Omukanda wo Tete Onohamba
1 Ohamba Ndaviti ankho una omanima omanyingi+ wakulupale unene,* namphila vemuhika ovikutu katokotelwa-le vali. 2 Ovaundapi vae avemupopila okuti: “Matukwovolela omuhikwena wehei mulume tatekulu hamba, alinge omuhakuli wove. Omuhikwena oo mamulala nae alangala ponthulo yove, opo utokotelwe tatekulu hamba.” 3 Avaovola motyilongo atyiho tyo Isilayeli omuhikwena omuwa, avavasi Ambisange+ omu Sunei+ avemutwala kohamba. 4 Omuhikwena oo omuwa unene, alingi omuhakuli wohamba, tupu umuundapela, mahi ohamba ayahalingi nae natyike.*
5 Pononthiki mbatyo opo, Andoniya+ omona wa Hasite elipake kouhamba ati: “Ame mandyikala ohamba!” Elipangiyila etemba liohamba, eliovolela vokuvelama kononkhambe novalume 50 mavahateka komutwe wae.+ 6 Mahi opo nkhele tate yae kenemutie:* “Oityi ove ulingila ñgaa?” Nae wali omuwa unene, watyitwa konyima ya Ambisalau. 7 Andoniya apopila Sowambe omona wa Seluya na Ambiyatale+ omunakwa, ngwe aveliave vemukwateseko.+ 8 Mahi Sandoke+ omunakwa na Mbenaya+ omona wa Seoyanda, na Nataa+ omuuli, na Simei,+ na Leii nomaswalali okwapama+ a Ndaviti, avahakwatesako Andoniya.
9 Andoniya aipaa onongi nonongombe ononthwei, novinyama viokwanina* alingila otyilikutila+ ponthele ponkhanda yo ko Sowelete popepi no Ene-Loseli, akongo aveho elilandula navo, ovana vohamba novalume aveho vo ko Sundaa ovaundapi vohamba. 10 Mahi ahakongo omuuli Nataa na Mbenaya, nomaswalali okwapama, nii Salomau velilandula nae. 11 Nataa+ apopila Mbate-Semba+ ina+ ya Salomau okuti: “Ove wetyiiva umwe okuti Andoniya+ omona wa Hasite wakala ohamba? Mahi tatekulu yetu Ndaviti ketyii. 12 Mbambavo nthehele-vo etyi mandyikupopila opo uhupise omwenyo wove nomwenyo womona* wove Salomau.+ 13 Enda kohamba Ndaviti mupula okuti: ‘Tatekulu yange ohamba, have-ko wapopilile omuundapi wove okuti: “Salomau omona wove oe makala ohamba mapingi pwaame, oe makapumphama kotyipundi tyange?”+ Naina kouhamba kwakalela-tyi Andoniya?’ 14 Putyina wehenemane okupopia nohamba ame mandyiya andyinyingila, naame andyiyawisa konondaka mbove.”
15 Mbate-Semba anyingila mondywo yohamba. Ohamba yakulupa-le unene, Ambisange+ omu Sunei omuundapi wae. 16 Mbate-Semba aikila konongolo elipetamena kohamba, ohamba aimupulu aiti: “Oityi wahanda okwiita?” 17 Ngwe ati: “Tatekulu ove, ove mwene wapopilile omuundapi wove menyina lya Siovaa Huku yove okuti: ‘Salomau omona wove oe makala ohamba mapingi pwaame, oe makapumphama kotyipundi tyange.’+ 18 Mahi pahe tala! Andoniya walinga ohamba, otyo ove tatekulu wehetyii.+ 19 Walinga ovilikutila onongombe ononthwei novinyama viokwanina, nonongi, ovinyama ovinyingi, akongo ovana aveho vohamba na Ambiyatale omunakwa na Sowambe omunene wovakwa-vita;+ mahi Salomau+ omuundapi wove ehemukongo. 20 Pahe tatekulu yange hamba, ova Isilayeli aveho vatala vala mwoove tatekulu, vahanda uvepopile olie mapumphama kotyipundi tyove, una mapingi pwoove tatekulu hamba. 21 Ine kulingi natyike tatekulu, tyina wamakapululukwa-po nonombwale mbove, ame nomona wange Salomau mavetuti twapomba.”
22 Kamanene-ale okupopia nohamba, kuna omuuli Nataa uya.+ 23 Hikee avapopila ohamba avati: “Omuuli Nataa weya!” Anyingila ai no oku ohamba ili, aikila konongolo elipetamena-po kohamba. 24 Nataa apulu ati: “Tatekulu yange hamba, okuti ove wati: ‘Andoniya oe makala ohamba mapingi pwaame, oe makapumphama kotyipundi tyange’?+ 25 Ngwe walinga otyilikutila+ onongombe ononthwei novinyama viokwanina, nonongi, ovinyama ovinyingi, wakonga ovana aveho vohamba, novanene vovita nomunakwa+ Ambiyatale. Vekahi nokulia nae nokunwa, veli nokuti: ‘Hamba Andoniya kala nomwenyo omule!’ 26 Mahi ame muundapi wove kankhongele nii Sandoke omunakwa, nii Mbenaya+ omona wa Seoyanda nii Salomau omuundapi wove. 27 Okuti tatekulu yange hamba, watuma okulinga otyipuka otyo, ohapopila omuundapi wove, olie malingi ohamba mapingi pwoove, ngwe apumphama kotyipundi tyove?”
