuli mo Puteoli. 14 Oko atuvasi-ko ovafendi vakwetu, avetukengelela tukale oko navo ononthiki epandu-vali, konyima pahe atukaya no ko Loma. 15 Vakwetu vo oko etyi vetwiiva, aveya umwe atee Kopalasa yo mo Apiu aveya okuhika Konondywo Ononthatu, ngako tuhonyenena. Paulu, oko ati vala tuke kuvo apandula Huku, atyimupe umwe ononkhono.+ 16 Etyi pahe twanyingila mo Loma, Paulu etavelwa vakale vala aveke nefwalali limuyunga.
17 Apakala ononthiki ononthatu, aihana onohongoi mbatyo mbova Sundaa. Etyi vakongoloka veya, evepopila ati: “Vakwe, vanthu vetu, ame halingile umwe natyike tyapenga tyinumanesa ovanthu hamwe tyipikiya oviso vionombwale mbetu,+ mahi ame uno nakwatwa, napolwa umwe ko Selusalei neya okupakulwa pomavoko ova Loma.+ 18 Etyi napulwa-pulwa,+ avahande umwe okundyeka, mokonda ndyitupu-ale etyi nalinga vamona tyindyipaesa.+ 19 Etyi ova Sundaa vaanya, pahe atyimphe vala okwiita andyiti omphela yange yende ku Sesale,+ mahi hetyilingilile okwati hamwe ndyina etyi nahanda okukapopia ovanthu vetu valinga. 20 Otyo naitila ndyimumone-vo vala, ndyipopie-vo vala noonwe, tyankhutisa umwe ñgaa nelienge eli, otyetyi onthwe va Isilayeli tukevela.”+ 21 Ngwe avemuti: “Onthwe katwatambulile omikanda viatunda ko Sundeya vipopia ove, na vakwetu vatunda-ko petupu ou wekupopia omapita, hamwe wahipulula tyimwe tyapenga walinga. 22 Mahi onthwe twasoka twati hahe okutehela etyi ove mwene usoka, mokonda mwene elongeso liatyo eli+ lipopiwa-le vala omapita onohika mbatyo ambuho.”+
23 Avelipakela-mo onthiki mavakondoka vali, tyina pahe onthiki oyo veya, aveya ovanyingi vali, aveya umwe mondywo ankho eli. Ahimbika umwe komuhuka okuvepotoyolela Ouhamba wa Huku, evepe oumbangi waoya atee kongulohi, tyokwahanda umwe vetavele Sesusi,+ vetavele Novitumino vya Mwisesi,+ Novauli.+ 24 Vamwe pahe avetavela ovipuka apopia; ava vamwe avehetavela. 25 Pahe etyi pelinanwa-nanwa vala, vamwe otyo vatunda-po venda, Paulu pahe apopi vali okuti:
“Omphepo ikola yapopilile momuuli Isaiya, wapopile umwe onombwale mbenyi, 26 watile: ‘Enda kovanthu ovo oti: “Onwe okutehelela mamutehelela, mahi kamamukungunyika, okutala mamutale, mahi kamamumono-po.+ 27 Mokonda omitima viovanthu ava kavitamphuka, omakutwi avo eiva-ko umwe, mahi kavalingi natyike, vahika komaiho, omaiho avo ahamone-po, vatehelela umwe nomakutwi, mahi omitima viavo aviahakungunyika, kavahande okukondoka ame ndyivehakule.”’+ 28 Vakwe noñgonokei okuti eyovo olio litunda ku Huku liatumwa kovanthu vomihoko omikwavo;+ ngwe maveliivi umwe.”+ 29* ——
30 Mondywo omo ankho akala otyo afeta,+ wakalele-mo omanima evali, aveho vemweendela ankho uveyakula nawa, 31 otyo evepopila Ouhamba wa Huku, otyo evelongesa etyi tyayemba ku Tatekulu Sesusi Kilisitu tyehena-le otyinkhe pokupopia,*+ apehena-le ou ankho umutyika.