Omukanda wa Vali Ehipululo
36 Ovanthu vo motyilongo avapolo Seowakasi+ omona wa Sosiya, avemupake kouhamba mo Selusalei, apinge pu he.+ 2 Seowakasi wakala ohamba etyi ena omanima 23, watuminine mo Selusalei onohanyi ononthatu. 3 Mahi, ohamba yo Isitu aimupolo koutumini wae mo Selusalei, afetesa otyilongo elilimu onotalendu* 100 mbopalata, notalendu ike yoolu.+ 4 Tyehe-otyo ohamba yo Isitu aipolo Eliyakii ulikwai na Seowakasi aimupake kouhamba mo Sundaa nomo Selusalei, apilulula enyina liae emuluku okuti o Seoyakii; mahi Neku+ akwata ou velikwai nae Seowakasi, emutwala ko Isitu.+
5 Seoyakii+ wakala ohamba etyi ena omanima 25, watuminine mo Selusalei omanima 11. Watwaileko okulinga ovipuka ovivi komaiho a Siovaa Huku yae.+ 6 Nambukondonosole+ ohamba yo Mbambilonia eya okumulwisa, emukutu nomalienge evali otyitasu, opo emutwale ko Mbambilonia.+ 7 Nambukondonosole apolo ovityuma vimwe mondywo ya Siovaa, evitwala ko Mbambilonia, ekevipaka mombala yae mo Mbambilonia.+ 8 Ovipuka ovikwavo viehipululo lya Seoyakii, novipuka vitoyesa alingile, novivi alingile, viahonekwa Momukanda Wonohamba mbo Isilayeli no mbo Sundaa; Swakii omona wae, emupingi kouhamba.+
9 Swakii+ wakala ohamba etyi ena omanima 18, atumina onohanyi ononthatu mo Selusalei. Watwaile-ko okulinga ovivi komaiho a Siovaa.+ 10 Konthyimbi yenima,* Ohamba Nambukondonosole atumu okumweeta ko Mbambilonia,+ kumwe novipuka viakolela vyo mondywo ya Siovaa.+ Apolo Sendekiya ulilandula na tate ya Swakii, emupake kouhamba mo Sundaa nomo Selusalei.+
11 Sendekiya+ wakala ohamba etyi ena omanima 21, atumina omanima 11 mo Selusalei.+ 12 Walingaile etyi tyapenga komaiho a Siovaa Huku yae. Keliolele omutima ku Selemiya,+ omuuli wemupopilile onondaka mba Siovaa. 13 Tupu, ketavelele Kohamba Nambukondonosole+ wemwaanesile menyina lya Huku. Watwaileko okukala nonkhango,* ateneka omutima wae, ehetavela okukondoka ku Siovaa Huku yo Isilayeli. 14 Ononkhalamutwe ambuho mbovanakwa, novanthu aveho, ankho havakwatyili-ko. Ankho valinga ovipuka aviho vitoyesa ovanthu vovilongo ovikwavo valinga, avasilisa ondywo ya Siovaa+ mo Selusalei, ei ankho asukukisa.
15 Siovaa Huku atwalako okutuma ovatumwa-ndaka vae opo evelondole. Wevelondolele ehimbwe, mokonda ankho una okankhenda novanthu vae, nomphangu yae akala. 16 Mahi, avatwalako okulinga omukwele ovatumwa-ndaka va Huku yotyotyili,+ ankho vatomba onondaka mbae,+ tupu ankho vapopia omapita ovauli vae.+ Siovaa anumanena unene ovanthu vae,+ atyihetavela vali okuvekwatesako.
17 Huku evekatulila Ohamba yova Kalindeya,+ aiipaa ovakwendye vavo nomutunga+ mondywo yomphangu yavo onthyukuki.+ Kakalele nokankhenda novakwendye, novafikwena veheneende nomukwendye, nii no vokwakulupa, no vokwavela.+ Huku wapakulile ovipuka aviho pomavoko ae.+ 18 Atwala ko Mbambilonia ovityuma aviho vyo mondywo ya Huku yotyotyili, ovinene novitutu, nomalumono omondywo ya Siovaa, nomalumono ohamba, novakwatesiko vae.+ 19 Ayoko-po ondywo ya Huku yotyotyili,+ ateye-po otyimato tyo Selusalei,+ ayoko-po onondywo mbokwapama, ahanye ovipuka aviho viokwankhimana.+ 20 Vokwahupa komutunga evetwala koupika ko Mbambilonia,+ avakala ovaundapi vae+ no vovana vae, atee ouhamba wo Pelesa wahimbika* okutumina,+ 21 opo onondaka mba Siovaa mbapopilwe na Selemiya mbufwiswepo,+ atee otyilongo tyifetela-po ovityasapalo viatyo.+ Ononthiki ambuho otyilongo tyakala tyehena ovanthu, ankho katyiundapa motyasapalo, atee tyatuukisa omanima 70.+
22 Menima lyo tete lioutumini wa Silu+ ohamba yo Pelesa, opo Siovaa afwisepo onondaka apopilile Selemiya,+ Siovaa aavela ondundo Silu, ohamba yo Pelesa ipopie otyitumino kovanthu aveho moutumini wae aityihoneka momukanda.+ Otyitumino otyo, tyati: 23 “Etyi, otyo tyapopia Silu Ohamba yo Pelesa, wati: ‘Siovaa Huku komaulu, wampha omauhamba atyo aeho kombanda yohi,+ wandyavela otyilinga tyokumutungila ondywo ko Selusalei, mo Sundaa.+ Ou pwoonwe wahula kovanthu vae, Siovaa Huku yae akale nae.’”+