Isaiya
58 “Kaluluka unene, uhelikondole!
Katula ondaka yove ngonkhwino.
Popila ovanthu vange oumphuki wavo,+
Popila eumbo lya Sakoo ononkhali mbavo.
2 Vandyovola nthiki na nthiki,
Vapopia okuti vahanda okunoñgonoka onondyila mbange,
Ngoti ankho ovanthu vokulinga etyi tyaviuka,
Vahayekele-po ouviuki wa Huku yavo.+
Vandyita onomphela mbaviuka,
Vahanda okufwena ku Huku, otyo vati:+
3 ‘Oityi wehetutalela tyina tukala ononthiki tyahalile?+
Oityi wehesukila tyina tulimonesa emone onthwe mwene?’*+
Omokonda, onthiki onwe muhali natyike, mwovola etyi onwe mwene muhanda,*
Otyo mulinga onya vana vemuundapela.+
4 Onthiki onwe muhali, ivituka nonondyaya novilwa,
Amulivete onya na vakwenyi.
Onwe kamupondola okukala onthiki tyihali ngeetyi mulinga hono, amuhande ondaka yenyi iivale keulu.
5 Okuti ongootyo tyilingwa monthiki yokuhali natyike ame nakoya?
Okuti onthiki oyo, onthiki omunthu elimonesa emone,*
Ayendyelesa omutwe wae ngeholi elaale,
Alangala kosaku, nometwe?
Okuti onthiki oyo, oyo onwe muti onthiki yokuhali natyike, onthiki ihambukiswa Siovaa?
6 Au! Onthiki yokuhali natyike ame nakoya, oyei:
Okukutulula omalienge ovivi,
Nokwitulula omivia viokanga,+
Nokuyovola vokulingwa onya,+
Nokutipaula pokati onokanga ambuho,
7 Okulitepulila ombolo na una waliwa nondyala,+
Okuyakula nawa meumbo liove vana vahepa, no vokuhena omaumbo,
Nokuvaleka una weete okuti utupu etyi avala,+
Ohatyindamena una mulikwai nae.*
8 Ine ulinga ngootyo, otyimimi tyove matyikalinga ngatyina uti kutya,+
Okuhakulwa kwove makuya vala liwa-liwa.
Ouviuki maukala komutwe wove,
Omunkhima wa Siovaa, aukala monyima yove.+
9 Ove mokaihana, Siovaa ekutavela,
Mokeliyava okwiita ukwatesweko, ngwe akati: ‘Ame pano!’
Ankho ove upola pokati kove okanga,
Oyeke-po okulekaisa omunwe, nokupopia ovipuka ovivi,+
10 Ankho waavela una waliwa nondyala etyi ove mwene wahanda,*+
Otuula vana* vesuka,
Otyimimi tyove matyikaminikila atee umwe menthiki,
Enthiki liove malikakala ngo komutenya-tenya.+
11 Siovaa apeho mekekuhongolela,
Mekekwavela* atyiho wesukisa, atee umwe motyilongo tyakukuta.+
Makapameka omankhipa ove,
Okakala ngotyitaka tyayavekwa nawa,+
Ngondyivi-ndyivi yahakukuta.
12 Kombanda yove, omatunthu okohale maakapindulwa-po,+
Ove mokapindula-po omahina omatunthu omakula okwalamba.+
13 Ine ove ulandula nawa otyasapalo, oliyungu* ohaovola vala evi mwene wesuka navio,* monthiki yange ikola,+
Ine otyasapalo ove utyiluka okuti, onthiki yehambu enene, onthiki ikola ya Siovaa, onthiki ina okuhilivikwa,+
Onkhimaneka onthiki oyo, ohaovola omasuka-suka ove mwene, tupu ohapopi onondaka onombi,
14 Opo ngootyo, movasi ehambu enene mu Siovaa,
Mandyikekupumphika konomphangu mbaya peulu mbohi.+