28 Ohamba Ndaviti aiti: “Kaihanei Mbate-Semba.” Avekemwihana, anyingila atalama pohamba. 29 Ohamba aiyaane aiti: “Na Siovaa umwe una omwenyo, wokwandyovola* kononkhumbi ambuho,+ 30 ngeetyi nekulaa menyina lya Siovaa Huku yo Isilayeli, andyikupopila okuti: ‘Salomau omona wove oe makala ohamba mapingi pwaame, oe makapumphama kotyipundi tyange!’ otyo mandyilingi onthiki yo hono.” 31 Mbate-Semba aikila konongolo elipetamena-po kohamba ati: “Tatekulu yange Hamba Ndaviti, kala-ko apeho nomwenyo!”
32 Ohamba Ndaviti aiti: “Ihanei Sandoke omunakwa na Nataa omuuli, na Mbenaya+ omona wa Seoyanda.”+ Aveveihana avanyingila omu ohamba ikahi. 33 Ohamba aivepopila okuti: “Endei novaundapi vange amupake omona wange Salomau komula yange,*+ amulauka nae ko Siyoo.+ 34 Omunakwa Sandoke nomuuli Nataa, oko mavekemulembulila+ akala ohamba yo Isilayeli. Pahe amuhiki onkhwino, otyo muti: ‘Hamba Salomau kala nomwenyo omule!’+ 35 Pahe amukondoka otyo mulandula monyima yae, ngwe eya okupumphama kotyipundi tyange. Oe makala ohamba mapingi pwaame mandyimulingi ohongoi yova Isilayeli no yova Sundaa.” 36 Mbenaya omona wa Seoyanda liwa-liwa apopila ohamba okuti: “Amem! Siovaa Huku ya tatekulu ohamba etyitavele. 37 Ngeetyi Siovaa akalele na tatekulu ohamba, tupu akale na Salomau,+ otyipundi tya tatekulu ohamba, Ngwe etyilinge vali otyinene tyipona tya tatekulu ohamba Ndaviti.”+
38 Pahe Sandoke omunakwa na Nataa omuuli, na Mbenaya+ omona wa Seoyanda, nova Keleta nova Peletita+ avaende, avapake Salomau komula Yohamba Ndaviti+ avemutwala ko Siyoo.+ 39 Sandoke omunakwa apolo ombinga yomulela+ mekaka+ alembula Salomau,+ avahimbika okuhika onkhwino, ovanthu aveho otyo vakwililila okuti: “Hamba Salomau kala nomwenyo omule!” 40 Ovanthu aveho avalandula monyima yae, avalondeka otyo vahika omalupowi vahambukwa unene, ohi aiteketa* mokonda yokwaviela.+
41 Etyi vamana okulia,+ Andoniya novanthu aveho akongele aveivi ovanthu vaviela. Sowambe weiva vala onkhwino yahika, apulu ati: “Ovanthu ovo vaviela ngootyo mepunda-umbo oityi ya?” 42 Tyina Sowambe ehungi kokumana okupopia kuna Sonataa+ omona wa Ambiyatale omunakwa uya. Andoniya emupopila ati: “Nyingila, mokonda ove umunthu omuwa,* ngootyo waeta ondaka ongwa.” 43 Mahi Sonataa apopila Andoniya okuti: “Au handaka-ko ongwa. Tatekulu ohamba Ndaviti walinga Salomau ohamba. 44 Ohamba yatuma Sandoke omunakwa na Nataa omuuli, na Mbenaya omona wa Seoyanda, kumwe nova Keleta nova Peletita valandule Salomau monyima, vemupaka komula yohamba.+ 45 Pahe Sandoke omunakwa na Nataa omuuli, vemulembulila ko Siyoo opo akale ohamba. Avatundu-ko tyahambukwa unene, mepunda-umbo ovanthu aveho vahangayala. Otyo mweivila ovanthu vaviela. 46 Salomau wapumphama kotyipundi tyohamba. 47 Otyipuka otyikwavo, ovaundapi vohamba vakapandulile tatekulu ohamba Ndaviti avati: ‘Huku yove akulameke enyina lya Salomau alinkhimana vali tyipona enyina liove tatekulu, otyipundi tyae tyilinge otyinene vali ko tyove tatekulu!’ Ohamba ailipetamena-po otyo ili koula. 48 Ohamba aiti vali: ‘Siovaa Huku yo Isilayeli una waovola omunthu mapingi kotyipundi tyange, andyeke ndyityimone nomaiho ange mwene, ankhimanekwe!’”
49 Ovanthu aveho vakongwa na Andoniya avatili unene owoma, avakatuka avaende. 50 Na Andoniya atili owoma Salomau. Akatuka akakakatela monombinga mbomutala wovilikutila.+ 51 Avapopila ohamba Salomau okuti: “Andoniya watila owoma Ohamba Salomau, pahe wakakatela monombinga mbomutala wovilikutila, wati: ‘Ohamba Salomau tete yaane, aiti himaipaa omuundapi wange nomutunga.’” 52 Salomau ati: “Ine ulinga onondunge, nii noluhuki lwike vala momutwe wae kamalutokela pohi, mahi ine ulinga tyimwe tyapenga+ maipawa.” 53 Ngootyo, ohamba Salomau atumu vekemupole momutala wovilikutila. Pahe eya anyingila, elipetamena-po kohamba Salomau, Salomau ati: “Enda no keumbo liove.”