Omukanda wo Tete Ehipululo
12 Ovalume vamwe, vaile ku Ndaviti ko Sikalange,+ pononthiki ankho aholama Saulu+ omona wa Kisi. Ovalume ovo, ankho o vamwe povakwa-vita vokwapama vemukwatesileko movilwa.+ 2 Ankho vamaneka ononkhondyi, tyina vayumba omamanya+ nonthwala, na tyina vayaha nonkhondyi, ankho vetyilinga umwe nomavoko aeho, nokulio nokumbili.+ Ovalume ovo, ankho velilandula na Saulu, vatuka mu Mbesamii.+ 3 Ononkhalamutwe, ankho o Aiyesele na Sowasi ovana va Semaa omu Simbeaa.+ Tupu ankho pena Sesiyeli na Pelete ovana va Asimavete,+ na Mbelaka, na Seuu omu Anatote, 4 na Isimaiya omu Simbeau,+ umwe povakwa-vita 30 vokwapama,+ onkhalamutwe yavo, na Selemiya, na Saasiyele, na Soanaa, na Sosambande omu Sendela, 5 na Elusai, na Selimote, na Mbealiya, na Semaliya, na Sefatiya omu Halife, 6 na Elekana, na Isiya, na Asalele, na Sowesele, na Sasombeyau vokwatuka mu Kolaa,+ 7 na Sowela na Sembandiya ovana va Selowau omu Sendole.
8 Ovana vamwe va Ngande, avaende ku Ndaviti apa aholama moluhandya, avahulu kwe.+ Ankho ovakwa-vita vokwapama, ankho omaswalali okwalongeswa okwenda movilwa. Ankho vamaneka ononkhondyi nomaonga. Ovipala viavo ankho vikahi ngo viononkheyama, ankho vahateka unene ngonomphundya monomphunda. 9 Onkhalamutwe ankho o Esele, wa vali o Ombandiya, wa tatu o Eliyambe, 10 wa kwana o Misimana, wa tano o Selemiya, 11 wa pandu o Atai, wa pandu-vali o Eliyeli, 12 wa tyinana o Soanaa, wa tyive o Elisambande, 13 wa 10 o Selemiya, wa 11 o Makimbanai. 14 Ovo ankho vatuka mu Ngande,+ ankho ononkhalamutwe mbomafwalali. Omututu puvo ankho weelekwa nomafwalali 100, omunene puvo ankho weelekwa nomafwalali 1000.+ 15 Ovalume ovo, vayaukile ondongi Solondau mohanyi yo tete, pweetyi ankho yaeta unene aihandye. Avataata ovanthu aveho ankho vakala mombwelo, koutundilo no koutakelo.
16 Ovalume vamwe vokwatuka mu Mbesamii no mu Sundaa, avaende apa Ndaviti aholama.+ 17 Ndaviti aende, ahonyena navo evepopila okuti: “Ankho mweya nombembwa opo munkhwateseko, opo omutima wange mauliwaneka no wenyi. Mahi ankho mweya opo munthyololole, amumphakula konondyale mbange, ngwe omavoko ange kaalingile natyike tyapenga, mwene Huku yovakwaukulu vetu utyeete, etukoyese.”+ 18 Ononkhono mba Huku ambuwila* ku Amasai,+ onkhalamutwe yomafwalali 30, apopi okuti:
“Onthwe tuvove Ndaviti, twahula kwoove, mona wa Sesee!+
Kala nombembwa, kala nombembwa, vana vekahi nokukukwatesako vakale nombembwa,
Mokonda Huku yove ukahi nokukukwatesako.”+
Ndaviti evetambula, evelingi ononkhalamutwe mbomafwalali.
