Isekiyele
25 Ondaka ya Siovaa aindyendela vali aiti: 2 “Mona womulume, pilukihila otyipala kova Amoo,+ ula etyi mavalingwa.+ 3 Popia ova Amoo uti: ‘Tehelelei etyi tyapopia Tatekulu Ohamba Onene Siovaa. Etyi otyo tyapopia Tatekulu Ohamba Onene Siovaa, wati: “Mokonda ove walinga omukwele wati: ‘Wolo’ etyi omphangu yange ikola yasiliswa, etyi otyilongo tya Isilayeli tyahanywa-po, neetyi eumbo lya Sundaa liatwalwa koukonde, 4 mandyikupakula kovanthu vo Koutundilo olingi wavo. Ngwe mavakaonga ononthanda mbavo* mwoove, mavakatunga onohinge mbavo mwoove. Mavakalia ovinyango viove, mavakanwa-po omahini ove. 5 O Lambaa+ nkheilinga omalihilo omakamelu, otyilongo tya Amoo nkhetyilinga omwoombelo wovipako; onwe mamukankhola umwe okuti ame, ame Siovaa.”’”
6 “Etyi otyo tyapopia Tatekulu Ohamba Onene Siovaa, wati: ‘Mokonda pahe wahakela,+ wahela,* wahambukilwa umwe ononkhumbi mbotyilongo tya Isilayeli okutyilinga umwe omutomba,+ 7 mandyikekutandavekela okuvoko kwange, andyikupakula kovanthu vovilongo, avekutyindi-po lweetyi tyapundwa. Pokati kovanthu mandyikunyimi-po, pokati kovilongo mandyikuhanye-po.+ Mandyikekuhanya-ko, mokankhola umwe okuti ame, ame Siovaa.’
8 “Etyi otyo tyapopia Tatekulu Ohamba Onene Siovaa, wati: ‘Mokonda tyati na Moambe+ na Seili+ vati: “Talei! Eumbo lya Sundaa lialinga ngovanthu vomihoko omikwavo aviho,” 9 ame mandyikasa poluhandya omapunda-umbo okuli kongengeso yo* Moambe, omapunda-umbo omawa* vali otyilongo, o Mbete-Sesimote no Mbete-Mbaale-Meoo, no Mbaale-Meoo, atee umwe o Kiliyataii.+ 10 Mandyikeepakula nao nova Amoo vatyo avalingi vovanthu vo Koutundilo,+ opo ova Amoo vahakahinangailwa vali pokati kovanthu vovilongo.+ 11 Ame mandyipake momphela o Moambe,+ maikankhola umwe okuti ame, ame Siovaa.’
12 “Etyi otyo tyapopia Tatekulu Ohamba Onene Siovaa, wati: ‘Endoo walinga onkhongo eumbo lya Sundaa, pahe wavelwa umwe onombei tyokwalinga vakwavo onkhongo;+ 13 Tatekulu Ohamba Onene Siovaa wati: “Nayo mandyitandavekela okuvoko o Endoo, mandyihanye-mo ovanthu vatyo, novipako, mandyiilingi ekongola.+ Okuhimbikila ko Temaa atee ko Ndendaa mavakankhia komutunga.+ 14 ‘O Endoo mainthale neipakela onkhongo maimakela kokuvoko kwovanthu vange ova Isilayeli.+ Mavakaeta olunuma lwange nonyengo yange ko Endoo, opo vetyimone okuti ndyina onkhongo,’+ o Tatekulu Ohamba Onene Siovaa wetyipopia.”’
15 “Etyi otyo tyapopia Tatekulu Ohamba Onene Siovaa, wati: ‘Ova Filisitiya vena onya, vena onomphango onombi* vahanda okulinga onkhongo, vahanda okuhanya.+ 16 Otyo Tatekulu Ohamba Onene Siovaa atila: “Mandyitandavekela okuvoko ova Filisitiya,+ andyinyimi-mo ova Keleta,+ andyihanye-ko ava vahupa-po vakala konthele kelunga.+ 17 Etyi mandyivelingi otyinene mavatyepeko konyengo ndyina-yo, mavakankhola umwe okuti ame, ame Siovaa tyina namaeta onyengo yange muvo.”’”