Omukanda Wa Vali wa Samuwele

20 Kwali umwe ankho uhongiliya ovanthu utiwa o Semba,+ omona wa Mbikili omu Mbesamii. Ahiki onkhwino+ ati: “Onthwe tutupu natyike tyetu na Ndaviti, tutupu epingo nomona wa Sesee.+ Amuho va Isilayeli kondokei mukafende ono huku* mbenyi!”+ 2 Ngootyo, ova Isilayeli aveho avasi-po Ndaviti, avaende ku Semba omona wa Mbikili,+ mahi vomuhoko wo Sundaa, okuhimbikila ko Solondau atee ko Selusalei,+ avesala nohamba yavo.

3 Etyi ohamba Ndaviti ehika meumbo liae* ko Selusalei,+ apake ononthawa mbae 10, mbuna mbesalele nokuyunga eumbo,+ mondywo yelikalela, nomunthu umbuyunga. Ankho uveavela okulia, mahi ankho kalala navo.+ Avakala mondywo omo ngatyina ovahepe atee vankhia, namphila ankho vena omulume.

4 Ohamba aipopila Amasa+ okuti: “Kaihane ovalume vo Sundaa, pahalambe ononthiki ononthatu endyu navo kuno.” 5 Amasa aende, akaihana ova Sundaa, mahi eheya mononthiki apelwe. 6 Ndaviti apopila Ambisai+ okuti: “Omona wa Mbikili, Semba+ upondola okutwetela vali ovitateka tyipona Ambisalau.+ Pola omafwalali ange,* omulandula opo ahavasi omapunda-umbo naeke apama maemuhupisa kwoonthwe.” 7 Ngootyo, omafwalali a Sowambe,+ ova Keleta, nova Peletita+ novalume aveho vokwapama, avatundu na Sowambe mo Selusalei, avalandula Semba omona wa Mbikili. 8 Etyi vehika pemanya enene ko Simbeau,+ Amasa+ evetetelela velivase. Sowambe ankho wavala otyikutu tyo movilwa ankho una omutunga motyilalo tyikahi momapoha. Etyi afwena ku Amasa, omutunga wae autokela pohi.

9 Sowambe apulu Amasa okuti: “Uli nawa mukulu wange?” Nokuvoko kwokulio, Sowambe akwate konondyeli mba Amasa ngatyina ahanda okumuhipa ombesu. 10 Amasa keliyakulilile komutunga ankho uli pomavoko a Sowambe, Sowambe emutomo meimo,+ omala aatokela pohi. Wemutoma vala like ankhi, atyihesukisa okuwana vali. Sowambe nondenge yae Ambisai avalandula Semba omona wa Mbikili.

11 Umwe povakwendye ankho vena Sowambe akala ponthele potyivimbi, ati: “Olie wahula ku Sowambe, una ukwatesako Ndaviti, alandule Sowambe!” 12 Pononthiki opo Amasa ankho ulangi mohonde yae metapalo. Etyi omulume oo amona okuti ovanthu aveho vetai opo, apolo-po olutu lwa Amasa ankho lukahi metapalo, elutwala mohika. Ayumbu-ko omanda mokonda ovanthu ankho vekahi nokutalama-po otyo vemutala. 13 Etyi olutu lwae lwapolwa metapalo, ovalume aveho avalandula Sowambe okukaovola Semba+ omona wa Mbikili.

14 Semba akwate momihoko aviho vyo Isilayeli, aende no ko Ambele Mbete-Maakaa.+ Vomuhoko wa Mbikili aveliongiya, avalandula Semba avaende no mokati kepunda-umbo.

15 Sowambe novakwa-vita vae* aveya, avelisete nepunda-umbo lyo Ambele Mbete-Maakaa. Avatungu ondondelo yokulwila opo valwise epunda-umbo mokonda ankho liatungilwa mokati kotyimato tyapama. Ovakwa-vita aveho ankho vena Sowambe avaheye mombwelo yotyimato vetyihanye-po. 16 Omukai umwe ankho omunongo eliyavela peulu mepunda-umbo ati: “Tehelelei, tehelelei valume! Popilei Sowambe eye kuno ndyipopie nae.” 17 Etyi afwenapo, omukai emupulu okuti: “Ove Sowambe?” Ngwe ati: “Yoo, ame.” Omukai ati: “Tehelela etyi mandyikupopila ame muumbili wove.” Ngwe ati: “Ndyikwiivite.” 18 Omukai ati: “Kohale ankho apeho vati: ‘Kapulei ko Ambele mutehelele etyi mamupakelwa-mo,’ otyo atyitetulula otyitateka. 19 Ame, ame nakalela-po ova Isilayeli vombembwa, ovakwatyili. Ove ukahi nokwovola okuhanya-ko epunda-umbo likahi ngatyina olio o mee mo Isilayeli. Omokonda yatyi uhandela okuhanya-ko* epingo lya Siovaa?”+ 20 Sowambe akumbulula okuti: “Ame hipondola okuhanya-ko, nii okunyima-ko epunda-umbo eli! 21 Otyitateka hatyo-ko otyo. Mahi pena omulume umwe utiwa o Semba+ omona wa Mbikili, wotyilongo tyonomphunda ko Efalaii,+ watyitukilapo* Ohamba Ndaviti. Ine mumpha omulume oo, ame mandyihondovoka epunda-umbo eli.” Omukai apopila Sowambe okuti: “Omutwe wae matukuyumbila-o keulu liotyimato!”

22 Liwa-liwa, omukai oo omunongo aende, eketyipopila ovanthu aveho. Ngootyo, avatete-ko omutwe wa Semba omona wa Mbikili, aveuyumbila Sowambe. Pahe Sowambe ahiki onkhwino, omafwalali aayeke-po epunda-umbo, avakondoka komaumbo avo;+ Sowambe akondoka ko Selusalei kohamba.

23 Sowambe ankho uhongolela omafwalali ova Isilayeli;+ Mbenaya+ omona wa Seoyanda+ ankho uhongolela ova Keleta nova Peletita.+ 24 Andolau+ ankho uyunga vana vakuluminywa okuundapa ovilinga vialema; Seosafaa+ omona wa Ailunde ankho omuhoneki womahipululo. 25 Seva ankho omuhoneki; Sandoke+ na Ambiyatale+ ankho ovanakwa. 26 Ila omu Saili, nae akala umwe povatumini ovanene vali vokuundapela* Ndaviti.