Wahonekelwa Ova Ngalasiya
5 Onthwe Kilisitu wetuyovola, tumone eyovo ngoolio. Naina pamekei umwe,+ mwahakondokei vali mokanga youpika.+
2 Tala! Ame Paulu, ndyimuti ine mupita ekwendye, opo onwe ku Kilisitu kamu-ko.+ 3 Ame ndyiwana-po vali, ovalume aveho vapita ekwendye vena umwe okulinga atyiho tyipopia Ovitumino.+ 4 Onwe vokwahanda okutiwa munondingaviwa tyovitumino,+ opo ku Kilisitu mwahondovoka-ko; mwene mwelipola mokankhenda okanene. 5 Mahi onthwe kohalwetu, mo tyomphepo ikola tukevelela umwe tutiwe tunondingaviwa tyeyumba-nthumbi. 6 Mokonda etyi tya Kilisitu Sesusi, tyiti vala nokupita ekwendye, nokwahapiti ekwendye tyitupu ovilinga,+ tyahandwa onthumbi yeendela monthyole.
7 Onwe ankho muli umwe nokuhateka nawa.+ Olie wemutyopola amwehetavela vali otyili? 8 Onondunge ombo, kambatukile ku Ou wemwiihana. 9 Onkhiso ngailingi yehehi, itutumukisa* umwe enthapi aliho.+ 10 Ame nayumba-ko onthumbi, onwe vokuli kumwe na Tatekulu,+ kamamuyeke onondunge mbenyi mbende nohika; ou uli nokumuhimapalesa,+ alinge-linge-lie, alinge-linge-lie, etyi malingwa otyo ehiwa okulingwa. 11 Mahi pahe ame vanthu vetu, ine etyi ndyipopia tyali tyokupita ekwendye, opo ñgeno ndyihukaiswa vali? Opo ñgeno emanya litokesisa liomuti wemone,*+ lianyima-ko. 12 Ame nahandele ovalume ava veli nokumuhimapalesa, ñgeno velitukana.*
13 Onwe mwaihanenwa eyovo, vakulu vange; mwahaendelei meyovo olio ngamo mulingila evi viahanda ohitu,+ mahi molwembia lingei ovapika va vakwenyi.+ 14 Mokonda Ovitumino aviho viayakwa vala na tyike,* tyati: “Humba mukwenyi ngeetyi ove ulihole.”+ 15 Ngwe ine mukalela vala okulinumata, mukalela vala okulilia na vakwenyi,+ lungukei mwehelihanye-po mwene onwe na vakwenyi.+
16 Mahi ndyimuti, endailei momphepo,+ mwahalinge evi ohitu ihanda.+ 17 Mokonda ohitu kailihande nomphepo mu evi ihanda, omphepo nayo kailihande nohitu; pokati opo pakala ovilwa, opo mwahalinge ovipuka mwahanda.+ 18 Ngwe ine omphepo oyo imululika, opo kamuli vali mo tyovitumino.
19 Ovilinga viohitu kavimwiimba-le vimoneka umwe nawa, tyati umwe ouhayo wokulihanda,*+ ouheha, okwahakundu,*+ 20 okufenda ovilolo, etambu,*+ okuliyele, onondwa, otyipululu,* ononthumba-ungo, okulipatana, omaliyapauko, okuhinda ondongeso ityayo, 21 onkhi, ounkholwa,*+ ovipito viehangahahi,* novipuka ovikwavo vielifwa no ovio.+ Ame ndyimulondola kovipuka ovio, ndyimuwana vali ngeetyi nemutile-ale, ava valinga ovipuka ovio kavakatambula Ouhamba wa Huku.+
22 Mahi ngwe pahe, otyinyango tyomphepo ikola, olwembia, ehambu, ombembwa, oumphwa-lundo,* okankhenda, ouwa-tima,+ onthumbi, 23 omapole, okulikondola omutima.+ Kutupu otyitumino tyiilika ovipuka ovio. 24 Ngwe tupu, ava vahula ku Kilisitu Sesusi ohitu veipapela umwe momuti, nayo novipepe viayo, nokupeleya kwatyo.+
25 Ine onthwe twakalela-ko omphepo ikola, opo tweendailei umwe nawa momphepo ikola.+ 26 Twahalingei vokulipaka-ko,*+ atuhohiya okalolela pokati ketu na vakwetu,+ atulilingi onkhi na vakwetu.