Wo Tete Wahonekelwa Ova Tesalonika
2 Onwe mutyii umwe nawa vanthu vetu, etyi tweile oko okumupila, katweile vala okupwila.+ 2 Twahula okuti etyi twali mo Filipu twamonesilwe emone,+ atulingwa onya, noonwe umwe mutyii, mahi onthwe atukolo umwe omutima* atupamena mu Huku yetu, onwe atumupopila umwe oviwa ovipe vya Huku+ namphila ovanyingi ankho vetuyele.* 3 Ondaka twemupa tumulondole kayatukile mweetyi tyapenga, nii ha mweetyi tyasila, kayaendelele mounkhembi, 4 mahi onthwe twetavelwa na Huku tupewe etyi tyoviwa ovipe, pahe onthwe katupopi tuhambukiswe ovanthu, tupopia tuhambukiswe Huku, ou utala momitima vietu.+
5 Otyili, onwe mutyii okuti onthwe katunesilule munthu, katuneliholeke-ale etyi mwene tukahi, okukemba vala ovanthu;+ mwene Huku nae ombangi! 6 Nii katwaovolele okunkhimanekwa novanthu, nii noonwe nii novanthu ovakwavo vali, namphila onthwe vatumwa va* Kilisitu ankho tupondola umwe okulinga omutengi wenyi.+ 7 Otyo hatyo twalinga, etyi twali noonwe, onthwe twalinga ovanthu vonkhenda, twalinga lwomwali weenga-enga* ovana vae. 8 Mahi mokonda onthwe tuna umwe olwembia noonwe, twati umwe,* katumupe vala oviwa ovipe vya Huku, mahi tupu nomienyo viatyo umwe vietu,*+ mokonda pahe mwalinga ovanthu tuhole.+
9 Mwene noonwe vanthu vetu, muhinangela umwe otyipuka twatutumba, ovilinga twakala navio. Tulala nokuundapa, tuhimama natyo, twahalinge omutengi wa munthu,+ pokwemupopila oviwa ovipe vya Huku. 10 Noonwe munombangi, na Huku utyii, onthwe twakakatela umwe motyili, mo tyokwaviuka, kwoonwe oko tutupu-ko etyi tyituvelesa onombei, onwe vataveli. 11 Onwe mutyii umwe nawa, onthwe katwatalamene-ale kokumulondola amuho, munthu na munthu, kokumupameka, kokumupakailamo,+ twalinga umwe lwomukulu ulonga+ ovana vae, 12 opo mweendaile vala omu Huku ahandela,+ ou wemwiihana Mouhamba wae,+ momunkhima wae.+
13 Otyo, otyo onthwe apeho tupandulila vala Huku,+ mokonda etyi mwetavela ondaka ya Huku, ei mweiva kwoonthwe, amwiitavela, hatyokwati ondaka yovanthu, mwene mweitavelela umwe omu ngwe yakalela, ondaka ya Huku, ei ili nokuundapa no mwoonwe, onwe vataveli. 14 Mokonda onwe, vanthu vetu, mwalinga vokuhetekela omawaneno a Huku eli kumwe na Kilisitu Sesusi, eli mo Sundeya, onwe mwamwene umwe ononkhumbi peke liovalume votyilongo tyenyi mwene,+ otyipuka umwe navo vakondya natyo peke liova Sundaa, 15 vokwaipaele umwe na Tatekulu Sesusi,+ novauli, pahe noonthwe vetuhukaisa.+ Ngwe ha Huku vala vahahambukiswa, mahi vatyopola umwe no viovanthu aveho, 16 otyo vetutyikaila twahapopile ovanthu vomihoko omikwavo navo vayovoke.+ Otyo valinga, veli vala nokutwikinya kononkhali mbavo mbwooye. Mahi onyengo yae inavo-ale.+
17 Mahi etyi twapolwa* kwoonwe vanthu vetu, twakala-po vala katutu, (mokwelikala kokule, mbili komutima tulivalula), tyotyiivaluko ankho tyalinga otyinene, atututumba tuye tumutale-vo vala motyipala. 18 Otyo ankho twahandela umwe okuya oko, ame Paulu, natutumbile umwe natyo, ha like vala, tuvali; mahi Satanasi ahitika ondyila yetu. 19 Ngwe naina, otyityi tukevelela, olipi ehambu lietu, ohala yetu yondolo ilipi kotyipala tya Tatekulu Sesusi pokweya? Mwene hanwe umwe?+ 20 Onwe, onwe umwe mwene munkhima wetu, onwe hambu lietu.