19 Ovalume vamwe vomuhoko wa Manasesi, tupu aveliwaneka na Ndaviti pononthiki Ndaviti aya nova Filisitiya opo valwise Saulu. Mahi, Ndaviti ahakwatesako vali ova Filisitiya mokonda etyi ovatumini vova Filisitiya+ velipakaila-mo, avemukondola, avati: “Makahula ku Saulu, tatekulu yae. Otyo, matyitupolesa omitwe.”+ 20 Vomuhoko wa Manasesi vahulile ku Ndaviti etyi ehika mo Sikalange,+ ovava: O Andinaa, na Sosambande, na Sendiyeli, na Mikaeli, na Sosambande, na Eliyuu, na Siletai. Ankho ononkhalamutwe mbovityita ekwii mu Manasesi.+ 21 Vakwatesileko Ndaviti okulwisa ovifwanga vimwe ovinyingi, mokonda aveho ankho ovakwa-vita vokwapama, vakola omutima,+ ankho ononkhalamutwe mbomafwalali. 22 Nthiki-na-nthiki ovanthu ankho vatwalako okuya ku Ndaviti+ opo vemukwateseko. Atee onthanda yae yakala onene ngonthanda ya Huku.+
23 Ei, ombalulo yononkhalamutwe mbovakwa-vita veile ku Ndaviti ko Hemboloo,+ opo vemukalese ohamba pomphangu ya Saulu, ngeetyi Siovaa atumine.+ 24 Ovalume vokwatuka mu Sundaa, ankho vena 6.800, vokumaneka onondyakulilo ononene nomaonga, vafwapo opo vaye kovilwa. 25 Vokwatuka mu Simiyau, ovakwa-vita vokwapama, vakola omutima, ankho vena 7.100.
26 Vokwatuka mu Levii, ankho vena 4.600. 27 Seoyanda+ ankho onkhalamutwe yovana va Alau,+ ankho una ovalume 3.700, 28 na Sandoke,+ omukwendye umwe ankho wakola omutima, ankho una onohongoi 22.
29 Vokwatuka mu Mbesamii velikwai na Saulu,+ ankho vena 3.000. Ovanyingi puvo, ankho vayakulila eumbo lya Saulu. 30 Vokwatuka mu Efalaii, ankho vena 20.800. Ankho ovalume vokwapama, vakola omutima, vankhimana momaumbo ovohe.
31 Votyinthimbu tyomuhoko wa Manasesi, ankho vena 18.000, vokwatumbulilwe omanyina, avatumwa okukavialeka Ndaviti kouhamba. 32 Vomuhoko wa Isakale, ankho ononkhalamutwe 200. Ankho ovalume vamwe vanoñgonoka omivo, vei etyi ova Isilayeli vena okulinga. Ankho vatumina aveho velikwai navo. 33 Vomuhoko wa Sembulau ankho vena 50.000. Ovalume vamwe ankho vapondola okukala omaswalali, nokwenda kovilwa noviti aviho viokulwa. Aveho, vakwatesileko Ndaviti noukwatyili.* 34 Vomuhoko wa Nafitalii, ononkhalamutwe ankho vena 1.000, novalume 37.000 vamaneka onondyakulilo ononene nomaonga. 35 Vomuhoko wa Ndaa vapondola okwenda kovilwa, ankho vena 28.600. 36 Vomuhoko wa Asele vapondola okwenda kovilwa, ankho vena 40.000.
37 Nthele ina ondongi Solondau,+ vomuhoko wa Lumbe no wa Ngande, notyinthimbu tyomuhoko wa Manasesi, ankho vena 120.000. Ankho omaswalali amaneka oviti aviho viovilwa. 38 Ovalume ovo aveho, ankho ovakwa-vita vaya kovilwa. Vaile ko Hemboloo nolusoko lwokuvialeka Ndaviti alinge ohamba yo Isilayeli aiho. Ova Isilayeli aveho navo, ankho o Ndaviti vahanda* alinge ohamba.+ 39 Avakala ononthiki ononthatu na Ndaviti, otyo valia, otyo vanwa, mokonda vana velikwai navo ankho vevelingila-po okulia. 40 Tupu vana vokukala popepi no vokukala kokule, ngeetyi ovo Isakale, na Sembulau na Nafitalii, vaetelele okulia vatyinda kovimbulu, no komakamelu, no konomula, no konongombe. Ankho vatyinda ofinde, nomungome walingwa nomakuyu, novinkholwi* viomakuyu, novinyu, nomulela. Tupu vaetelele onongombe nonongi ononyingi-nyingi, mokonda mo Isilayeli ankho muna ehambu enene.